Լարված վիճակ դատարանում. երրորդմասցի Լյովիկի հայրը վիրավորեց փաստաբանին

Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում այսօր՝ ապրիլի 25-ին, շարունակվել է «Երրորդմասցի Լյովիկի» եւ ընկերների սպանության գործով դատական նիստը:

Այսօր պետք է ցուցմունք տային տուժողների իրավահաջորդները: Նրանք, սակայն, դատարան գրություն էին ներկայացրել, որ հիմք ընդունվի իրենց նախաքննական ցուցմունքները: Պաշտպանական կողմն առարկություն էր ներկայացրել՝ պահանջելով, որ կամ նրանք պետք է դատարանում հարցաքննվեն, կամ նրանց ցուցմունքներն արժանահավատ չճանաչվեն:

Այսօրվա նիստին ներկայացել էր «Երրորդմասցի Լյովիկի» հայրը, որը սկզբում հայտարարեց, որ ցուցմունք է տալու, այնուհետեւ նշեց, որ բացատրություն է տալիս, ավելի ուշ էլ, թե հայտարարություն ունի: Հայտարարությունն ընթերցելիս, սակայն, տուժողի իրավահաջորդը սկսեց վիրավորական արտահայտություններ անել ամբաստանյալների փաստաբաններից Լուսինե Սահակյանի հասցեին: Նիստերի դահլիճում վիճաբանություն սկսվեց:

Դատական նիստը հետաձգվեց: Դատարանը հաջորդ նիստին կփորձի ապահովել տուժողների իրավահաջորդների ներկայությունը:

Ըստ մեղադրական եզրակացության՝ Վահան Հակոբյանը («Գաստիկ»), Սարգիս Հախանումյանն («Տլե») ու Սարգիս Գրիգորյանը («Ծգլ») նախնական համաձայնությամբ ապօրինի ձեռք են բերել եւ պահել զենք:

2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը եւ Սարգիս Գրիգորյանը նախնական համաձայնությամբ, շատերի կյանքի համար վտանգավոր եղանակով, երկու եւ ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգներից կրակահերթ են արձակել Լեւոն Ղազարյանի, Դրաստամատ Թադեւոսյանի եւ Մեսրոպ Նազարյանցի ուղղությամբ: Կրակոցների հետեւանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադեւոսյանը «Էրեբունի» բժշկական կենտրոն տեղափոխվելու ճանապարհին մահացել են:

Նրանց մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 1, 6, 7 կետերով: Խափանման միջոց է ընտրվել կալանավորումը: