Փաշինյանն Էրդողանի էմիսարին օգնության է կանչել

Հայոց ցեղասպանության ժխտման իր քաղաքականության մեջ Նիկոլ Փաշինյանը բավական հետևողական է։ Ակնհայտորեն այդ հարցում ուղղորդվում է Թուրքիայի կողմից։ Հայ հանրությունը դեռ չի հասցրել մարսել նրա դավաճանական հայտարարությունները, իսկ Փաշինյանի իշխանությունը նոր քարոզչական գրոհ է ձեռնարկել։

Այս օրերին Երևանում է Թուրքիայի Մեջլիսի նախկին պատգամավոր, Միջազգային խաղաղության «Քարնեգի» հիմնադրամի ներկայացուցիչ Կարո Փայլանը։ Վերջինս երեկ հարցազրույցներ է տվել տարբեր լրատվամիջոցների, վիճահարույց բազմաթիվ պնդումներ է արել։ Ըստ Փայլանի, Թուրքիայում և թուրքական կառավարության մեջ չկա մարդ, ով դեմ է Հայաստանի հետ սահմանի բացմանը։ Տպավորություն է, կարծես, Հայաստանն է 30 տարուց ավելի փակել սահմանն ու շրջափակման մեջ է պահում Թուրքիային։

«Ես իմացա, որ ցորենի 95 տոկոսը Ռուսաստանից է գալիս, այսքան կախված լինելը լավ բան չէ։ Նույնը` գազի դեպքում։ Պետք է այս իրավիճակը մի փոքր փոխվի։ Եթե այս պայմանագիրը կնքվի, գազի 40 %-ն Ադրբեջանից կարող ենք առնել, 30 %-ը` Իրանից, 40 %-ն էլ` Ռուսաստանից։ Նույնն էլ ցորենը, կարող ենք 40 %-ը Թուրքիայից առնել, կամ ուրիշ երկրներից։ Մենք պետք է ազատ ու անկախ լինենք։ Ցավոք, մենք շատ զգացմունքային ենք, բայց քաղաքական գործիչը պետք է տեսնի վտանգներն ու առիթները»,- ասել է Փայլանը։

Նրա այս հայտարարությունը ոչ միայն վտանգավոր, այլև անհեթեթ է։ Ցորենի մեծ մասը Թուրքիան գնում է Ռուսաստանից, ինչպես և Ադրբեջանն է արտահանվող գազի մեծ մասը գնում Ռուսաստանից։ Այսինքն, ՌԴ-ի փոխարեն ռուսական ցորենն ու գազն այլ աղբյուրներից գնելու դեպքում ոչ միայն տնտեսական, այլև քաղաքական լուրջ կորուստներ ենք ունենալու։ Այս հանգամանքը ոչ փայլաններին, ոչ էլ Նիկոլ Փաշինյանին, թերևս, չեն հուզում։

Հեղինե Ալթունյան