Ֆրանսիայի ԱԳՆ-ն Բաքվից պահանջել է վերջ տալ Նոր Կալեդոնիայի հարցում անընդունելի քայլերին. Ադրբեջանի ԱԳՆ-ն արձագանքել է

Ֆրանսիան իրավիճակի ապակայունացման անընդունելի փորձ է որակել իր անդրծովյան տարածքներից մեկում՝ Նոր Կալեդոնիայում,  մետրոպոլիայից անկախացման գաղափարի աջակիցների մասնակցությամբ միջոցառման անցկացումը՝ Ադրբեջանի հովանու ներքո: Այս մասին, ՏԱՍՍ-ի փոխանցմամբ, հայտարարել է Ֆրանսիայի արտգործնախարար Ժան Նոել Բարոն։

««Բաքվի խումբը» կրկին փորձել է ապակայունացնել մեր ազգային քաղաքական կյանքը Նոր Կալեդոնիայում։ Մեր անդրծովյան տարածքներում Ադրբեջանի կողմից իրականացվող այս ապարդյուն փորձերն անընդունելի են և պետք է անհապաղ դադարեցվեն»,- գրել է նա X-ում։

Այսպես է Ֆրանսիայի ԱԳ նախարարն արձագանքել Բաքվի նախաձեռնող խմբի կողմից այս շաբաթ Նումեայում (Նոր Կալեդոնիայի վարչական կենտրոն) Ապագաղութացման միջազգային ճակատ համագումարի անցկացմանը։ X-ի հայտարարության համաձայն՝ միջոցառմանը, որը տեղի է ունեցել հունվարի 23-25-ը, պետք է մասնակցեին Ֆրանսիայի անդրծովյան տարածքներից, ինչպես նաև Կորսիկայի մի քանի ասոցիացիաների ներկայացուցիչներ, որոնք հանդես են գալիս Ֆրանսիայից անկախանալու օգտին:

Ադրբեջանի ԱԳՆ խոսնակ Այխան Հաջիզադեն մեկնաբանել է Ֆրանսիայի արտգործնախարարի հայտարարությունը՝ ասելով, թե սա «Նոր Կալեդոնիայի բնիկ բնակչության պահանջների նկատմամբ ֆրանսիական անգործությունը կոծկելու փորձ է»: 

«Հենց Ֆրանսիան է միշտ միջամտել տարածաշրջանային խնդիրներին և Ադրբեջանում խաղաղության և կայունության վերականգնման գործընթացին։ Բաքվի նախաձեռնող խումբը նպատակ ունի հանրության ուշադրությանը ներկայացնել Ֆրանսիայի գաղութատիրական քաղաքականությունը և անդրծովյան տարածքներում առկա խնդիրները»,- ասել է Հաջիզադեն:

Բաքվի նախաձեռնող խումբը ստեղծվել է 2023 թվականի հուլիսին Ադրբեջանում կայացած համաժողովում՝ Չմիավորման շարժման համակարգող բյուրոյի նախարարական հանդիպման շրջանակում։ Այն իր նպատակն է սահմանել՝ աջակցել 21-րդ դարում գաղութատիրությունից տառապող ժողովուրդների պայքարին, սակայն առավելապես կենտրոնացած է Ֆրանսիայի անդրծովյան տարածքներում ապակայունացում առաջացնելու ուղղությամբ: