Սիրիայի խոշոր քաղաքներում ծածանվում է Թուրքիայի դրոշը
Աշխարհ
«Մենք դեռ չգիտենք՝ ինչ կլինի վաղը, ռազմական գործողությունների ավարտը և Ասադի ռեժիմի տապալումը դեռ չի նշանակում սիրիական հարցի ամբողջական լուծում։ Ամեն ինչ օտար է դարձել մեր աչքին, քանի որ համատարած անորոշություն է»,- MediaHub-ին փոխանցեց հալեպաբնակ Գևորգ-Հովհաննես Ճոսլակյանը` նշելով, որ բազմազգ ու համերաշխ քաղաքում ոչինչ առաջվանը չէ։
Սիրիան դեռ նախագահ չունի։ Ժամանակավոր ձևավորված կառավարությունը փորձում է կանխել արհեստական գնաճը, հոգալ բնակիչների կարիքները։ Սակայն, դա հարցի մյուս կողմն է։ Մեր զրուցակիցը փոխանցում է, որ Թուրքիայի ներկայությունը Սիրիայում երբեք այսքան արտահայտված չի եղել։ Հալեպում, մայրաքաղաք Դամասկոսում և մյուս խոշոր քաղաքներում Թուրքիան բացել է գրասենյակներ, ամենուր ծածանվում է այդ երկրի դրոշը։
«Այսինքն, այն ժամանակ, երբ հայերն այստեղ կշիռ ունեին և նշում էին ազգային, պետական, կրոնական տոներն ու հիշատակի օրերը, մտավախություն ունեմ, որ Թուրքիայի ներկայությամբ դա այլևս հնարավոր չի լինելու։ Օրինակ, Հայոց ցեղասպանության ոգեկոչման օրվան նվիրված ջահերով երթ ու իրազեկման ակցիաներ էինք կազմակերպում, հիմա, կարծում եմ, դա անհնար կլինի»։
Գևորգի խոսքով՝ Թուրքիան Սիրիայի դաշնակից պետությունն է, որը Ասադի ռեժիմը տապալելու գործընթացը կազմակերպելուց հետո, այժմ իշխող դիրք է զբաղեցնում ամբողջ Սիրիայում։
«Մենք այս պահին փորձում ենք կարգավորել մեր թղթաբանությունը՝ Հայաստան տեղափոխվելու համար, որովհետև վստահ ենք, որ այստեղ իրավիճակը գնալով էլ ավելի կանհանգստանա»,- հավելեց մեր զրուցակիցը։
1
2
3
4
5
2
3
4
5
1
3
4
5
