Մելիքբեկյանին կզոհե՞ն. նրա աթոռի հավակնորդներ կան

Հայաստանի ֆուտբոլի հավաքականի հերթական խայտառակ պարտությունը կրկին սրել է ՀՖՖ-ֆուտբոլասերներ դիմակայությունը։ Գլխավոր մարզչից զրկված հավաքականը երեկ Երևանում 0։1 հաշվով պարտություն կրեց աշխարհի ամենաթույլ հավաքականներից մեկից՝ Ֆարերյան կղզիներից։ 50 հազար բնակչությամբ և պրոֆեսիոնալ ֆուտբոլ չունեցող այդ երկրից ժամանած հավաքականն ավելի լավ տեսք ուներ, քան հայկական թիմը։ Խաղի ողջ ընթացքում էլ երկրպագուների ֆան-ակումբները բողոքի ակցիաներ էին իրականացնում՝ պահանջելով ՀՖՖ նախագահ Արմեն Մելիքբեկյանի հրաժարականը։

Որքան էլ իշխանությունը փորձում է ատամներով պահել Մելիքբեկյանին, իրենք էլ հասկանում են, որ հայկական ֆուտբոլում ստեղծված վիճակը կարող է սպառնալիք դառնալ Փաշինյանի աթոռին։ ՀՖՖ-ն վերջին վեց տարիներին որևէ լուրջ արդյունք չի գրանցել ֆուտբոլում, փոխարենը ֆեդերացիայում կոռուպցիոն տարբեր սխեմաների, դրանց պատգամավորների ու պաշտոնյաների ներգրավվածության մասին տեղեկությունները մշտապես են շրջանառվում։ Զարմանալի չէ, որ մի քանի տասնյակ միլիոն դոլար շրջանառությամբ այդ հիմնարկի ղեկին Արմեն Մելիքբեկյանին պահելու համար տարբեր ազդեցիկ ուժեր են աշխատում։

Մեր տեղեկություններով, իշխանությունները մտածում են փոխել Մելիքբեկյանին, բայց այնպիսի մեկին դնել, որ խնդիրներ չառաջանան։ Ֆեդերացիայի նախագահ դառնալու լուրջ ախորժակ ունի Մելիքբեկյանի տեղակալ Արմեն Նիկողոսյանը։ Փաշինյանի ընտանեկան թերթի նախկին մարզական լրագրողը ժամանակին աշխատել է նաև Ռուբեն Հայրապետյանի հետ, ապա, իշխանափոխությունից հետո թռել է Մելիքբեկյանի գիրկը, այժմ էլ ցանկանում է ֆեդերացիան գլխավորել։ Նիկողոսյանի թեկնածությանն իշխանության մեջ դեմ չեն, ի վերջո, իրենց հետ կապված անձ է։ Բայց քննարկվում է նաև Քննչական կոմիտեի նախագահ Արգիշտի Քյարամյանի թեկնածությունը։ Փաշինյանն այդկերպ ցանկանում է վարձահատույց լինել Քյարամյանին՝ նվիրված ծառայության համար։ Թեպետ, մեր աղբյուրը չբացառեց, որ ՔՊ-ում սաբոտաժ կազմակերպեն և Քյարամյանին չընտրեն ֆեդերացիայի նախագահ, եթե Մելիքբեկյանին «ֆուկ» անեն, իսկ նրա թեկնածությունն առաջադրվի։ 

Նարինե Թումանյան