«Ռազմական գործողությունների վերսկսման հավանականությունը մեծ է»

Ռազմական գործողությունների վերսկսման հավանականությունը միշտ կա, ավելին՝ այն մեծ է։ Այս մասին REGNUM գործակալությանը տված հարցազրույցում հայտարարել է ԼՂՀ պաշտպանության նախարար Լևոն Մնացականյանը:

Ապրիլյան քառօրյա պատերազմի կորուստներին անդրադառնալով՝ Լևոն Մնացականյանն ասել է. «Իսկ ո՞վ է ասել, որ կորուստները մեծ են: Բնականաբար, մեզ համար յուրաքանչյուր կորուստ կարևոր է, և մենք անթույլատրելի ենք համարում ցանկացած կորուստ: Բայց ռազմական գործողությունները դրանով էլ դաժան են, որ դրանց հետևանքով լինում են ինչպես անձնակազմի, այնպես էլ նյութական կորուստներ: Այդ պատճառով խոսել այն մասին, թե շատ կամ քիչ են եղել կորուստները, և ընդհանրապես նման գնահատականներ տալը սխալ է… Ինչ վերաբերում է հարձակվող ադրբեջանական զորքերին, նրանց կորուստները մի քանի անգամ գերազանցում են մեր կորուստները: Եվ դա՝ հաշվի առնելով այն, որ նրանք օգտագործել են հանկարծակիության գործոնը և էլիտար ստորաբաժանումներ: Այդ պատճառով ես կարծում եմ, որ ԼՂՀ պաշտպանության բանակն իր խնդիրը պատվով է կատարել: Եվ հակառակորդը հասկացել է, որ նրա հետագա հարձակողական բոլոր գործողությունները կավարտվեն ձախողմամբ»:

Նախարարը, խոսելով հետախուզության աշխատանքի մասին, ասել է, որ հակառակորդի գործողությունների մասին որոշակի տեղեկություն հայտնի է եղել, և իրականացվել են նախապատրաստական որոշակի քայլեր: Այդ պատճառով հետախուզության գործողությունները չի կարելի ձախողված համարել։ Ինչպես նշել է նա՝ հարձակման նման մասշտաբների մասին հայտնի չի եղել: «Այդ առումով որոշակի բացթողումներ եղել են: Մենք չէինք սպասում շփման գծի ողջ երկայնքով հարված: Դրա հետևանքով մենք կորցրինք որոշ հենակետեր, սակայն դա փաստացիորեն չազդեց ԼՂՀ ՊԲ հնարավորությունների վրա: Զորքերը շարունակում են ամբողջությամբ կատարել իրենց խնդիրներն առաջնագծում: Իհարկե, լավ կլիներ, եթե այդ դիրքերը նույնպես չկորցնեինք: Այնուամենայնիվ, այն կարճ ժամանակում, որ կար մինչև հրադադարը, մենք զգալիորեն վերականգնել ենք կորցրած դիրքերը: Եթե ռազմական գործողությունները շարունակվեին, մենք ավելի լայն հնարավորություններ կունենայինք: Այնուամենայնիվ, ես չեմ կարծում, որ այդ աննշան կորուստներն անվերադարձ են. համոզված եմ, որ մենք դեռ հնարավորություններ կունենանք մեր կորցրած դիրքերը վերականգնելու»,- ասել է նախարարը:

Լևոն Մնացականյանը հայտնել է նաև, որ մեծ քանակությամբ աշխատանք է կատարվել Լեռնային Ղարաբաղում բոլոր ուղղություններով՝ վերապատրաստման, տեխնիկական վերազինման, նոր սպառազինության ձեռք բերման, և այդ գործընթացը դեռ շարունակվելու է:

«Մենք ներդնում ենք շատ ավելի մեծ գումարներ, քան դուք նշեցիք հարցում»,- ասել է նախարարը՝ պատասխանելով ապրիլյան պատերազմից հետո Սփյուռքի միջոցով հավաքված 8 միլիոն դոլարի ներդրման մասին հարցին։

Ինչ վերաբերում է Ադրբեջանի հնչեցրած սպառնալիքներին առնչվող հարցին, նախարարը նշել է. «Ադրբեջանի կողմից Ստեփանակերտին հարված հասցնելու դեպքում կձեռնարկվեն համապատասխան միջոցներ։ Թե ինչ միջոցներ՝ թող նրա համար հանելուկ մնա: Պարզապես պատասխանն անհամեմատելի կլինի»,- ասել է նա:

Ակտիվ ռազմական գործողությունների վերսկսման հավանականության մասին հարցին անդրադառնալով՝ նախարարն ասել է. «Իհարկե, ռազմական գործողությունների վերսկսման հավանականությունը միշտ կա, ավելին՝ այն մեծ է: Հակառակորդի ներկայիս պահվածքը թույլ է տալիս գալ այն եզրակացության, որ նա դեռ ամբողջությամբ չի հրաժարվել իր մտադրություններից: Այդ պատճառով ապագայում ցանկացած պահի հնարավոր է ռազմական գործողությունների վերսկսում: Այնուամենայնիվ, ապրիլյան պատերազմը որոշակի զսպող ազդեցություն է թողել հակառակորդի վրա: Դա երևում է նաև նրանց հայտարարություններից. եթե նախկինում նրանք ասում էին, որ հաղթանակ կտանեն երեք օրում, այժմ այդպիսի հայտարարություններ այլևս չեն հնչում, և ես հուսով եմ, որ նրանք ընդհանրապես կհրաժարվեն իրենց մտադրությունից»։