Ամոթանք տվին, բերանները «սկոտչեցին», հիշեցին Հրանուշ Հակոբյանին ու Ձերժինսկուն (Ֆոտո, վիդեո)
Հասարակություն«Հրապարակ»-ը գրում է․
ՀՀ Ան քրեակատարողական վարչության դիմաց հավաքվել էին մի խումբ քաղաքացիներ՝ պահանջով, որ պատշաճ բուժօգնություն և անհապաղ վիրահատություն կատարվի «Սասնա ծռեր» խմբի անդամներին: Մասնակիցները պահանջում էին, որ Քրեակատարողական վարչության պետ Արթուր Օսիկյանը ներքևի իջնի և լսի պահանջները, սակայն վարչությունից առաջարկեցին` 3 հոգի բարձրանա վերև: «Եթե 3 հոգի, ապա մեկ լրատվամիջոցի ներկայությամբ»,-պահանջեցին ցուցարարները, սակայն լրատվամիջոցների ներկայությունից «սարսափած» վարչությունը չհամաձայնեց այդ պահաջին:
«Օսիկյան ամոթ», «Օսիկյան իջիր» վանկարկումները այդպես էլ ցած չբերեցին ոչ Օսիկյանին և ոչ էլ ՔԿՎ որեւէ աշխատակցի: Հասկանալով, որ այդտեղ կանգնելով և վանկարկելով ոչ մի արդյունքի չեն հասնի՝ մասնակիցները որոշեցին գնալ և միանալ ՀՀ գլխավոր դատախազության առաջ հավաք կազմակերպած Եղնուկյանների ընտանիքին:
ՀՀ գլխավոր դատախազության դիմաց
«Մենք քեզ հետ ենք», «Ազատություն հայրիկիս», «Արի տուն, բայց շատ չթպրտաս» մակագրությամբ, Հիմնադիր Խորհրդարանի անդամ Կարո Եղնուկյանի լուսանկարներից պատրաստված պաստառներով Եղնուկյանների ընտանիքը հավաքվել է Գլխավոր դատախազության դիմացի մայթին: Նրանց իրավապահ մարմինները թույլ չտվեցին, որ անմիջապես դատախազության դիմաց անցկացնեն իրենց ակցիան՝ պատճառաբանելով, թե այդտեղ չի կարելի:
Եղնուկյանին անհապաղ ազատ արձակելու, առաջադրված մեղադրանքները վերացնելու պահաջին միացել էին շատերը, այդ թվում՝ ԱՍԱԼԱ-ի մարտիկ Ալեք Ենիգոմշյանը, ազատամարտիկ Գագիկ Սարուխանյանը, ԱԻՄ առաջնորդ Պարույր Հայրիկյանը և այլք:
Եղնուկյանների ընտանիքի անդամները, ի նշան բողոքի, «սկոտչեցին» իրենց բերանները: Ելույթով հանդես եկավ Գագիկ Սարուխանյանը՝ նշելով, երբ Սփյուռքի նախարար Հրանուշ Հակոբյանը կոչ է անում՝ «Արի տուն», Կարո Եղնուկյանը իր 5 երեխաների հետ եկավ տուն, վերադարձավ հայրենիք, բայց նրան ձերբակալեցին:
Ելույթ ունեցան նաև Դավիթ Սանասարյանը, Պարույր Հայրիկյանը՝ կոչ անելով ազատ արձակել Կարո Եղնուկյանին: Դավիթ Սանասարյանը իր ելույթում բոլորի ուշադրությունը հրավիրեց դատախազության շենքի քանդակներին, որոնք դեռ սովետական ժամանակներից են պահպանված, նա նշեց, որ այսպիսի կառույցների մոտ դեռ Ձերժինսկու կարգերն են:
Եղնուկյանի աղջիկը մեզ հետ զրույցում նշեց, որ նմանատիպ ակցիաներ կրկին կազմակերպվելու են: Առաջիկայում կհայտնեն, թե հաջորդ ակցիան երբ է լինելու:
1
2
3
4
5
1
2
3
4
5
2
5
