«Կրա՞կն եմ ընկել, որ Շարմազանովի եղբայրն եմ. վթարի օրն էդ մեքենայի ղեկին չեմ եղել»․ Էրիկ Շարմազանով

Օգոստոսի 22-ին անդրադարձել էինք Վանաձոր-Դիլիջան ավտոճանապարհին Մարգահովիտ գյուղի մոտակայքում տեղի ունեցած վթարին: Բախվել էին Toyota Land Cruiser Prado մակնիշի 10 DD 017 համարանիշի եւ ՎԱԶ 21 099 մակնիշի ավտոմեքենաները։ Վթարի հետեւանքով մահացած Արեն Մարանդյանի մորաքույրը մեզ հետ զրույցում հայտարարեց, որ Տոյոտայի ղեկին եղել է ԱԺ փոխնախագահ, ՀՀԿ խոսնակ Էդուարդ Շարմազանովի եղբայրը՝ Վանաձորի Տարոնի բաժնի ոստիկանապետ Էրիկ Շարմազանովը: Տեղեկացնենք, որ Էրիկ Շարմազանովից մեկնաբանություն չկարողացանք ստանալ, քանի որ վերջինս գտնվում էր արտերկրում, այսօր, սակայն նա վերադարձել է Հայաստան, եւ հեռախոսահամարն այլեւս հասանելի է:
Ներկայացնում ենք Armtimes-ի զրույցը Էրիկ Շարմազանովի հետ՝ վթարի մանրամասների վերաբերյալ.

- Պարոն Շարմազանով, Ի՞նչ կապ ունեք օգոստոսի 1-ի վթարի հետ, որքանո՞վ է իրականությանը համապատասխանում տեղեկությունը, որ Տոյոտան Ձեր մեքենան է:

-Ես որեւէ կապ չունեմ այդ վթարի հետ, էդ մեքենայի ղեկին չեմ եղել, երեւի ինչ-որ մեկը փորձում է հարց լուծել անունս տալով:

-Այդ դեպքում ինչո՞ւ են ասում, որ Ձեր մեքենան է:

-Ես, ընդհանրապես, մեքենա չունեմ: 2008 թվականից սկսած՝ դա կարող եք ճշտել պաշտոնական եւ ոչ պաշտոնական բոլոր աղբյուրներից, ուղղակի այդ մեքենան պատկանում է կնոջս մորաքրոջ աղջկա ամուսնուն:

-Ի՞նքն է մեքենան վարել:

-Այո, Արամ Ավակյանը, ավելի ճիշտ՝ Արամիկը:

-Այժմ գործով կալանավորվա՞ծ է:

-Այո, դեպքից հետո ինքնակամ ներկայացել է բաժին:

- Ականատեսներ են եղել, որոնց խոսքով մեքենայի ղեկին Դուք եք եղել, ընդ որում՝ մի մասն էլ պնդում է, որ Ձեզ հետ կին է եղել, եւ նա է ղեկին եղել վթարի պահին:

- Ես պաշտոնապես հայտարարում եմ, որ աստծու առաջ մաքուր եմ, պարզ ասում եմ՝ որեւէ ականատես չի կարող ասել, որ ես եմ եղել, որովհետեւ նման բան չի եղել: Քանի որ որոշակի հարաբերություններ ունեմ այդ տղայի հետ, կարող եմ նշել, որ հաստատ այդ մեքենայի մեջ բացի այդ տղան ուրիշ մարդ չի եղել, դա իմ անձնական տեսակետն է, ոչ թե պաշտոնական:

- Դուք տեղա՞կ եք վթարի մանրամասներից:

-Ես կարող եմ ասել, որ 19:36-ին իմ աշխատասենյակում եմ եղել, եւ այդ տղան իր բջջային հեռախոսով զանգահարել է ինձ ու հայտնել, որ վթարի է ենթարկվել Դիլիջանի ճանապարհին՝ Վանականների գյուղի մոտ:

- Այդ ժամանակ արձակուրդում չե՞ք եղել:

- Ոչ, նախատեսում էի արձակուրդ գնալ, բայց անձնական պատճառներով հետաձգվեց արձակուրդս, եւ արձակուրդս սկսվել է օգոստոսի 3-ից:

- Ստացվում է՝ զանգը ստանալուն պես գնացե՞լ եք դեպքի վայր:

- Այո, մոտ 5 րոպե անց գնացել եմ դեպքի վայր:

- Այսինքն հնարավո՞ր է, որ Ձեզ տեսնեին դեպքի վայրում:

- Այո, բայց դեպքի վայրում եղել եմ վթարից կես ժամ անց:

- Իսկ Տոյոտայից երբեւէ օգտվե՞լ եք:

- Այո, օգտվել եմ:

- Չե՞ք հերքում, որ ժամանակ առ ժամանակ վարել եք այդ մեքենան:

- Ոչ, չեմ հերքում, եթե անձնական մեքենա չունեմ, իրավունք չունե՞մ ինչ-որ մեկից իմ անձնական կարիքները հոգալու համար մեքենա խնդրել, օրինակ՝ գնալ Բաթումի հանգստանալու, անցած տարի այդ մեքենայով գնացել եմ Բաթումի:

- Երբ Ձեզ հարկավոր է եղել վարե՞լ եք այդ մեքենան:

- Ոչ թե երբ հարկավոր է եղել, պարզապես, այդ տղան ՀՀ-ում չի ապրում, ՌԴ-ում է բնակվում մշտական, ժամանակ առ ժամանակ գալիս է, ընտանիքն այստեղ է ապրում, ինքը, երբ էստեղ չի եղել, մեքենան ազատ է եղել, խնդրել եմ, եթե հարմար է եղել, տրամադրել են: Հասկանում եմ դեպքի հետ կապված հետաքրքրությունն առաջացել է նրա համար, որ Շարմազանովի եղբայրն եմ, կրա՞կն եմ ընկել, որ Շարմազանովի եղբայրն եմ, եթե իմ փոխարեն լիներ Պողոսյան Պողոսը որեւէ մեկը ո՛չ կխոսեր էդ մասին, ո՛չ կմտածեր: Կարծում եմ՝ ուղղակի միտված է նրան, որ եղբայրս վարկաբեկվի: Ես վթարի հետ որեւէ առնչություն չունեմ՝ ո՛չ մասնակից եմ, ո՛չ էլ վարորդ, թե էդ մարդիկ ինչու են ենթադրել, որ ես եմ եղել, երեւի նրա համար, որ այդ մեքենան մեկ-մեկ ես էլ եմ վարել, մտածում են, որ եթե երբեմն ես վարել եմ, ուրեմն ամեն օր պետք է ես վարեմ: Էդ տղան դեպքից 10 օր առաջ գնացել էր Բաթումի հանգստանալու: Ես էլ պետք է գնայի, բայց չստացվեց, իսկ ինքը դեպքի գիշերն էր վերադարձել, բնականաբար, իր մոտ է եղել մեքենան, եթե իր անձնական մեքենան է, ու ինքը երկրում է, ինչի՞ պետք է ինձ մոտ լիներ:

Հիշեցնենք, որ վթարի հետեւանքով զոհվել են ՎԱԶ 21-099-ի ուղեւորներ, Մարգահովիտ գյուղի բնակիչներ՝ Արեն Մարանդյանը, Էմիլ Խուդինյանը եւ Վանաձոր քաղաքի բնակիչ Դավիթ Սարգսյանը: Ծանր վնասվածքներով հիվանդանոց են տեղափոխվել, Մարգահովիտ գյուղի բնակիչներ Սասուն Դավթյանը, Միհրան Պողոսյանը եւ Արմեն Գեւորգյանը: Փորձեցինք կապ հաստատել Արմեն Գեւորգյանի նա, որն արդեն տուն է տեղափոխվել, սակայն նա, կտրականապես, հրաժարվեց զրուցել վթարի մասին:

Լոռու մարզի Գուգարքի քննչական բաժնում քրեական գործ է հարուցվել՝ Քրեական օրենսգրքի 242 հոդվածի երրորդ մասի հատկանիշներով՝ 2 եւ ավելի անձանց մահվան պատճառ հանդիսացած ավտովթարի դեպքի առնչությամբ: