14-ամյա աղջկա հետ պարբերաբար սեռական հարաբերություններ է ունեցել

Վերաքննիչ քրեական դատարանում ավարտվել է Անդրանիկ Գ.-ի գործով բերված վերաքննիչ բողոքի քննությունը:

Գործը քննվել է Արմավիրի մարզի ընդհանուր իրավասության դատարանում Վահե Խալաթյանի նախագահությամբ:

Հանցավոր արարքների կատարման պահին 24-ամյա Անդրանիկը մեղադրվել է ակնհայտ անչափահաս՝ 2001 թվականի մայիսի 25-ին ծնված, 14-ը նոր բոլորած Արևիկի (անունը փոխված է) հետ 7 դրվագով ոչ ավանդական եղանակով սեռական հարաբերություն ունենալու համար:

Անդրանիկը տաքսի է վարել, նաև՝ մասնավոր հողագործական սեզոնային աշխատանքներ է կատարել:

2015 թվականի գարնանը հողագործական աշխատանքներ է կատարել Արմավիրի մարզի գյուղերից մեկի դաշտերում:

Այնտեղ աշխատել է նաև տուժող Արևիկի մայրը: Մի օր վերջինս իր հետ դաշտում աշխատելու է տարել անչափահաս դստերը՝ Արևիկին: Անդրանիկը ծանոթացել է Արևիկի հետ, իմացել է, որ աղջիկը 14 տարեկան է, համակրել է նրան:

Հետագայում Անդրանիկը ծանոթի միջոցով ճշտել է Արևիկի հեռախոսի համարը, սկսել է զանգել նրան: Աղջիկը շփվել է Անդրանիկի հետ: Սկսել են հանդիպել:

Հերթական հանդիպման ժամանակ՝ 2015 թվականի աշնանը, Անդրանիկն առաջարկել է, որ սեռական հարաբերություն ունենան: Աղջիկն ասել է, թե ինքը կույս է, չէր ցանկանա զրկվել կուսությունից: Անդրանիկն առաջարկել է «այլընտրանքային տարբերակ»:

Եվ նա փոխադարձ համաձայնությամբ 14 տարեկան աղջկա հետ սեռական հարաբերություն է ունեցել իր առաջարկած եղանակով:

Դրանից հետո Անդրանիկն ու անչափահաս աղջիկը հերթական հանդիպումներից առնվազն վեց հանդիպման ժամանակ նույն եղանակով սեռական հարաբերություն են ունեցել:

Հանդիպումների վայր է ծառայել հիմնականում Անդրանիկի վարած մեքենան, որը կարող էին կայանել, ասենք, դպրոցից 50 մետր հեռավորության վրա… Արևիկի տանը նույնպես նման հանդիպում տեղի է ունեցել:

Վերջին անգամ Անդրանիկն անչափահաս աղջկա հետ սեռական հարաբերություն է ունեցել, ըստ դատական ակտի, 2016 թվականի փետրվարի 15-ից 20-ն ընկած ժամանակահատվածում:

Անդրանիկ Գ.-ն իրեն մեղավոր է ճանաչել մեղսագրված արարքի համար՝ ՀՀ քրեական օրենսգրքի 141 հոդվածի 2-րդ մասի 1-ին, 3-րդ կետերով: Ամբաստանյալի միջնորդությամբ գործը քննվել է արագացված կարգով:

Ընդհանուր իրավասության դատարանը հաշվի էր առել, որ ամբաստանյալն ընդունել է մեղքը, զղջացել է, բնակվում է տուժող աղջկա հետ համատեղ:

Արմավիրի մարզի ընդհանուր իրավասության դատարանը Անդրանիկ Գ.-ին մեղավոր էր ճանաչել մեղսագրված արարքի համար, դատապարտել էր 4 տարի ազատազրկման, նրա նկատմամբ կիրառվել էր պայմանական դատապարտություն, և սահմանվել էր 3 տարի փորձաշրջան:

Այս դատավճիռը բողոքարկել էր մեղադրող դատախազը՝ պահանջելով վերացնել պայմանական դատապարտության կիրառումը, Անդրանիկին դատապարտել իրական ազատազրկման՝ հաշվի առնելով նրա կատարած արարքի հանրային վտանգավորության բարձր աստիճանը:

Մեղադրողն իր բողոքում անդրադառնալով ընդհանուր իրավասության դատարանի կողմից հաշվի առնված հանգամանքին, թե Անդրանիկ Գ.-ն ապրում է տուժող աղջկա հետ համատեղ, նշել էր, որ դատարանին չեն ներկայացվել մանրամասն ու հանգամանալից փաստական տվյալներ, որ ամբաստանյալն ու տուժողն իրոք ապրում են համատեղ, եթե՝ այո, ապա ո՞րն է միասին բնակվելու պատճառը, պատրաստվո՞ւմ են ամուսնանալ, թե՞ համատեղ ապրելը միայն ձևական բնույթ է կրում՝ ամբաստանյալի կողմից քրեական պատասխանատվության ենթարկվելիս ավելի մեղմ պատիժ ակնկալելու առումով:

Մեղադրող դատախազ Ա. Դոլինյանը հիշատակել էր, որ մեղսագրված հոդվածով նախատեսվում է 4-ից 10 տարի ազատազրկում, և ընդհանուր իրավասության դատարանը պատժի հարցում թույլ է տվել դատական սխալ:

Ամբաստանյալ Անդրանիկ Գ.-ն ու նրա շահերի պաշտպան, փաստաբան Կ. Ստեփանյանն առարկել են վերաքննիչ բողոքի դեմ ու խնդրել են ընդհանուր իրավասության դատարանի դատավճիռը թողնել անփոփոխ: Նրանց դիրքորոշմանն են միացել նաև տուժող աղջիկն ու նրա օրինական ներկայացուցիչը:

Վերաքննիչ քրեական դատարանը՝ Ռ. Բարսեղյան, Մ. Պապոյան, Ա. Դանիելյան կազմով, արձանագրելով կատարված արարքի հանրային վտանգավորության բարձր աստիճանը, այն, որ տուժողը 16 տարին չբոլորած անձ է, նրա նկատմամբ սեքսուալ գործողությունները կատարվել են պարբերաբար, որոշել է բավարարել դատախազի վերաքննիչ բողոքը:

Վերաքննիչ դատարանն ընդգծել է, որ 16 տարին չբոլորած աղջկա հետ համատեղ բնակվելու հանգամանքը չի կարող մեղմացնող դիտվել:

Անդրանիկ Գ.-ն մեղավոր է ճանաչվել ու դատապարտվել է 4 տարի իրական ազատազրկման: Պայմանական դատապարտության կիրառումը վերացվել է:

Պատժի կրման սկիզբը կհաշվվի Անդրանիկ Գ.-ին փաստացի կալանքի տակ առնելու պահից, երբ վերաքննիչ դատարանի որոշումը մտնի օրինական ուժի մեջ: