Ինչի՞ շուրջ են զրուցել երեքով․ խորհրդավոր ընթրիք

«Փաստ» օրաթերթը գրում է.

«Փաստի» հավաստի տեղեկություններով` երեք օր առաջ Թումանյան–40 հասցեում գտնվող «Ai Leoni» ռեստորանում հանդիպել են ՀՀ վարչապետ Կարեն Կարապետյանը, ԱԺ պատգամավոր Կարեն Կարապետյանը ու տրանսպորտի և կապի նախկին նախարար Գագիկ Բեգլարյանը: Հանդիպման «քավորը» «Տաշիրի» Կարենն է եղել:
Բոլորին հայտնի է, որ Գագիկ Բեգլարյանն ամեն ինչ անում էր, որպեսզի իշխանությունները Երևանի քաղաքապետի ընտրության հարցում նախընտրեն իր թեկնածությունը: Ու նաև այդ նպատակով էր կենտրոնում դրել իր եղբոր` Հակոբ Բեգլարյանի թեկնածությունը խորհրդարանական ընտրություններում:
Հակոբը հավաքեց 26001 ձայն: Սա բավականին մեծ թիվ է, սակայն Գագիկ Բեգլարյանի հակառակորդ Տարոն Մարգարյանն իր աներձագի` Ռոբերտ Սարգսյանի հետ ՀՀԿ–ի համար հավաքեց ավելին` 27.107 ձայն: Ի վերջո, իշխող կուսակցությունն այսօր քաղաքապետի պաշտոնում տեսնում է Տարոն Մարգարյանին:
Ինչևէ, խոսենք «Ai Leoni» ռեստորանի խորհրդավոր ընթրիքից: Վարչապետ Կարեն Կարապետյանը, գաղտնիք չէ, իր կառավարության կազմում չի ուզում ընդգրկել Գագիկ Բեգլարյանին: Ու ոչ միայն չի ուզում, այլև, ըստ որոշ լուրերի, նրա մասին չի էլ ցանկանում լսել:
Այս դեպքում ինչո՞ւ են հանդիպել նրանք և ինչի՞ շուրջ են զրուցել երեքով:
Ամենայն հավանականությամբ, «Տաշիրի» Կարեն Կարապետյանը վարչապետին փորձել է համոզել, որ նա «փեշի քարը թափի» և Գագիկ Բեգլարյանին ընդգրկի կառավարության կազմում:
Մինչ այսօր վարչապետն անդրդվելի էր: Սակայն, մեր կարծիքով անուղղակի ճնշումները կշարունակվեն: Խնդիրը միայն Գագիկ Բեգլարյանը չէ, շատ ՀՀԿ–ականներ զգալի քանակի ձայներ են բերել կուսակցությանը և այժմ փորձելու են որպես փոխհատուցում պաշտոն ստանալ:

Շարունակությունը` «Փաստ» օրաթերթի այսօրվա համարում: