«Ինչ վատ բան կարողացավ՝ իմ հանդեպ արեց»

Արարատի նախկին մարզպետ, 2010 թվականին սեփական դիմումի համաձայն պաշտոնից հեռացած Վարդգես Հովակիմյանին, ըստ Արտաշատում շրջանառվող լուրերի, իշխանությունները կրկին փորձում են վերադարձնել քաղաքականություն՝ այս անգամ ԱԺ պատգամավորի կարգավիճակով: Թեեւ նախկին մարզպետը հավաստիացնում է, որ խզել է կապերը քաղաքականության հետ եւ այլեւս ցանկություն չունի մտնել նույն գետը, սակայն նրա շրջապատում համառորեն պնդում են, թե նա ընդամենը «կապրիզ է անում», ու քաղաքականություն ետդարձի կամուրջները դեռեւս այրված չեն նրա համար: Նա, ըստ լուրերի, ընտրությունների ժամանակ ընդգրկվելու է «ռեյտինգային ցուցակում» եւ լավ «աշխատելու» դեպքում կարող է հայտնվել ապագա խորհրդարանում: Հովակիմյանը ՀՀԿ հնաբնակներից է՝ կուսակցությանն անդամակցում է 1996-ից, եւ նրա կուսակցական աշխատանքից, ասում են, ՀՀԿ վերնախավում դժգոհ չեն ու առաջարկել են ակտիվություն ցուցաբերել սպասվող ԱԺ ընտրություններին ընդառաջ՝ կուրացիա անելով Արարատի մարզում: Թեեւ այս ընթացքում Հովակիմյանը հասցրել է հայտնվել օրենքի հետ կապված աղմկահարույց սկանդալի մեջ, սակայն կարողացել է մաքրել իր անունը (նրան 2011-ին մեղադրանք էր առաջադրվել ՔՕ 308-րդ՝ պաշտոնեական դիրքը ծառայության շահերին հակառակ օգտագործելը կամ ծառայողական պարտականությունները չկատարելը, 314-րդ՝ պաշտոնեական կեղծիքը, 315-րդ՝ պաշտոնեական անփութությունը հոդվածներով: 2013 թ. փետրվարի 26-ին դատարանի որոշմամբ Հովակիմյանը հանցանքների կատարման մեջ ճանաչվել է անպարտ եւ արդարացվել՝ նրան մեղսագրվող արարքներում հանցակազմի բացակայության հիմքով)։ Այդ ամբողջ պատմության «ճարտարապետը», ըստ նախկին մարզպետի մերձավորների, եղել է Արարատի նախկին մարզպետ, ՀՀ նախկին ոստիկանապետ Ալիկ Սարգսյանը, որն անձնական լարված հարաբերություններ ուներ իր համերկրացու հետ, եւ վաղուցվանից նրանց ջրերը նույն առվով չէին հոսում: «Հրապարակը» մի քանի հարց է ուղղել նախկին մարզպետին, որն այժմ, ըստ տեղեկությունների, զբաղվում է անհատ ձեռներեցությամբ՝ Արտաշատում առեւտրի կետեր ունի:

- Ճի՞շտ է, որ Ձեր կուրացիայի տակ եք վերցրել Արարատի մարզն ու աշխատում եք նպաստել առաջիկա ՏԻՄ ընտրություններում ՀՀԿ-ական թեկնածուների ընտրվելուն:

- Ոչ, ես ընդամենը սովորական քաղաքացի եմ հանդես գալիս եւ որպես սովորական քաղաքացի էլ վերաբերվում եմ սպասվող ընտրություններին:

- Իսկ ի՞նչ կասեք ԱԺ ընտրություններում Ձեր՝ որպես «ռեյտինգային թեկնածու» առաջադրվելու մասին:

- Չէ, չէ, չկա նման բան, մտքովս չի էլ անցել:

- Այսինքն՝ ԱԺ մտնելու ցանկություն չունե՞ք:

- Չէ, ընդհանրապես:

- Այդ դեպքում ովքե՞ր են շրջանառության մեջ դնում այն տեղեկությունը, թե Դուք պատգամավոր եք դառնալու, եթե այս ընթացքում ակտիվ աշխատեք ՀՀԿ-ի օգտին:

- Չեմ կարող ասել, ինչ-որ կեղտոտ ձեռագիր կա այդտեղ, բայց ընդհանրապես իմ մտքով չի անցել ու չի էլ անցնում դառնալ պատգամավոր: Ես վաղուց եմ դուրս եկել քաղաքականությունից, արդեն քանի տարի է: Ոչ թե հոգնել եմ, այլ ուղղակի չեմ ուզում, ցանկությունը միջիցս հանել եմ: Թող ջահելները մտնեն քաղաքականություն, նրանց ճանապարհ տանք, թող սերնդափոխություն լինի, ես արդեն 61 տարեկան մարդ եմ: Թող ջահելները մեր երկրի կառուցման գործում ներդրում ունենան:

- Իսկ եթե Ձեզ վարչապետի կողմից, որի հետ մտերիմ հարաբերությունների մեջ եք, առաջարկ արվի վերադառնալ քաղաքականություն, կմերժե՞ք:

- Չէ, այդպիսի առաջարկ նախ չի լինի, երկրորդն էլ՝ ես իր հետ ժամանակին, երբ Արտաշատի քաղաքապետի ընտրություններ էին, եւ իմ ընկերոջ տղան (նկատի ունի Արտաշատի ներկայիս քաղաքապետ Արգամ Աբրահամյանը՝ խմբ.) թեկնածությունն առաջադրել էր, զրուցել ենք ընտրություններին մասնակցելու մասին: Ասել եմ, որ ես, պարոն վարչապետ, էս ամեն ինչից հեռու եմ, ինքն էլ, առանց որեւիցե մի բանի, ինձ լսել է, հասկացել է: Ես այն ժամանակ իմ մտերիմներին, բարեկամներին խնդրել եմ, համոզել եմ, առաջարկել եմ ընտրել Արգամ Աբրահամյանին, եւ իմ խնդրանքը չի մերժվել: Ես, որպես քաղաքացի, իմ ընտանիքի անդամների հետ ակուրատնի գնացել, ու կատարել ենք մեր քաղաքացիական պարտքը: Առաջիկայում էլ Արտաշատում պետք է տեղի ունենան ավագանու ընտրություններ, նույնիսկ այդ ընտրություններին ես չեմ ուզում մասնակցել, առավել եւս, որ ինչ-որ մեկի օգտին քարոզչություն անեմ:

- Իսկ գուցե Ձեր որդիների՞ն եք ուզում բերել քաղաքականություն: Երկու որդի ունեք:

- Ոչ, ոչ, ոչ… Չեմ ուզում:

- Իսկ Ալիկ Սարգսյանի հետ ի՞նչ հարաբերություններ ունեք այժմ:

- Չեմ ուզում ընդհա՜նրապես նրա անունը լսել: Ինքն ինչ վատ բան կարողացավ, իմ հանդեպ արեց: Բայց… արդարությունը, ճշմարտությունը հաղթեց: