Մանվել Մամոյանը նոր ռեկորդը նվիրեց քառօրյայում զոհվածներին (տեսանյութ)

Armtimes-ի հաղորդմամբ՝ Մանվել Մամոյանը նոր ցուցանիշով իր անունը կգրի Գինեսի ռեկորդների գրքում: Այսօր եզդի մարզիկն Ազատության հրապարակում երկրորդ փորձից կարողացավ 1 րոպեում բռունցքների վրա 86 անգամ կատարել հենում-ծալում վարժությունը, գերազանցելով 1 ամիս առաջ կանադացի Ռոյ Բերգերի սահմանած ռեկորդը՝ 84: Առաջին փորձը, ըստ նրա, չստացվեց լարվածության պատճառով: Ցուցանիշը նա նվիրեց ապրիլյան քառօրյա պատերազմում զոհվածների հիշատակին:

«Ռեկորդը սահմանել եմ, որպեսզի նվիրեմ քառօրյա պատերազմում զոհվածների հիշատակին: Ցավոք, առաջին փորձը չստացվեց այնպես, ինչպես ես էի ուզում, մինչեւ այդ առավոտյան ես փորձեր էի արել ու նույնիսկ 90 անգամ էի կատարել վարժությունը, երեւի մարդկանց ներկայությունը փոքր ինչ ազդեց ինձ վրա»,- ասաց նա:

Ռեկորդը, որը նա սահմանեց, պարզ կանոններ ունի. պետք է 90 աստիճանով ծալել արմունկը, սակայն բարձրանալիս այն ամբողջությամբ բացելու կարիք չկա:

Այսօր Մանվելը եւս մեկ ռեկորդ պետք է գրանցեր: Նա պետք է 1 րոպեում 2 մատների վրա 46 անգամից ավելի կատարեր հենում-ծալում վարժությունը: Այս մեկը նրա մոտ չստացվեց, եւ նա որոշեց թողնել դա մեկ այլ օրվա: Հետագայում, նա պատրաստվում է սահմանել ոչ միայն այս, այլեւ մի շարք այլ ռեկորդներ:

«Գինեսի ռեկորդների հետ կապված շատ պլաններ ունեմ: Հետագայում շատ ռեկորդներ եմ սահմանելու: Ապագայում պատրաստվում եմ դառնալ Գինեսի բացարձակ ռեկորդակիր: Դեռ պահեստումս շատ ռեկորդներ ունեմ ու շատ հնարավոր է՝ ամիս մեկ ինչ-որ ռեկորդ սահմանեմ: Կորոշեմ, որ վարժությունը, որովհետեւ մոտ 40 հայտ ներկայացրել եմ ու մոտավորապես դրանց կեսի պատասխանները ստացել եմ», - ասաց նա՝ ավելացնելով, որ ցանկանում է վարժությունների քանակով եւ տեսակով ամենաշատ ռեկորդները սահմանել:

Մանվել Մամոյանն իր առաջին ռեկորդը սահմանել էր 2015 թվականի հոկտեմբերին՝ ուղղահայաց ձեռքերի վրա 1 րոպեում 27 հենում-ծալում վարժություն կատարելով: