ԱՄՆ-ն հրթիռակոծել է Սիրիան․ ինչպիսին են արձագանքները

Միացյալ Նահանգներն ապրիլի 6-ի երեկոյան թևավոր հրթիռներով հարվածել է Սիրիայի արևմտյան Հոմս նահանգում գտնվող կառավարական ուժերի ռազմաբազային, ինչն արվել է օրեր առաջ Իդլիբում սիրիացի զինվորականների կողմից քիմիական զենքի կիրառմանն ի պատասխան:

Հաղորդվում է, որ ԱՄՆ-ն արձակել է «Տոմահավկ» տեսակի 59 հրթիռ, որոնք արձակվել են «Շայրաթ» ռազմաբազայի ուղղությամբ, որտեղից ավելի վաղ իրականացվել էր քիմիական հարձակումը:

Բազմաթիվ երկրներ արդեն արձագանքել են միջադեպին՝ մի մասը քննադատելով, մյուսներն էլ ողջունելով այդ քայլը:

Reuters-ի փոխանցմամբ՝ Ռուսաստանն ու Իրանը խստորեն դատապարտել են հարձակումը՝ այն որակելով «վտանգավոր և ապակառուցողական»:

Ռուսաստանի Դաշնության նախագահ Վլադիմիր Պուտինը նշել է, որ տեղի ունեցածն «ինքնավար պետության դեմ ուղղված ագրեսիա է և հորինած պատճառով միջազգային իրավունքի նորմերի խախտում»:

Ըստ ՌԴ նախագահի՝ Վաշինգտոնի քայլն էական վնաս կհասցնի առանց այդ էլ շատ վատ վիճակում գտնվող ռուս-ամերիկյան հարաբերություններին:

Մինչդեռ Իրանի արտաքին քաղաքական գերատեսչության մամուլի խոսնակ Բահրամ Քասեմին նշել է, որ նմանօրինակ միակողմանի հարվածները խստագույնս դատապարտվում են Իրանի կողմից:

«Նման գործողությունները կամրապնդեն ահաբեկիչների դիրքերը Սիրիայում ու կբարդացնեն ամբողջ իրադրությունը տարածաշրջանում»,-նշել է Քասեմին:

Ավիահարվածին դրական արձագանք տված երկրների շարքում են Մեծ Բրիտանիան, Ավստրալիան, Թուրքիան, Իսրայելը, Ֆրանսիան, Սաուդյան Արաբիան, Լեհաստանն ու Ինդոնեզիան:

«Միացյալ Թագավորությունը միանգամայն աջակցում է ԱՄՆ գործողությանը, որը համարժեք պատասխան էր սիրիական ռեժիմի կողմից իրականացված քիմիական հարձակմանը»,-հայտնել է կառավարության խոսնակը:

Ավստրալիայի վարչապետ Մալքոլմ Թըրնբուլը նշել է, որ «ԱՄՆ հարվածները հստակ մեսիջ հղեցին, որ աշխարհը չի հանդուրժի քիմիական զենքի կիրառումը»:

Թուրքիան ևս դրական գնահատական է տվել միջադեպին: Մասնավորապես՝ երկրի փոխվարչապետ Նուման Քուրթուլմուշն ասել է, որ «միջազգային հանրությունը պետք է դիմակայի Սիրիայի կառավարության բարբարոսություններին»:

Իսրայելի վարչապետ Բինյամին Նեթանյահուն նշել է, որ իրենք լիովին աջակցում են ԱՄՆ նախագահ Դոնալդ Թրամփի որոշմանը:
«Թե՛ խոսքով, թե՛ գործով նախագահ Դոնալդ Թրամփը հստակ և ուժեղ ազդակ է հղում այն մասին, որ թույլ չի տա քիմիական զենքի կիրառում»,- նշվում է Նեթանյահուի հայտարարությունում:

Ինչպես ավելի վաղ հայտնել էր Tert.am-ը, Միացյալ Նահանգներն ապրիլի 6-ի երեկոյան թևավոր հրթիռներով հարվածել է Սիրիայի արևմտյան Հոմս նահանգում գտնվող կառավարական ուժերի ռազմաբազային, ինչն արվել է օրեր առաջ Իդլիբում սիրիացի զինվորականների կողմից քիմիական զենքի կիրառմանն ի պատասխան:

Հաղորդվում է, որ ԱՄՆ-ն արձակել է «Տոմահավկ» տեսակի 59 հրթիռ, որոնք արձակվել են «Շայրաթ» ռազմաբազայի ուղղությամբ, որտեղից ավելի վաղ իրականացվել էր քիմիական հարձակումը:

ԱՄՆ նախագահ Դոնալդ Թրամփը, մեկնաբանելով Սիրիայի տարածքում իրականացված հրթիռային հարձակումը, նշել է, որ «դա բխում էր ԱՄՆ ազգային անվտանգության կենսական շահերից»: