Մարտուն Գրիգորյանի երրորդ տեղն ու Արման Սահակյանի շռնդալից հաղթանակն անսպասելի էին Շիրակի մարզում

Երեկ կայացած խորհրդարանական ընտրությունների նախնական արդյունքները արդեն հրապարակվել են: Նախնական արդյունքների համաձայն՝ Շիրակի մազում ՀՀԿ ռեյտինգային ցուցակով առաջադրված նախկին ԲՀԿ-ական Մարտուն Գրիգորյանը, ում շանսերը շատ մեծ էին գնահատվում, ռեյտինգային թեկնածուների մեջ երրորդ տեղն է զբաղեցրել: Անսպասելի շատ ձայներ է ստացել Արման Սահակյանը:

«Բացարձակ սպասելի չէին այս արդյունքները: Այստեղ ինչ-որ անհասկանալի բաներ են տեղի ունեցել, որը դեռ պետք է պարզել: Բայց Մարտուն Գրիգորյանն այդ արդյունքը գրանցեց, քանի որ նրա վարկանիշի վրա մեծ ազդեցություն էր թողել նրա՝ ՀՀԿ-ական դառնալը: Բայց ինձ համար շատ զարմանալի է Արման Սահակյանի շռնդալից ձայների թիվը: Հավանաբար շատ լավ «աշխատել են»»,- «Առաջին լրատվական»-ի հետ զրույցում ասաց գյումրեցի քաղաքագետ Գագիկ Համբարյանը՝ հավելելով, որ բավական լավ արդյունքներ է գրանցել նաև Գյումրու նախկին քաղաքապետ, «Ծառուկյան» դաշինքի ցուցակով առաջադրված Վարդան Ղուկասյանը: «11 հազար ձայնը 4 տարի քաղաքականության մեջ չեղած մարդու համար շատ լավ արդյունք է»,- ասաց մեր զրուցակիցը:

Ինչ վերաբերում է ընտրությունների արդյունքներին առհասարակ, ապա քաղաքագետի խոսքով՝ լիովին սպասելի էր այս արդյուքնը՝ հաշվի առնելով մեր հասարակության մարգինալացված վիճակը: «Պարզապես ՀՀԿ-ն մի փոքր համեստ է գտնվել և բավարարվեց 49.5 տոկոսով: Բայց հաշվի առնելով այն, որ Ընտրական օրենսգրքով նրանք ևս 4 տոկոս բոնուս են ստանալու, ուստի ձևավորելու են պարզ մեծամասնություն, որպեսզի միաձայն ձևավորեն կառավարությունը: Այլևս ՀՅԴ-ի կարիքն էլ չի զգացվի կոալիցիա կազմելու համար, և ՀՅԴ-ն պարզապես կդառնա ՀՀԿ-ի կցորդը»:

Համբարյանի խոսքով՝ թեև ՀՀԿ-ն Շիրակի մարզում ստացել է 40.5 տոկոս, բայց դա պարտություն է, քանի որ ձայների 59.5 տոկոսը շիրակցին տվել է այլ ուժերի՝ այն դեպքում, երբ համապետական բոլոր ընտրություններին Շիրակի մարզում ՀՀԿ-ն մշտապես ապահովում էր 50+1 ձայն՝ պարտություն կրելով միայն Գյումրիում:

Մեր դիտարկմանը՝ թե արդյոք Գյումրիո՞ւմ էլ քվեարկության օրը համատարած փող է բաժանվել՝ ինչպես Երևանում, Համբարյանը նկատեց. «Գյումրիում այդ հարցը ավելի վաղ էր լուծվել: Միայն թեկնածուներից մեկը Շիրակի մարզում ընտրողներին համատարած պարտադրել է լուսանկարել քվեաթերթիկը, ներկայացնել լուսանկարը շտաբ, որից հետո նոր միայն գումարը տվել է նրանց: «Ես անվանական չեմ ասի, թե ով էր այդ թեկնածուն, բայց կարող եմ ասել, որ նրա անսպասելի ձայների քանակը, նրա հաջողությունը հենց այս հանգամանքով էր պայմանավորված: Ժողովուրդն էլ չէր կարողացել խաբել նրան և գումարի համար պարտադրված լուսանկարել էր իր քվեաթերթիկը: Դրա համար էլ եղավ այն արդյունքը, որ կա»,- եզրափակեց քաղաքագետը: