«Ինչու՞ չեք փորձել մարտի բռնվել»․ պաշտոնաթող ոստիկանը քննադատում է Աշոտ Կարապետյանին

Լրագրողների եւ ցուցարարների նկատմամբ իր, մեղմ ասած, ոչ այնքան դրական վերաբերմունքով հայտնի ոստիկանության Երեւան քաղաքի ծառայության բաժնի նախկին պետ Կարեն Մովսիսյանը Երեւանի արդեն նախկին ոստիկանապետ Աշոտ Կարապետյանին զբաղեցրած պաշտոնից ազատելը «ճշգրտագույն» որոշում է համարում: Այս մասին նա գրառում է կատարել ֆեյսբուքյան իր էջում: Դեռեւս 2015 թ. պաշտոնից ազատված ոստիկանության փոխգնդապետը «Սասնա ծռեր» խմբի կողմից ՊՊԾ գունդը գրավելու հետ կապված մի շարք ոստիկանների գործողությունների վերաբերյալ հարցադրումներ է հնչեցրել..

Ոստիկանության Երևան քաղաքի վարչության պետին զբաղեցրած պաշտոնից ազատելը ճշգրտագույն որոշում էր: Ավելին, դեռ պետք է նրա ծառայության գծով տեղակալի աշխատել-չաշխատելու հարցն էլ բարձրացվի: Եվ կան մի շարք հարցադրումներ, որոնցից են օրինակ`
1. Ո՞վ է կազմել ՊՊԾ գնդի շուրջ ստեղծված արտակարգ իրավիճակում գործելու ուժերի և միջոցների տեղաբախշման (տեղակայման) տեղադիրը, կամ այն առհասարակ կա՞ թե ոչ:
2. Ո՞վ և ինչպե՞ս է հրահանգավորել ՊՊԾ գնդի շենքի պահպանությունն իրականացնող ոստիկաններին: Ի՞նչ ցուցումներ են նրանք ստացած եղել մինչ այդ չարաբաստիկ օրը: Նրանք, առհասարակ ծանո՞թ են ՀՀ Ոստիկանության մասին օրենքի 32-րդ և 33-րդ հոդվածների պահանջներին (զենքի կրման կանոններն են):
3. Նույն գիշերը ՊՊԾ գնդի ներսում ծառայություն իրականացնող խումբը ունեցել է մի քանի ինքնաձիգավոր, որոնք փաստացի ,,без бой'' հանձնվել են (բացի Վանոյանից): Ինչո՞ւ: Ի՞նչն է պատճառը, որ դուք չեք էլ փորձել մարտի բռնվել, բա ձեր գործի անունն ի՞նչ էր, թե՞ դուք այս պետության մակաբույծներն եք` վարձատրվեք, բայց չաշխատեք հա՞, երևի դուք իմացել եք, թե դուք այդ գնդի ծիրանի այգու պահակներն եք էլի, որ ցոգոլ գողացող երեխեքին աղ ու բիբար կրակելով` վախեցնեք: Ձեզ այդտեղ ծերունային պահակության էին, էլի~, նշանակել, որ տուն պահեք: Բավական չէ՞ մատների արանքով վերաբերվել ամեն ինչին: Բա, հարգելի ,,պահակներ'', այն էլ ինքնաձիգավոր (товарищи автоматчики) սրանից քրեական պատասխանատվության հոտ է գալիս, ու շատ ու շատ արդարացի կլինի, եթե այդ ոստիկաններից մի քանիսը ենթարկվեն քրեական պատասխանատվության: Հենց այդ պատասխանատվությունն էլ կարգ ու կանոն կբերի իր հետ: Բոլորը կսկսեն գիտակցել, որ ոստիկանությունում ծառայելը խաղ ու պար չէ, եղբայր, այստեղ և ուղեղ է պետք և քաջություն: Տապոռավարի աշխատելու, քավոր-սանիկ խաղացնելու ժամանակները վաղուց անցել են:
4. Ես չեմ հասկանում նաև հետևյալը: Այդ ո՞նց եղավ, որ վարչության պետի տեղակալը` բարձրաստիճան պաշտոնյան գնաց ու գերի ընկավ դրանց ձեռքը: Այ մարդ, սա հո փողոցում շոու անելու, անիմաստ բանակցություններ վարելու կամ յութուբը լցնելու հեթական դրվագ չէր, որ քեզ մեջ գցեցիր ու դրանց զինաթափման ամբողջ գործընթացը հարամեցիր: Դատարկամիտների ու փչած նապաստակների ժամանակներն էլ են անցել, եղբայր, ռուսն այստեղ էլ լավ խոսք ունի` ,,делом займись'', բալամ, շոուի ժամանակն ու տեղը չի:
Մի խոսքով էլի շատ հարցեր ու հարցեր կան: Բայց դե այնպես չի, որ այսքան բանը միայն ես եմ հասկանում: Ավելին հասկացողներ ու գիտակներ շատ կան մեր համակարգում: Կամաց-կամաց ամեն ինչ իրա տեղը կընկնի: Ես համոզված եմ:

Հիշեցնենք, որ ՀՀ ոստիկանության պետ Վլադիմիր Գասպարյանի հրամանով օգոստոսի 8-ին Աշոտ Կարապետյանն ազատվել է զբաղեցրած պաշտոնից եւ ուղարկվել կադրերի ռեզերվ: