Ադրբեջանում վիճակը լարված է

ARMTIMES / Ադրբեջանական բոլոր ընդդիմադիր դաշտը միավորող «Ժողովրդավարական ուժերի ազգային խորհուրդ»-ը այսօր հայտարարել է ապրիլի 9-ին համապետական բողոքի ցույց կազմակերպելու որոշման մասին։ Ինչպես տեղեկացրել է դաշինքի մեջ մտնող «Ժողովրդական ճակատ» կուսակցության նախագահ Ալի Քերիմլին, բողոքի ցույցը տեղի է ունենալու «Ոչ թալանին», «Ոչ կոռուպցիային», «Ոչ ընտանեկան իշխանությանը», «Ոչ միապետությանը», «Ազատություն քաղբատարկյալներին» կարգախոսներով։ «Ի վերջո մենք պետք է ցույց տանք, որ այս երկրում կան ուժեր, որոնք կարող են «Կանգ առ» ասել իշխող վարչակարգին»,-ասել է Ալի Քերիմլին։ Վերջինս ընդգծել է, թե առաջիկա հանրահավաքը Ադրբեջանում ծայր առնող նոր շարժման սկիզբն է, որը վերջ է դնելու ներկա իշխանությանը:

Բաքվի քաղաքային իշխանությունները հայտարարել են, որ կարող են արտոնել բողոքի ցույցի անցկացումը՝ պայմանով, որ այն տեղի ունենա մայրաքաղաքի արվարձանում գտնվող «Մեհսուլ» մարզադաշտում, որտեղ շատ մարդ չի կարող տեղավորվել։ Այնինչ, սպասվում է, որ ազդարարված բողոքի ցույցը բազմամարդ է լինելու։ Պատճառը երկրում վերջին 20 տարում ստեղծված ամենածանր վիճակն է: «Յուրաքանչյուր օր մանաթի փոխարժեքը նվազում է, փակվում են բանկեր, ձեռնարկություններ, արտասահմանյան ընկերությունները լքում են Ադրբեջանը, աճում է գործազրկությունը եւ խորանում է սոցիալական լարվածությունը»,-երկրում ստեղծված իրավիճակի առնչությամբ ասել է Ալի Քերիմլին: Վերջին մի քանի օրերին, երբ հայտնի է դարձել բողոքի ցույցերի շարք սկսելու մտադրության մասին, ընդդիմության ակտիվիստների զանգվածային հետապնդումներ ու ձերբակալություններ են սկսվել:

Միաժամանակ, Ադրբեջանում իշխող վարչակարգի դեմ պայքարին են պատրաստվում նաեւ եվրոպաբնակ ադրբեջանցի քաղաքական վտարանդիները։ Դեռ 2016 թվականի սեպտեմբերին Ստրասբուրգում ադրբեջանցի քաղաքական վտարանդիների կողմից ստեղծված «Ադրբեջանը ժողովրդավարության կարիք ունի (Azerbaijan needs democracy)» կազմակերպությունը հայտարարել է, որ իր նպատակն է Ադրբեջանի սահմաններից դուրս ստեղծել պաշտոնական Բաքվին հակադիր ծանրակշիռ ուժ: Նորաստեղծ կառույցը մտադիր է համակարգել Ադրբեջանի իշխանություններին ընդդիմացող բոլոր ուժերի գործունեությունը եւ Ադրբեջանում տիրող իրավիճակի վերաբերյալ պարբերաբար տեսակետներ ներկայացնել ՄԱԿ-ում, ԵԱՀԿ-ում, Եվրոպայի խորհրդում, Եվրախորհրդարանում եւ այլ միջազգային հարթակներում:Ադրբեջանցի վտարանդիները խոստանում են մշտական գլխացավանք ստեղծել Ադրբեջանի իշխանությունների համար:

Սպասվող բողոքի ցույցերի դեմն առնելու նպատակով Ադրբեջանի գլխավոր դատախազությունը Միլլի մեջլիսին առաջարկել է երկրի նախագահին վարկաբեկելու կամ նրա պատիվն ու արժանապատվությունը վիրավորելու համար ավելի խիստ պատիժներ սահմանել՝ ընդհուպ մինչեւ երկու տարվա ազատազրկում։ Ըստ էության, օրենքի խստացմամբ Իլհամ Ալիեւը ակնկալում է ամբողջապես լռեցնել իր հասցեին հնչող նույնիսկ ամենազգուշավոր քննադատությունը, որը թույլ տալու համար ներկայումս հնարավոր է ազատվել տուգանք վճարելու դեպքում։ Իսկ արտերկրում հանդես եկող քաղաքական վտարանդիներին լռեցնելու համար իշխանությունները սկսել են շինծու քրեական գործեր հարուցել Ադրբեջանում բնակվող նրանց ազգականների նկատմամբ, որպեսզի վերջիններս իրենց հարազատներին համոզեն դադարեցնել Ալիեւի վարչակարգի քննադատությունը արտարկրից։