Ռազմական ինստիտուտի 2 կուրսանտ դանակով հարձակվել են տաքսու վարորդի վրա, թալանել են ու խլել մեքենան

Շիրակի մարզի ընդհանուր իրավասության դատարանում Արտակ Թադևոսյանի նախագահությամբ ավարտվել է Արմեն Աջամյանի և Մովսես Սարգսյանի գործի դատական քննությունը:

22-ամյա Արմենն ու Մովսեսը ծառայակիցներ են, սովորել են Վազգեն Սարգսյանի անվան ռազմական ինստիտուտի 4-րդ կուրսում: Արմենը կոչումով կուրսանտ էր, իսկ Մովսեսը՝ կրտսեր սերժանտ:

Ըստ դատական ակտի՝ Արմեն Աջամյանը ծառայակից ընկերոջ՝ Մովսես Սարգսյանի հետ նախնական համաձայնության է եկել դանակների գործադրմամբ ավազակային հարձակում կատարելու վերաբերյալ:

2016 թվականի հունիսի 1-ին, ժամը 23-ն անց 15-ի սահմաններում Երևանից Գյումրի մեկնելու պատրվակով Երևանի 16-րդ թաղամասում նրանք քաղաքացիական հագուստով նստել են Էդգար Բ.-ի անձնական օգտագործման «Մերսեդես» մակնիշի ավտոմեքենան, պատվիրել են իրենց տեղափոխել Գյումրի:

Հասնելով Երևան-Գյումրի ավտոճանապարհի՝ Լանջիկ գյուղի հատվածին, գիտակցելով, որ տեղանքն ամայի է, «հարմար է» իրենց հանցավոր մտադրությունն իրականացնելու համար, արդեն հունիսի 2-ին, ժամը 00.05-ի սահմաններում նախապես պայմանավորված ազդանշանի համաձայն՝ Արմենն ու Մովսեսը հանել են իրենց մոտ եղած դանակները, հարձակվել են տաքսու վարորդի վրա:

Մովսեսը հետևի նստատեղից դանակը պահել է Էդգար Բ.-ի պարանոցին, իսկ Արմենն իր ձեռքի դանակը պահել է Էդգարի կրծքավանդակի աջ հատվածին: Այսպիսով՝ վարորդին զրկելով դիմադրելու հնարավորությունից, կյանքի և առողջության համար վտանգավոր բռնություն գործադրելու սպառնալիքով նրանք հափշտակել են վարորդի ոսկե մատանին՝ 50 հազար դրամ արժողությամբ , պարանոցի ոսկե շղթան՝ 327 հազար դրամ արժողությամբ, ու վարորդի մոտ եղած ամբողջ կանխիկ գումարը՝ 25 հազար 880 դրամի չափով:

Այնուհետև, իրենց հանցավոր գործողությունները շրջապատից թաքցնելու, դեպքի վայրն արագ լքելու նպատակով նախնական համաձայնությամբ Արմենն ու Մովսեսը Էդգար Բ.-ի «Մերսեդեսին» առանց հափշտակելու նպատակի ապօրինաբար տիրանալու համար Էդգարից պահանջել են իջնել մեքենայից:

Դրսում Մովսես Սարգսյանը շարունակել է դանակով սպառնալիքներ տալ Էդգարին, ապա նստել է նրա մեքենայի ղեկին, Արմենը՝ նրա կողքին, և մեքենատիրոջը՝ Էդգարին թողնելով դեպքի վայրում, երկուսով հեռացել են մեքենայով՝ դեպի Գյումրի:

Ձորակապ գյուղի մոտակայքում կորցրել են մեքենայի կառավարումը, դուրս են եկել ճանապարհի բանուկ մասից, վթարված մեքենան թողել են այդտեղ, իրենք ոտքով գիշերով շարունակել են ճանապարհը:

Մարալիկ քաղաքում նրանք փոխել են քաղաքացիական հագուստները, հագել են նախապես իրենց հետ վերցրած զինվորական դաշտային համազգեստները, բայց զգեստափոխվելը նրանց չի փրկել բռնվելուց:

Մոտակա գազալցակայաններից մեկի տարածքում նրանք հայտնաբերվել ու բռնվել են ոստիկանության Անիի բաժնի աշխատակիցների կողմից:

Արմեն Աջամյանին ու Մովսես Սարգսյանին մեղադրանք է առաջադրվել ՀՀ քրեական օրենսգրքի 175 հոդվածի 2-րդ մասի 1-ին, 4-րդ կետերով, 183 հոդվածի 3-րդ մասի 3-րդ կետով:

Դատարանում ամբաստանյալներն իրենց լիովին մեղավոր են ճանաչել: Գործը քննվել է արագացված ընթացակարգով:

Գործով իրեղեն ապացույց են ճանաչվել հանցագործության ժամանակ օգտագործված դանակները, որոնց վրա առկա են «ՊՆ 2014» և «ՊՆ 2002» փորագրությունները: Իրեղեն ապացույց է ճանաչվել նաև սև պլաստմասսայից խաղալիք ատրճանակը:

Երկու ամբաստանյալներն էլ, ըստ համապատասխան փաստաթղթերի, ուսման ընթացքում արժանացել էին խրախուսանքների…

Վազգեն Սարգսյանի անվան ռազմական ինստիտուտի անունը վերջին շրջանում հաճախ է հոլովվում դատական խրոնիկայում՝ որոշ կուրսանտների կատարած հանցավոր արարքների առումով: Մասնավորապես, նույն ռազմական ինստիտուտի չորս կուրսանտների վերաբերյալ ներկայումս գործ է քննվում Երևանի Ավան և Նոր Նորք վարչական շրջանների ընդհանուր իրավասության դատարանում՝ իրենց համակուսեցի կուրսանտին հենց ինստիտուտի ննջարանում դաժանաբար սպանելու մեղադրանքով:

Շիրակի մարզի ընդհանուր իրավասության դատարանը Արմեն Աջամյանին և Մովսես Սարգսյանին մեղավոր է ճանաչել ավազակային հարձակման և ուրիշի գույքին տիրանալու համար: Երկուսն էլ վերջին հաշվով դատապարտվել են 6 տարի 6 ամիս ազատազրկման:

Պատիժների սկիզբը՝ 2016 թվականի հունիսի 2-ից: