Իշխանություններն այս անգամ «գցեցին» իրենց վայելքների անվտանգությունն ապահովող ոստիկաններին

Ապրիլի 16-ին ոստիկանությունը նշում էր մասնագիտական տոնը, սակայն օրվա առթիվ, ի տարբերություն նախորդող տարիների, ոստիկանները պարգևավճար չստացան: Թեև վարչապետն անձամբ այցելեց ոստիկանություն, շնորհավորանքներ շռայլեց, խոսեց բարձր վարձատրվող ոստիկանության մասին ու էլի սիրուն բառեր, բայց մինչև օրվա վերջ ոստիկաններն այդպես էլ չստացան իրենց քարտերի վրա պարգևավճար «նստելու» մասին բաղձալի հաղորդագրությունը: Օրվա ավարտին հանրությունն իմացավ ոստիկանության՝ իշխանություններին ծառայելու հերթական խայտառակ «նվիրումի» մասին. ՁՊՎ տեղափոխելու ճանապարհին բռնության էր ենթարկվել ՔՊ պատգամավորին վիրավորելու համարձակություն ունեցած ձերբակալված անձը: Իրավապաշտպանների, լրագրողների, հանրության մեծամասնության արձագանքը պետք է, որ խաթարեր ՆԳ ղեկավարության տոնական տրամադրությունները. երևի: Բայց շարքային ոստիկանների տոնն ավելի շատ փչացրեց տասնամյակներ շարունակ մասնագիտական տոնին տրվող պարգևավճարի բացակայությունը:

Իշխանությունն ու ՆԳՆ ղեկավարությունը այս անգամ «գցեցին» իրենց վայելքների անվտանգության ապահովմանը ծառայող մարդկանց: Մեր աղբյուրները նշում են, որ բազմաթիվ ոստիկանների մոտ սա վրդովմունք ու հիասթափություն է առաջացրել: Իսկ առաջիկայում դեռ թեժ օրեր են սպասվում, ու դժվար է ասել՝ այս հիասթափությունն ինչ հետևանքներ կունենա:

Վերլուծաբաններն առաջիկայում փողոցային պայքար են կանխատեսում, և ոստիկանության ծառայողները դժվար թե մեծ ոգևորությամբ իրականացնեն իրենց գործառույթները՝ հիշելով, որ իրենց անձնուրաց ծառայությունը չգնահատվեց, և այդպես էլ բաղձալի ծնգոցով հաշվի համալրման հաղորդագրություն չստացան: