Ինչ հանցանքներ են կատարվել․ Քննչական կոմիտեն ու ՊՆ-ն շահագրգռված չեն պարզել

«Փաստ» օրաթերթը գրում է.

«Փաստի» խմբագրություն է դիմել քաղաքացի Ռոզա Ավագյանը՝ բողոքելով, որ չնայած 2014–ին ինքը ՀՀ քննչական կոմիտե հաղորդում է ներկայացրել այն մասին, որ Պաշտպանության նախարարության «Էրեբունի» օդանավակայանի պայմանագրային զինծառայող Իրինա Սարգսյանը զորամասից նախ 50 լիտր նավթ է հանել ու վաճառել իրենց, ապա խոստացել է որոշակի ժամանակի ընթացքում ընդհանուր առմամբ 1 տոննա թորած նավթ դուրս բերել օդանավակայանի տարածքից և դրա համար իրենցից վերցրել է 4000 ԱՄՆ դոլար, խաբեությամբ տիրացել է իրենց գումարին, իսկ գործը քննող քննչական մարմինները հիմնավորել են, որ նավթն էդտեղից դուրս չի եկել ու գործը կարճվել է:
«Ոչ մի քննություն չի նշանակվել «Էրեբունի» զինվորական օդանավակայանում, միայն հարցաքննվել են այն պաշտոնյաները, ովքեր եղել են անմիջապես Իրինա Սարգսյանի ղեկավար հանդիսացող անձինք, նրանք էլ, բնականաբար, հերքել են, որ կարող էր ինչ–որ անձ էդտեղից նավթ դուրս բերել և վաճառել: Այսինքն՝ պաշտոնատար անձանց հարցաքննել են, թե հնարավո՞ր է, որ ձեզնից այդ քանակով նավթ դուրս բերեն, ասել են՝ ոչ, որովհետև իրենք էլ կարող էին պատասխանատվության ենթարկվել»,– «Փաստի» հետ զրույցում ասաց գործով տուժող Ռոզա Ավագյանի ներկայացուցիչ Ստեփան Ոսկանյանը՝ շարունակելով. «ՊՆ–ն ու ՔԿ–ն ցանկացել են, որ գործը կոծկվի և նավթի թեման փակվի ու այլևս չշոշափվի, այլ դա դիտվի որպես գումարային քաղաքացիաիրավական հարաբերություն, ու գործի քննությունն այդ ուղղութամբ են տարել: Ոչ միայն նավթի խնդիրը չբացահայտվեց, այլ նաև՝ քննիչների ապօրինությունները, և արդյունքում քրեական գործի վարույթը կարճվեց»:
Ըստ փաստաբանի՝ իր վստահորդին՝ Ռոզա Ավագյանին, ՊՆ զինծառայող Իրինա Սարգսյանը, ով Ռոզա Ավագյանի եղբոր կինն է, առաջարկել է թորած նավթով պատրաստված բուսական դեղամիջոցով բիզնես սկսել, քանի որ Ռոզա Ավագյանը ևս օգտագործում է այդ դեղամիջոցը, ու խոստացել, որ հենց ինքն էլ նավթը կբերի զորամասից: Առաջին 50 լիտրն իսկապես բերել է, ապա խոստացել ժամանակի ընթացքում 1 տոննա նավթ հանել քիչ–քիչ ու դրա դիմաց վերցրել է 4 հազար դոլար, որն այժմ հրաժարվում է վերադարձնել:
ՔԿ–ն բողոքի հիման վրա հարուցել է քրեական գործ՝ Քրեական օրենսգրքի 178–րդ հոդվածի 1–ին մասի հատկանիշներով, սակայն գործի ընթացքում Իրինա Սարգսյանին ոչ մի մեղադրանք չի ներկայացվել: Փաստաբանի խոսքով՝ դրանից հետո Ռոզա Ավագյանը դիմում է զինվորական քննչական գլխավոր վարչություն, հաղորդում է ներկայացնում հանցագործության վերաբերյալ, հարուցվում է քրեական գործ, որի շրջանակներում բազմաթիվ ապօրինություններ են տեղի ունենում, Ռոզա Ավագյանին էլ քրեական գործի շրջանակներում ճանաչում են տուժող, հարցաքննում են բոլոր քննիչներին, որովհետև գործով վկա Գրիգոր Միքայելյանը, պարբերաբար բողոքներ է հայտնում քննիչների դեմ:
«Արդյունքում, 2016թ–ի փետրվարի 24–ին ՀԿԳ ավագ քննիչ Սամվել Սարգսյանի կողմից կայացվել է քրեական գործով քրեական հետապնդում չիրականացնելու և վարույթը կարճելու մասին որոշում, որը տուժող կողմը օրենքով սահմանված ժամկետում և կարգով բողոքարկել է ՀՀ զինվորական դատախազություն: Բացի այդ, նա էլ ամեն ինչ անում է, որ գործը փակվի և որոշ ժամանակ առաջ գործով վկա Գրիգոր Միքայելյանին կանչում և առաջարկում է վերցնել իր մոտ առկա 2000 դոլարը, որպես պարտքի գումար: Գրիգոր Միքայելյանը հրաժարվում է վերցնելուց՝ ասելով, որ իրենից խաբեությամբ գումար է վերցրել միայն Իրինա Սարգսյանը ու հենց նա է իրեն պարտք: Դրանից հետո գործը կարճվում է, հիմա արդեն այդ գործը Վճռաբեկ դատարանի քննության փուլում է»:
Քննության ընթացում անհետանում է նաև Ռոզա Ավագյանի տանից արձանագրությամբ առգրավված 50 լիտր նավթը և քննության վերջում պարզվում է, որ 50 լիտր նավթը չկա, ընդամենը 7 լիտր է:
«Բացի այդ, փորձաքննություն է կատարվում, և ըստ փորձագետի եզրակացության՝ այդ նավթը չի հանդիսանում ավիացիոն ռեակտիվ շարժիչների համար վառելիք, այլ ընդամենը դիզելային վառելիք է: Գրիգոր Միքայելյանը իր մոտ մնացած 1 լիտր չափաբաժինը ներկայացնում է անկախ փորձագիտական կենտրոն լաբորատորիա և տալիս են մեկ այլ եզրակացություն, որ այն հանդիսանում է ավիացիոն վառելիք: Մենք միջնորդել ենք, որ հակասական եզրակացությունների առկայության պարագայում արվի կրկնակի փորձաքննություն, ինչը մերժվեց»,– ասաց փաստաբանը:

Շարունակությունը` «Փաստ» օրաթերթի այսօրվա համարում: