«Ախչի, ասում ա գնանք իրանց դաշինքն ընտրենք, որ կրեն հա՞»․ կինը՝ քարոզարշավի ժամանակ

Ընտրելու ենք ում ուզում ենք, կաշառք էլ տան վերցնելու ենք: Այսօր՝ մարտի 20-ին, Աբովյան քաղաքում «Ելք» դաշինքի անդամների քարոզարշավի ժամանակ նրանց դիմելով ասաց խանութներից մեկի վաճառողուհին:

NEWS.am-ի թղթակիցը հայտնում է, որ Աբովյանի փողոցներում «Ելք» դաշինքի թեկնածուների նկատմամբ վերաբերմունքը տարբեր էր. «Էս կոմունիստնե՞րն են»,- հետաքրքրվեց աբովյանցիներից մեկը: Վարսավիրանոցի աշխատակցուհիներից մեկն էլ Նիկոլ Փաշինյանի հետեւից ընկերուհուն դիմեց. «Ախչի, ասում ա գնանք իրանց դաշինքն ընտրենք, որ կրեն հա՞…»:

Մինչ «Ելքի» թեկնածուներ Նիկոլ Փաշինյանն ու Արամ Սարգսյանն իր թիմով արագ –արագ կանցնեին Աբովյանի փողոցով, նրանց հետեւից վազեց մի կին, հետաքրքրվելով թե այդ քարոզարշավի ղեկավարն ով է: Նրան պատասխանեց Սասուն Միքայելյանը եւ հետաքրքրվեց թե ինչ խնդրով է դիմում: Կինը պատմեց, որ երկար տարիներ բնակվում է Աբովյան քաղաքում, անձնագիր ունի, բայց փախստական է եւ քվեարկողների ցուցակում իր անունը չի գտնում, սակայն իր մահացած հարեւանուհու անունը կա: Սասուն Միքայելյանը վերցրեց տիկնոջ հեռոխոսահամարը եւ խոստացավ այսօր այդ հարցին լուծում տալ եւ հենց այս երեկո տեղյակ պահել նրան:

«Ելք» դաշինքի թեկնածուներին քայլերթին հետեւող մի կին ողջ ընթացքում պարբերաբար միջամտում էր, որ ոչ մի ելք էլ չկա: NEWS.am-ի լրագրողին հետ զրույցում կինը մանրամասնեց իր դժգոհությունը. «Ոչ ոքի էլ չենք հավատում, ինչ ելք, ինչ է փոխվում այսքան տարի ընտրություններից հետո: Ժողովուրդը կոտորվում է, չի կարողանում ապրել. ոչ աշխատանք կա, ոչ փող: Ո՞ւմ հավատաս, կարո՞ղ եք ասել: Կմասնակցեմ ընտրությանը, բայց ոչ մեկին չեմ ընտրելու: Ո՞վ կա, որ ընտրես: Հենց էտ ա, որ ելք չկա»,-ասաց կինը:

Ելքի անդամներից մեկն էլ փորձեց հանդարտեցնել կնոջը. «Մի կոտրվեք»: «Ես չեմ էլ կոտրվում»,- թիկունքից նետեց կինն ու դաշինքի խումբը ճեղքելով անցավ, գնաց: