«Ես խոսքը կտուր չեմ գցում». Վարչապետը կոշտ խոսակցություն է ունեցել քաղաքապետի հետ

Կառավարությունը դեկտեմբերին բոլոր համայքներին մեթոդաբանություն է ուղարկել, որով համայնքապետերը պետք է համայնքի 5 տարվա զարգացման ծրագիր ներկայացնեն: Այս մասին այսօր՝ մարտի 18-ին, Ճամբարակում ընտրողների հետ հանդիպմանն ասաց ՀՀԿ փոխնախագահ, վարչապետ Կարեն Կարապետյանը:

«Համայնքապետն ընտրովի մարդ է եւ ծրագիրը ներկայացնելիս պետք է այն քննարկի ավագանու անդամների հետ, որոնք ձեր ներկայացուցիչներն են: Այսինքն՝ պետք է ձեզ հետ քննարկի իր ծրագիրը: Համայնքապետը պետք է ներկայացնի այսօրվա իրավիճակը, թե ինչքան է միջին աշխատավարձը, ինչքան է գործազրկությունը, քանի տոկոսն է արտագաղթում, ինչու է արտագաղթում եւ այլն, եւ այլն: Եվ համայնքապետը պետք է ներկայացնի ծրագիր, թե ինչ է պետք, որ համայնքն այս 5 տարվա ընթացքում զարգանա: Մենք այդ հարցում նրան մենակ չենք թողնի, բայց ինքը պետք է բեռի մի մասն իր վրա վերցնի, իսկ մենք կօգնենք: Օրինակ՝ ասի, որ ինձ երկու կաթի գործարան է պետք, ես սա եմ անում, պարոն վարչապետ, խնդրում եմ այս մասով էլ դուք օգնեք»,- ասաց Կարեն Կարապետյանը:

Վարչապետի խոսքով՝ պետք է եռաստիճան համակարգը գործի. կառավարություն, մարզպետարան, համայնքապետարան: Միայն այդ դեպքում է հնարավոր հաջողության հասնել: Վարչապետը հիշեցրեց, որ Երեւանում ավելի լավ չեն պատկերացնում Ճամբարակի խնդիրերը, քան հենց ճամբարակցին ու նրա քաղաքապետը: Սա նշանակում է, որ զարգացման ծրագիրը շատ կարեւոր է: Նա բոլորին հորդորեց անպայման ծանոթանալ ծրագրին:

«Ես ուզում եմ, որ դուք համոզված լինեք, որ ես խոսքը կտուր չեմ գցում, չեմ ցրում, բայց որպեսզի հասկանանք, թե ով ինչ է անում, պետք է խնդիրը գույքագրենք, տարածքի առավելությունները գնահատենք, որից հետո սկսենք աշխատել: Մի բան հիշեք, քաղաքապետը պետք է իր համայնքի դարդուցավն իմանա, բոլոր խնդիրներին ծանոթ լինի: Կարող է՝ ձեր քաղաքապետը բարի մարդ է, բոլորիդ գրկում, գուրգուրում է, բայց կառավարման համակարգը չկարողանա փոխել, զարգացնել համայնքը: Այդ դեպքում տեղից չենք պոկվելու»,- հավելեց Կարեն Կարապետյանը:

Վարչապետը նաեւ վստահեցրեց, որ այսօր կոշտ խոսակցություն է ունեցել քաղաքապետ Յուրիկ Ավալյանի հետ ու հանձնարարականներ տվել:

Նշենք, որ ՀՀԿ նախընտրական քարոզարշավն իրականացնում է անձամբ Կարեն Կարապետյանը, որը, սակայն կուսակցության համապետական ցուցակում ընդգրկված չէ: Այսօր Ճամբարակում քարոզարշավի ընթացքում նրան ուղեկցում էին մշակույթի նախարար Արմեն Ամիրյանը եւ «Արաբկիր» ԲԿ-ի տնօրեն Արա Բաբլոյանը, որոնք ՀՀԿ ընտրացուցակի առաջին տասնյակում են ընդգրկված: