«Եթե ես նման բան անեմ՝ անբարոյական եմ». Վահրամ Բաղդասարյան

ԼՐԱԳԻՐ / Վանաձորի Ջունգլիներ կոչվող թաղամասի և Քիմպրոմի հանրակացարաններում բնակվող ընտանիքները, մեր ունեցած տեղեկություններով, մոտ երկու ամիս առաջ 30 հազարական դրամ գումար են ստացել ԱԺ ՀՀԿ խմբակցության ղեկավար Վահրամ Բաղդասարյանից: Ըստ լուրերի՝ այդ գումարը ՀՀԿ ռեյտինգային ընտրակարգով պատգամավորի թեկնածու առաջադրված Վահրամ Բաղդասարյանը նախօրոք է բաժանել սոցիալապես անապահով այս խավին, որպեսզի խորհրդարանական ընտրություններում ձայն տան իրեն: Այս հանրակացարաններում ապրում են ծայրահեղ աղքատ ընտանիքներ:
Վահրամ Բաղդասարյանը մեզ հետ զրույցում նախ հետաքրքրվեց. «Դուք գիտե՞ք, թե ինչ ընտանիքներ են ապրում այնտեղ»: Այնուհետև չհերքեց, որ հանրակացարանների բնակիչներին կաշառել են, բայց ասաց, որ ինքը կապ չունի դրա հետ:
«Բայց եղել է նման դեպք, ճիշտ են ասում, բայց ում հետ է կապված, խնդրում եմ ճշտեք: Կարող ա կարտոշկա, բրինձ են բաժանել կամ գումար: Ես չգիտեմ քանակները, որովհետև նման գործով չեմ զբաղվում»,- Lragir.am-ին ասաց Բաղդասարյանը:
Նա նշեց, որ բոլոր մարզերում ու քաղաքներում մարդկանց հետ հանդիպումների ժամանակ ինքը հորդորում է, որ պետք է զերծ մնալ նման գործողություններից, իսկ կատարողները պետք է բացահայտվեն:
«Եվ եթե այս պառլամենտը պետք է նման ձևով ձևավորվի, ուրեմն 10-15 տարի մենք ունենալու ենք լուրջ խնդիրներ: Իմ անվան հետ կապել նման բան... այդ մարդիկ պարզապես անբարոյական են: Եթե ես եմ անում, ես եմ անբարոյական: Երկու ամիս առաջ ես նույնիսկ չեմ իմացել, որ ռեյտինգայինով քվեարկվելու եմ: Եթե նման դեպք լինի, ես անմիջապես հրաժարական կտամ ու չեմ մասնակցի ընտրական գործընթացին: Եթե նման արարքը հաստատող փաստեր լինեն, պետք է քրեական գործ հարուցվի, ես էլ պետք է հրաժարական տամ: Եթե մեկ հոգի կգա ու կասի, որ ես նույնիսկ գումար եմ առաջարկել, ոչ թե տվել... Եթե ես նման բան անեմ, անբարոյական եմ», ասաց Վահրամ Բաղդասարյանը: