Սերժ Սարգսյանի նախազգուշացումը Մոսկվայից

ՀԱՅԵԼԻ / Նախագահ Սերժ Սարգսյանի մոսկովյան այցի առանցքը Արցախի խնդրի առնչությամբ կոնկրետ նրբերանգներով է աչքի ընկնում: Սերժ Սարգսյանը` ելույթ ունենալով Մոսկվայի միջազգային հարաբերությունների ինստիտուտի ուսանողության և պրոֆեսորադասախոսական կազմի առջև հայտարարել է, որ Հայաստանը, որպես Լեռնային Ղարաբաղի ժողովրդի անվտանգության երաշխավոր, ստիպված է ջանքեր գործադրել տարածաշրջանում հավասարակշռությունը պահելու և նոր էսկալացիա թույլ չտալու համար:
«Մինչև 2016թ-ը մեր գործընկերները մեզ վստահեցնում էին, որ պատերազմական քարոզչությամբ ու հակահայկական հիստերիայով Բաքուն իր ներքին քաղաքական խնդիրներն է լուծում: 2016թ-ի ապրիլին Ադրբեջանի կողմից Լեռնային Ղարաբաղի դեմ սանձազերծված քառօրյա ռազմական արկածախնդրությունը Բաքվի հենց այդ բազմամյա միլիտարիստական քարոզչության մարմնավորումը դարձավ` հակադրվելով սեփական հողի վրա սեփական ճակատագիրն ազատ տնօրինելու՝ Արցախի ժողովրդի ցանկությանը»,- Մոսկվայի միջազգային հարաբերությունների պետական ինստիտուտում հայտարարել է Սերժ Սարգսյանը: Ի դեպ, ՄԳԻՄՕ –ում, որտեղ նա արել է այս հայտարարությունը նրան շնորհվել են այդ ինստիտուտի պատվավոր դոկտորի կոչում:
Սերժ Սարգսյանը նաև նշել է, որ ապրիլյան պատերազմից հետո Վիեննայում և Սանկտ Պետերբուրգում կայացած գագաթնաժողովների ընթացքում հստակ ընդգծվել է Լեռնային Ղարաբաղի կոնֆլիկտի հարցում՝1994-1995 թվականների եռակողմ անժամկետ համաձայնագրերի խստագույն պահպանման, հակամարտության գոտում հրադադարի ռեժիմի խախտման միջադեպերի հետաքննության մեխանիզմի և ԵԱՀԿ դիտորդների քանակի ավելացման անհրաժեշտությունը:
«Պայմանավորվածություն ձեռք բերվեց, սակայն Ադրբեջանը, ինչպես և նախկինում, խուսափում է այս պայմանավորվածությունների կատարումից»,- ընդգծել է ՀՀ նախագահը:
Ավելի վաղ Սերժ Սարգսյանը հարցազրույց է տվել իսպանական EFE լրատվական գործակալությանը, որտեղ պատասխանելով իսպանացի լրագրողի հարցին` հայտարարել, որ Հայաստանը չի ճանաչում Արցախի անկախությունը միմիայն մեկ պատճառով , որպեսզի բանակցային գործընթացները շարունակվեն , իսկ եթե Ադրբեջանը լայնածավալ պատերազմ սկսկի Արցախի դեմ,ապա Հայաստանը միանշանակ և անմիջապես ճանաչելու է Արցախի անկախությունը:
Մոսկովյան այցի առաքելությունը թերևս ապրիլի 1-ին ընդառաջ՝ Սերժ Սարգսյանի կողմից արտաքին ճակատում արված նախապատրաստական քայլ է: Վերջին շրջանում բավական ինտենսիվ տեղեկություններ են ստացվում, որ ադրբեջանական կողմը կրկին սկսել է շփման գծի մոտակայքում զինուժ և ռազմական տեխնիկա կուտակել: Ադրբեջանի նախագահ Ալիևն իր ոճի մեջ է և այդ իմաստով միանգամայն ենթադրելի է, որ նա մեկ տարի առաջ իրականացրած ռազմական անհաջող ագրեսիան կարող է և կրկնելու ցանկություն ունենալ: Անցյալ տարի սանձազերծված պատերազմական գործողությունները կասեցվեցին Մոսկվայի միջնորդությամբ, բայց միջնորդների կողմից կոնկրետ գործողություններ և հասցեական գնահատականներ դրան չհաջորդեց: Հակառակը՝ Մոսկվան շատ պարզ հայտարարեց, որ շարունակելու է զենք վաճառել Ադրբեջանին:
Նման պայմաններում թերևս Սերժ Սարգսյանին այլ բան չէր մնում, քան հայտարարել, որ նախ Հայաստանն Արցախի խաղաղության պահպանման երաշխավորն է և երկրորդ, եթե Մոսկվան ագրեսիայի նոր նախաձեռնությունները զսպելու քայլեր չկատարի, ապա պատերազմի վերսկսման պարագայում Հայաստանը կճանաչել Արցախի անկախությունը: Հստակ է, որ Արցախի հարցում Կրեմլի դերակատարումն անկարևոր չի կարող լինել և այս առումով Սերժ Սարգսյանի ակնարկը, թե տարիներ շարունակ << մեր գործընկերները մեզ վստահեցնում էին>>, որ պատերազմական քարոզչությամբ ու հակահայկական հիստերիայով Բաքուն իր ներքին քաղաքական խնդիրներն է լուծում, ունի կոնկրետ հասցեատեր: Դա Կրեմլն է: Հետաքրքիր է, թե այս անգամ ի՞նչ են ասել Կերմլից, առավել ևս, որ Սերժ Սարգսյանից առաջ այնտեղ հյուրընկալվել էր Թուրքիայի նախագահը: