«Մանվելիզմն ի՞նչ կապ ունի ՀՀԿ-ի հետ»․ Հրաչիկ Աբգարյանն առաջադրվել է ՀՀԿ ցուցակով

«Փաստ» օրաթերթը գրում է.
Էջմիածնում «մանվելիզմի» դեմ պայքար հռչակած Էջմիածնի նախկին քաղաքապետ Հրաչիկ Աբգարյանը, ով աշնանը Էջմիածնի քաղաքապետի ընտրություններից հետո քրեական վեճի մեջ էր գեներալ Մանվել Գրիգորյանի տղայի հետ, այժմ առաջադրվել է Արմավիրում որպես ՀՀԿ ռեյտինգային թեկնածու: Նույն ՀՀԿ–ից համամասնականով առաջադրվել է նաև գեներալ Մանվել Գրիգորյանը:
Հիշեցնենք, որ Էջմիածնի քաղաքապետի ընտրություններից մեկ օր առաջ քաղաքում կրակոցներ էին հնչել: Միջադեպի մասնակիցներն էին գործող քաղաքապետ Կարեն Գրիգորյանը՝ գեներալ Մանվել Գրիգորյանի որդին, ու քաղաքապետի թեկնածու Արթուր Թումանյանը: Միջադեպի արդյունքում Հրաչիկ Աբգարյանը վնասվածքներով տեղափոխվել էր հիվանդանոց: Միջադեպի առթիվ հարուցվել էր քրեական գործ՝ սպանության փորձի, խուլիգանության և ապօրինի զենք–զինամթերք կրելու, պահելու, օգտագործելու հատկանիշներով:
Ուշագրավ է նաև այն, որ ընդամենը մի քանի ամիս առաջ Հրաչիկ Աբգարյանը անդամագրվել էր «Հայկական վերածնունդ» կուսակցությանը: Ներկայացնում ենք «Փաստի» զրույցը Էջմիածնից ՀՀԿ ռեյտինգային թեկնածու Հրաչիկ Աբգարյանի հետ:

– Պարոն Աբգարյան, Դուք ընդամենը ամիսներ առաջ անդամագրվել էիք «Հայկական վերածնունդ» կուսակցությանը, ինչպե՞ս եղավ, որ հիմա էլ ՀՀԿ–ից եք առաջադրվել:
– 90–ական թվերին, երբ ՀՀԿ–ն ստեղծվում էր, էս մարզում ՀՀԿ–ն ես եմ ստեղծել: Ինձ «Հայկական վերածնունդից» առաջարկություն արեցին, իրանք էլ նորմալ մարդիկ էին, ասեցի համագործակցենք, հետո որ խորացավ, արդեն ստիպված պետք ա քայլեի ավելի ճիշտ: Ասացի՝ ինչ տարբերություն, հայ ենք, կարևորը՝ թուրքի կողմը չգնանք, հայրենասեր լինենք: Կաշին փոխելը մի քիչ դժվար ա, վերջում հասկացա որ... Էսօրվա պահով կուսակցությունները կապ չունեն, ազգը փրկելու խնդիր կա, մեզ պետք է միասնական դուրս գալ էս ամեն ինչից:
– Կարծում եք՝ կուսակցություն փոխելը անհասկանալի չի՞ լինի ընտրողների համար:
– Իհարկե, իմ ընտրողները կհասկանան: Ես 90 թ.–ից ՀՀԿ–ի անդամ եմ... Ինձ «Հայկական վերածնունդից» առաջարկեցին, իմ համար տարբերություն չկար, կարևորը որ հայրենասեր լինես: Էսօր պետք ա կուսակցությունները հաշվի չառնենք, պետք ա ժողովրդի խնդիրները միասնական լուծենք: Էս երկիրը մենակ միասնությունն ա փրկելու:
– Ասել է թե՝ «մանվելիզմի» դեմ Ձեր պայքարն արդեն անցյալո՞ւմ է: Այժմ գեներալ Մանվելի հետ միասնության համա՞ր եք պայքարում:
– Ես սկզբունքներ ունեմ, ապրելակերպ ունեմ: Մանր–մունր բաները գլոբալ հարցերի հետ պետք չի խառնել: Ես Աբգարյան Հրաչն եմ, ինձ բոլորն էլ ճանաչում են, ես չեմ կարա կաշի փոխեմ: Հիմա «պրոստո» էդքան մանրանալ չի կարելի:
– Քանի որ Դուք կոնֆլիկտ ունեիք, ո՞նց եք հիմա նույն թիմում աշխատում:
– Ես պրոբլեմ չունեմ, ես իմ գործն անում եմ, իմ աշխատանքն անում եմ, ի՞նչ կապ ունի: Նորմալ աշխատանք ենք անում, ազգիս համար մի բանի հասնենք գոնե: Մենք տենց չենք առնչվում: Մենք մեր աշխատանքն անում ենք, տենց չենք շփվում, ինչի՞ մասին է խոսքը: Նորմալ ա: Էսօր ընդհանուր խնդիր ա, ես անձնական մի շարք խնդիրներ դրել եմ մի կողմ, քանի որ մենք շատ կարևոր խնդիր ենք ուզում լուծել ազգիս համար՝ ազգի, ժողովրդի, տնտեսության վիճակը բարելավենք: Պետք ա մարտական լինենք: Ազգի փրկությունը մեզնից ա կախված, ինձ թվում ա, մի շարք անձնական խնդիրներ պետք է դնենք մի կողմ՝ նպատակին հասնելու համար, որովհետև ազգիս վիճակը ծանրացել ա, պետք ա թեթևացնել:
– Իսկ Ձեր ու Կարեն Գրիգորյանի միջև քրեական գործն ի՞նչ եղավ:
– Ես ընդհանրապես տեղյակ չեմ ոչ մի բանից: Ինչքան գիտեմ՝ փակվել ա էդ գործը:
– Կոնկրետ Էջմիածնում ՀՀԿ–ին սատարելով, ի՞նչ եք ուզում փոխել: Չէ՞ որ էդտեղ «մանվելիզմը» շարունակվելու է, եթե ՀՀԿ–ն հաղթի:
– «Մանվելիզմն» ի՞նչ կապ ունի ՀՀԿ–ի կամ մյուսի հետ, էնտեղ մենակ Մանվել չի, հազարավոր մարդիկ կան: Իսկ ՀՀԿ–ում մարդիկ արդեն գտել են, որ պետք է որոշակի փոփոխություններ անել, որ շատ բաներ փոխվեն, և մենք պետք ա միասնական լինենք, ամբողջ ազգովս՝ կապ չունի՝ ՀՀԿ–ական ա, թե դաշնակցական ա: Պետք ա էս երկիրը փոխենք:
– Տեղեկություն կա, որ Էջմիածնում որոշակի լարվածություն կա ՀՀԿ թեկնածուների միջև, քանի որ իրար տարածք են մտնում՝ փորձելով միմյանց ձայները խլել: Ձեզ չե՞ն խանգարում:
– Բացարձակ, ինձ ոչ մեկը չի կարա խանգարի: Ես որտեղ էլ մտնեմ, ինձ ոչ մեկը չի կարա ասի՝ ինչի ես մտնում: Ով էլ ուզենա, կարա գա մեր տարածքները, տենց խնդիր չկա, ի՞նչ տարբերություն:
– Մանվել Գրիգորյանի, Սեյրան Սարոյանի կողմնակիցները Ձեզ չե՞ն խանգարում:
– Ոչ, իրանք ինձ օգնում են ամբողջ օրը: Որ չեն խանգարում, ուրեմն օգնում են: Ես հանգիստ իմ քարոզարշավն անում եմ: Շտաբն արդեն ձևավորել ենք: Մարդիկ գալիս են, մտածում ենք` որ գյուղից սկսենք: Հենց հիմա Ռուսաստանից ընկերներս են եկել, մտածում ենք գյուղատնտեսական ծրագրեր ներկայացնենք:
– Իսկ ՀՀԿ–ն Ձեզ ինչպե՞ս է սատարում:
– Ինձ բոլոր կուսակցություններն էլ սատարելու են, կապ չունի՝ ՀՀԿ, թե Դաշնակցություն: Մենք հայաստանցի ենք: Հայաստանցին ինքը արժեք ա, պետք ա հայաստանցուն սիրել, կապ չունի՝ դաշնակ, թե ՀՀԿ–ական: Ես դաշնակ էլ ընկեր ունեմ, հնչակ էլ ունեմ, ՀՀԿ–ական էլ ունեմ: Կարևորը՝ մարդ լինի, կուսակցությունը կապ չունի:
– Իսկ Մանվել Գրիգորյանի կամ Կարեն Գրիգորյանի հետ այս ընթացում չե՞ք հանդիպել:
– Չէ, բախտ չի վիճակվել, ո՞ւր ա ինձ տենց բախտ՝ հանդիպեի: