Պավել Մանուկյանին «ալկաշ» անվանելու ու «Սասնա ծռերի» հանձնվելու մասին

«ԱՌԱՎՈՏ»

«Սասնա ծռերի» գործողությունները լակոտություն համարած ու Ժիրայր Սեֆիլյանի թիկնապահ ներկայացած Գեղամ Սահակյանը երկար լռությունից հետո որոշեց արձագանքել իր հարցազրույցի շուրջ ստեղծված աղմուկին ու իր հասցեին ուղղված քննադատությանը: Այս անգամ նա խուսափեց Սեֆիլյանի թիկնապահ ներկայանալուց, ավելի համեստ, պարզապես որպես «Հիմնադիր խորհրդարանի» համակիր ներկայացավ: Գեղամ Սահակյանը նախ շտկեց իր ավելի վաղ արած նկատառումը, երբ Պավել Մանուկյանին որակել էր «ալկաշ». «Ճիշտ է այդ բառին մարդիկ ուրիշ ձեւ են նայում, բայց մի ալկաշ էլ ես եմ էլի. Եթե մի կամ երկու բաժակ խմում ես, չի նշանակում, որ «ալկաշ» ես, ես դա նկատի ունեի: Պավլիկի տանը եղել եմ, նրա հետ հաց եմ կերել, ճանապարհ եմ գնացել, այնպես չէ, որ այդ մարդկանց նկատմամբ թշնամաբար եմ տրամադրված: Սրտիս դարդ է, որ այդ մարդիկ հիմա էնտեղ են»: Գեղամ Սահակյանի առաջին հարցազրույցից հետո, «Հիմնադիր խորհրդարանի» անդամ Սյուզան Սիմոնյանը նրան որակեց KGB-ի գործակալ, ինչին անդրադառնալով՝ Գեղամ Սահակյանն ասաց. «Ուրիշ բան ինձ ասեր դատված, խուլիգան, ես կընդունեի, որ այդ մարդն եմ, բայց որ ասում է, թե ես KGB-ի գործակալ եմ, թող իր շրջապատին նայի: Ես չեմ սողոսկել իրենց շարքերը, ինձ Ժիրոն է իր հետ ծանոթացրել, ես 2008-ի դեկտեմբերից Ժիրոյին ճանաչում եմ, այն ժամանակ «Սարդարապատ» շարժում էր, ոչ «Հիմնադիր խորհրդարան» կար, ոչ էլ «Նախախորհրդարան»: Մեր զրուցակիցը նաեւ զարմացել է «Ժառանգություն» կուսակցության փոխնախագահ Արմեն Մարտիրոսյանի ազատության մեջ հայտնվելու լուրից. «Արմեն Մարտիրոսյանին գրավի դիմաց ազատ արձակելը անհասկանալի է, կներեք… Ինչ է տղա էր, չդիմացա՞վ մի քանի օր, բա որ Անդրիասի տեղը լիներ, ինչ կաներ: Մեկ է իրեն ազատելու էին, եթե նեղության չեն դիմանում, լենության չեն կարող դիմանալ»: Մեր դիտարկմանը, թե «Սասնա ծռեր» խմբի շատ անդամների համար, այդ թվում Անդրիաս Ղուկասյանի համար էլ են գրավ առաջարկել, դատարանն է որոշել՝ ում ազատ արձակի, ում՝ չէ, Գեղամ Սահակյանը շարունակեց. «Արմենը կարող էր դիմանալ, ինքը էն տղեն չէր, որ գրավով բաց թողնեին, սիրուն չի նայվում, որ փող են տալից, ազատում»: Գեղամ Սահակյանը անդրադառնալով «Սասնա ծռերի» գործողություններին, նրանց հանձնվելուն ասաց. «Դուք շատ լավ գիտեք, թե Ժիրայրին ինչ հոդվածով են վերցրել՝ շենք, շինություններ գրավելու: Այդ մարդիկ գնացին այնպիսի տեղ գրավեցին, որ էդ էլ ջարդեցին Ժիրոյի վրա, որ իրոք, Ժիրոն նման բան որոշել է, «Սասնա ծռերն» ապացուցեցին դա»: Մեր հարցին՝ Ժիրայր Սեֆիլյանն ինչպես կարող էր տեղյակ չլինել, թե իր ղեկավարած նախաձեռնության անդամները նման բան էին նախաձեռնել, Գեղամ Սահակյանը պատասխանեց. «Ես կասկածում եմ, որ նա տեղյակ լիներ, եթե տեղյակ լիներ, թույլ չէր տա»: Մեր հարցին՝ իսկ ինչու այդ դեպքում Ժիրայր Սեֆիլյանը հայտարարություն չարեց, թեկուզ դիտողություն կամ քննադատություն չեղավ, ի վերջո, «Սասնա ծռերը» Ժիրայր Սեֆիլյանին ազատ արձակելու պահանջով էին սկսել իրենց գործողությունները, պատասխանեց. «Ուրեմն մինչեւ վերջ էլ էդ պահանջով պետք է գնային. Ոչ թե ասեին՝ կմեռնենք, բայց չենք հանձնվի ու հանձնվեն: Խոսելուց առաջ մարդ պետք է մտածի՝ ինչ է խոսում: Հետո սկսեցին նախագահի հրաժարական պահանջել, եթե գնում ես մի ճանապարհով, ապա փորձիր մինչեւ վերջ այդ ճանապարհդ պահել: Նրանք ապակողմնորոշված էին, մեկը մի բան էր ասում, էն մեկը՝ ուրիշ բան»: