Ով է կանգնած Բաթումիի անկարգությունների ետևում

Աջարիայի մայրաքաղաքում երեկ տեղի ունեցած իրադարձությունները շոկային իրավիճակ են ստեղծել Վրաստանում և դարձել բուռն քննարկումների և մեկնաբանությունների պատճառ...Միակ հարցը, որը հիմա բոլորին հետաքրքրում է` ով է կանգնած Բաթումի անկարգությունների հետևում: Այս հարցին փորձել են պատասխանել Վրաստանի հայտնի քաղաքական գործիչները, քաղաքագետները, վերլուծաբանները և այլն...
Իշխանամետ ուժերը Բաթումի դեպքերի մեջ փնտրում են Վրաստանի նախկին նախագահ Միխեիլ Սաակաշվիլիի «մատը»: Այդ վարկածը Վրաստանի Առաջին Ալիքի եթերում բարձրաձայնել է Վրաստանի խորհրդարանի պատգամավոր, իշխանամետ «Վրացական Երազանք» խմբակցության անդամ Իրակլի Թալաքվաձեն: Ավելի ուշ իշխող «Վրացական երազանք» կուսակցության կողմից տարածված հաղորդագրության մեջ Սաակաշվիլիի «Միացյալ ազգային շարժում» կուսակցությունը դիտարկվել է որպես Բաթումում անկարգություններ կազմակերպող միակ մեղավորը:
Կան փորձագետներ, ովքեր «միջազգայնացնում» են Բաթումում տեղի ունեցածը: «Хроника+» թերթի գլխավոր խմբագիր Էլիսո Քիլաձեն հայտարարել է, որ Աջարիայի մայրաքաղաքում տեղի ունեցածի հետևում կանգնած են Ռուսաստանը և Վրաստանի նախկին վարչապետ Իրակլի Ղարիբաշվիլին: Քիլաձեն փաստերի մի շարան է առաջ բերում՝ փորձելով ապացուցել իր վարկածի ճշմարտությունը: Ըստ Քիլաձեի` հրաժարականից հետո Ղարիբաշվիլին գաղտնի հանդիպել է ՌԴ նախագահ Վ. Պուտինի օգնական Սուրկովի հետ: Հանդիպմանը Ղարիբաշվիլին հրահանգ է ստանում սադրանքների միջոցով լարել իրավիճակը Վրաստանում, որի կազմակերպիչները պետք է լինեին իր մարդիկ: Ու այստեղ, ըստ Քիլաձեի, ըստ Կարսի պայմանագրի, հայտնվում են ռուսները: Քիլաձեն նաև կասկածում է, որ Ղարիբաշվիլիի թիկունքում կանգնած է Վրաստանի ամենահարուստ մարդը՝ նախկին վարչապետ Բ. Իվանիշվիլին: «Չեք ցանկանում Եվրոպա, ուզու՞մ եք Աբխազիայով անցնող երկաթուղի և կոնֆեդերացիա: Չի՛ ստացվի»,- եզրափակում է իր վերլուծությունը "Хроника+" թերթի գլխավոր խմբագիրը...
Որոշ վրացական ԶԼՄ-ներ էլ տարածում են այն կարծիքը, որ Բաթումի անկարգությունների հետևում կանգնած է «գողական աշխարհը»: Այս մասին իր վերլուծականում է գրում «Էքսպրեսնյուս» գործակալությունը: Որպես աղբյուր նշվում են Բաթումի բնակիչներն, ովքեր արդեն մարտի 10-ից տեղյակ են եղել, որ քաղաքում անկարգություններ են տեղի ունենալու: «Մեկ օր առաջ թաղերի «նայողներին» են կանչել և հրահանգել 10-15 հոգի տրամադրել ոստիկանությանը դիմադրելու համար»,- ասել է քաղաքի բնակիչներից մեկը: Իսկ մի այլ բաթումցի էլ ասել է, որ հիմնականում հավաքել են հանցավոր աշխարհի հետ կապ ունեցող մարդկանց, այդ թվում նաև բազմաթիվ հանցագործությունների համար բանտերում պատիժ կրածներին ու հրահանգել են` որպես հավաքատեղի, լինել Աջարիայի Ոստիկանության գլխավոր վարչության շենքի մոտ:
Հ.Գ. Բաթումի դեպքերը ցույց տվեցին, որ Վրաստանը բավական խոցելի երկիր է և ցանկացածը՝ լինի դա նախկին նախագահը, ՌԴ-ը կամ հանցավոր աշխարհն, անտեսելով երկրի շահերը, կարող են սեփական նապատակին հասնելու համար սրել ներքին իրավիճակը և Վրաստանը կանգնեցնել անդունդի եզրին, որի հետևանքները կարող են անկանխատեսելի լինել ոչ միայն Վրաստանի, այլև Հայաստանի համար:

Գագիկ Համբարյան