Կենսաթոշակների բարձրացում, ընդունելության քննությունների վերացում. ինչ են խոստանում թեկնածուները

«Փաստ» օրաթերթը գրում է.
Պատգամավորի թեկնածուները սոցիալական ապահովության ոլորտին վերաբերող ինչպիսի խոստումներ են ներառել իրենց նախընտրական ծրագրերում, փորձել է պարզել «Փաստը»: Ուսումնասիրելով կուսակցությունների և դաշինքների նախընտրական ծրագրերը` պարզ է դառնում, որ բոլորի մոտ էլ առանցքային խնդիրը կենսաթոշակների և աշխատավարձերի բարձրացումն ու աշխատատեղերի ստեղծումն է:
«Ծառուկյան դաշինքը» խոստանում է միջին կենսաթոշակի չափը համապատասխանեցնել նվազագույն կենսապահովման զամբյուղին, այն բարձրացնել 25 հազար դրամով, դե իսկ 2018 թ. հունվարի 1–ից նվազագույն աշխատավարձը դարձնել 80 հազար դրամ: Բացի այդ, ըստ դաշինքի «կանխատեսումների»` մինչև 2019 թ. աղետի գոտում ոչ մի քաղաքացի չի ապրելու ժամանակավոր կացարաններում: Եվ առաջիկա 5 տարիներին մի շարք ոլորտներում, այդ թվում՝ հատկապես թեթև արդյունաբերության ձեռնարկություններում, նոր աշխատատեղերի ստեղծմանն ուղղված ներդրումները կազատվեն հարկերից:
«Կոնգրես–ՀԺԿ» դաշինքն էլ է պատրաստվում միջին կենսաթոշակը բարձրացնել նվազագույն սպառողական զամբյուղի մակարդակի, այն է` 55 հազար դրամի: 3 տարվա մեջ նվազագույն թոշակը կբարձրացվի սպառողական զամբյուղի մակարդակի, դրանից երկու տարի անց էլ` կենսաթոշակների միջին չափը կհասնի միջին աշխատավարձի 40%–ին: Նախատեսվում է նաև պետական աջակցությամբ ստեղծել ապահովագրական համակարգ, որը գյուղատնտեսությունը կպաշտպանի ցրտահարությունից, կարկտահարությունից և այլ բնական աղետներից։ Ըստ դաշինքի նախըտրական ծրագրի` զգալիորեն կբարձրացվի պայմանագրային զինծառայողների, սպաների և ենթասպաների աշխատավարձը։ ԽՍՀՄ խնայբանկի ավանդները կձևակերպվեն որպես պետական պարտատոմս և դրանք կմարվեն 2 անգամ ավելի մեծ չափով և 2 անգամ ավելի արագ, քան նախատեսված է գործող օրենսդրությամբ։
Հանրապետական կուսակցության նախընտրական ծրագրում ասված է, որ կներդրվեն կամավոր աշխատանքի ինստիտուտը, սոցիալական պաշտպանության ոլորտի միասնական տեղեկատվական համակարգը: Կմշակվեն և կհաստատվեն երեխայի և ընտանիքի աջակցության կենտրոնների ստեղծման պլան–ժամանակացույցը և հաստատությունների վերակազմակերպմանը վերաբերող իրավական ակտերը, կվերակազմակերպվեն և կբեռնաթափվեն բնակչության սոցիալական պաշտպանության հաստատությունները, կստեղծվեն նոր վերականգնողական կենտրոններ, ինտեգրված սոցիալական ծառայությունների համակարգի ներդրում:
«Հայ Յեղափոխական Դաշնակցության» ծրագրում էլ ասվում է, որ աշխատանքի նվազագույն վարձատրությունը չի կարող ցածր լինել կենսապահովման զամբյուղից: Վերջինները երաշխավորում են տարեցների բարեկեցիկ ծերությունը: Նրանք արտագաղթը կանխելու նպատակով Հայոց բանակում ծառայած յուրաքանչյուր երիտասարդի` իր բնակարանային ապահովվածության ու աշխատանքի կարիքների հոգալու հնարավորություններ կստեղծեն: Վերջինները նաև խոստանում են օգնել ֆիզիկական և մտավոր սահմանափակումներ ունեցող անձանց դառնալու հասարակության լիարժեք անդամներ, ապահովել նրանց կրթություն ստանալու, աշխատելու, տեղաշարժի իրավունքի լիարժեք իրականացումը:
«Օհանյան–Րաֆֆի–Օսկանյան» դաշինքի սոցիալական քաղաքականության մեջ մտնում է առաջին հերթին աղքատության մակարդակի էական նվազեցումը: Դրա նպատակով կիրականացնեն կենսաթոշակների ինդեքսավորում: Կենսաթոշակառուներն ամեն ամիս իրենց կենսաթոշակի հետ պետք է ստանան նաև տվյալ կամ նախորդ ամսվա արժեզրկման չափով ինդեքսավորման լրացուցիչ գումար: Կիրականացվի նաև բյուջետային ոլորտի աշխատողների աշխատավարձերի ինդեքսավորում:
«Ազատ դեմոկրատներն» էլ պատրաստվում են նվազագույն աշխատավարձը միջին աշխատավարձի 38–48%–ին հասցնել, միջին կենսաթոշակը` միջին աշխատավարձի 30–35%–ին: Վերջինները պատրաստվում են պետության կողմից վճարել ցանկացած նոր (առաջին անգամ բացվող) փոքր ձեռնարկություն նախաձեռնելու հետ կապված վարկերի տոկոսները։ Ըստ «Ազատ դեմոկրատների»` 5 տարվա ընթացքում ներքին միգրացիան կկրճատվի 3 անգամ։ Սիրիահայությունն ու Ադրբեջանից գաղթած հայերը կապահովվեն բնակարանով ու աշխատանքով։ Ամեն մի վերաբնակեցված ընտանիքի կտրամադրվի 50 հազար դոլար։
Կոմունիստների նախընտրական ծրագրում էլ խոսվում է, որ պետությունը պետք է արդյունավետ միջոցներ իրականացնի իր քաղաքացիներին աշխատանքով ապահովելու ուղղությամբ, երաշխավորի նրանց կենսաապահովման պայմանների բավարարումը, ըստ արժանավույն գնահատի իր քաղաքացիների վաստակը հայրենիքի առջև: Ըստ նրանց` պետք է ստեղծել բնակչության անվճար բուժսպասարկման պետական ցանց, երիտասարդության համար ապահովել անվճար պարտադիր միջնակարգ և բարձրագույն մասնագիտական կրթություն, ամեն կերպ աջակցել երիտասարդ տաղանդների բացահայտմանը: Կենսաթոշակների չափը համապատասխանեցնել կենսաապահովման զամբյուղի պահանջներին: Մշակել օրենքներ սննդամթերքների և առաջին անհրաժեշտության ապրանքների, դեղորայքի, էլեկտրաէներգիայի, գազի, կապի ու տրանսպորտի միջոցներից օգտվելու, ջրի ու կոմունալ ծառայությունների գների պետական կարգավորման մասին:
«ԵԼՔ» դաշինքի տեսլականով պետական բյուջեի եկամուտների մեծացման արդյունքում առնվազն 20%–ով կավելացվեն բյուջետային հիմնարկների աշխատավարձերը և կենսաթոշակները: Կօպտիմալացվի պետական կառավարման համակարգը և պետական հատվածի աշխատավարձերը կհասցվեն մասնավոր հատվածի աշխատավարձերին, կսահմանվի եկամտահարկի միասնական` 20% դրույքաչափ: «ԵԼՔ» դաշինքն պատրաստվում է չեղարկել կուտակային կենսաթոշակային համակարգի պարտադիր բաղադրիչը և ձեռնարկել կամավորության հենքի վրա կուտակային կենսաթոշակային համակարգի կառուցում:
Հայկական վերածնունդն էլ հայտարարել է, որ կվերացվի հիփոթեքային վարկավորման միջոցով բնակարանների ձեռք բերման կանխավճարը, յուրաքանչյուր ամուսնացող զույգին պետական բյուջեից միանվագ կտրամադրվի 500 հազար դրամ աջակցություն: Միաժամանակ ծնվող երեխաներին հատկացվող գումարները կավելանան: ՀՀ մարզերում կրթության ոլորտում անվճար մանկապարտեզների ցանց կձևավորվի: Բուհերում ընդունելության քննությունները կվերացվեն, սոցիալապես անապահով ընտանիքների համար անվճար կրթության երաշխավորման մեխանիզմներ կսահմանվի:
Շարունակությունը` «Փաստ» օրաթերթի այսօրվա համարում: