«Ես էդ արել եմ հիվանդ ժամանակս, երբ իմ վրա մահափորձ էին արել»/ Տ․ Արզաքանցյան

«Փաստ» օրաթերթը գրում է.
Գավառում ՀՀԿ ռեյտինգային ընտրակարգով առաջադրված Տիգրան Արզաքանցյանը «Փաստի» հետ զրույցում վստահեցնում է, որ ընտրվելու է առանց գումար բաժանելու, ճիշտ է՝ իր հիմնադրամի միջոցով բարեգործություններ է անելու: Նա նաև վստահեցնում է, որ իր ֆինանսական խնդիրները չեն սկսվել այն բանից հետո, երբ որոշել է բանակին 15 մլն դոլար գումար տալ:
Ներկայացնում ենք «Փաստի» հետ ՀՀԿ թեկնածուի զրույցը:

– Պարոն Արզաքանցյան, Դուք տևական ժամանակ Գավառում չէիք, մրցակցությանը կարո՞ղ եք դիմանալ, գավառցիները Ձեզ հիշո՞ւմ են:
– Մրցակցությանը կարամ դիմանամ, թե չէ, էդ կարաք թույլ մարդկանց հարցնեք, ես դրանց շարքին չեմ պատկանում: Իմ դեմ եղած մրցակիցները պետք է դիմանան համ ինձ, համ քարոզարշավին: Ինձ էլ չեն կարա դիմանան, որովհետև մարդիկ պետք է հասկանան՝ ով են եղել իրանք, ինչ են ուզում, որ էսօր ուզում են դառնան թեկնածու, ինչ են արել մինչև էսօր մեր երկրի համար, ինչով են պետք եկել, իրանցից ինչ են ներկայացնում: Հիմա պիտի գան «լյա–լյա» կարդան ժողովրդի գլխին, սուտ խոսքեր ասեն, գումարներ խոսք տան, իմ մեջ չկան տենց բաներ:
– Ուզում եք ասել՝ Ձեզ առանց գումարի ընտրելո՞ւ են:
– Ես ոչ մի անգամ իմ ընտրվելու համար գումար չեմ ծախսել: Ես ծախսել եմ գումարներ իմ հիմնադրամի բարեգործություններով լավ գործեր անելու համար, որ մինչև հիմա իմ արած գործերը մարդիկ վայելում են:
– Իսկ հիմա Դուք ֆինանս ունե՞ք հիմնադրամի միջոցով բարեգործություն անելու համար: Հայտնի է, որ ֆինանսական լուրջ խնդիրներ ունեիք վերջին շրջանում:
– Ուրեմն մարդ ինչքան ապրում ա, միշտ ֆինանսական խնդիրները կան: Իմ գործերը լրիվ նորմալ գնում ա, ճգնաժամը գալիս–գնում ա, էսի կյանք ա: Մի մարդ կարա՞ ասի, որ իմ մոտ ոչ մի դժվարություններ կյանքում չեն եղել: Ես հիմա խնդիրներ չունեմ ֆինանսական, իմ գործերն էլ նորմալ ա գնում: Հիմնադրամի կայքը շուտով կգործի: Ես նենց եմ ուզում անեմ, մարդիկ դրսերից հետ գան, իրանց դռան դեմը լինեն, իրանց ընտանիքի հետ լինեն, աշխատեն: Ես արտադրություն եմ ստեղծում նորից: 1997–ին ես առաջին մարդն եմ եղել, որ քեշ գումարով խաղող եմ մթերել: Խաղողի այգիները էսօր որ շնչում են, ինձանով են շնչում: Գնացել եմ, խնդրել եմ ժողովրդին, ասել եմ չքանդեք ձեր տնկիները, 50%–ը միանգամից եմ տվել:
– Պարոն Արզաքանցյան, Դուք վերջերս ասացիք, որ 15 մլն դոլար եք տվել բանակին: Հնարավո՞ր է դա էր ազդել, որ Ձեր ընկերությունները սնանկացան Հայաստանում՝ «Գրեյթ վելին», «Աշտարակի գինիները»:
– Ոչ, չի ազդել, հիմա էլ որ գործերս լավ գնա, կարող ա նորից կրկնակի ավել էլ տամ: նախ՝ «Աշտարակի գինիները» դատական պրոցեսի մեջ է բանկի հետ, մինչև էս ամսվա մեջ բանկի հետ հաշտության պայմանագիր կկնքենք: Իսկ «Գրեյթ Վելիի» հետ ես 9 տարի կապ չունեմ:
– Բայց Դուք հենց 9 տարի առաջ եք այդ 15 մլն դոլարը տվել:
– 9 տարի առաջ իմ գործերը փայլում էին: Ես դուրս եմ եկել, գործարանը էլի լավ աշխատել ա, բայց թե դրանից հետո ինչ են արել, ես դրա հետ կապ չունեմ: Իսկ գումարը որ տվել եմ, կարո՞ղ ա վատ բան եմ արել: Մեր բանակին օգնություն եմ ցույց տվել:
– Իսկ ո՞վ էր Ձեզ դիմել, որ նման գումար տայիք, Սերժ Սարգսյա՞նը:
– Ոչ, Սերժ Սարգսյանն ընդհանրապես կապ չունի իմ գործերի հետ, որ խնդրի, որ ես անեմ: Ես էդ արել եմ հիվանդ ժամանակս, երբ իմ վրա մահափորձ էին արել: Էդ ժամանակ իմ փողն իմ աչքին չէր գալիս ոչ մի ձևի: Ես մենակ մտածում էի՝ շուտ առողջանամ: Էդ ժամանակ քո առղջության մասին ես մտածում, ընտանիքի մասին ես մտածում ու հայրենիքի մասին ես մտածում, ուրիշ բաներ չես կարում մտածես: Ես տարբեր հիմնադրամներին գումարը չտվեցի, տվեցի բանակին, որ մեր «սալդատներին» կարող ա պետք գա՝ սնունդի մեջ, հագուստի մեջ:

Շարունակությունը` «Փաստ» օրաթերթի այսօրվա համարում: