Ի՞նչ օրակարգով է Սերժ Սարգսյանը մեկնում Փարիզ

ՀՀ նախագահ Սերժ Սարգսյանը Ֆրանսիայի ղեկավարի հրավերով մարտի 8-9-ը պաշտոնական այցով կլինի Ֆրանսիայում: Այդ մասին հայտնի էր դարձել դեռ մեկ ամիս առաջ, երբ Ֆրանսիայի գործող նախագահ Ֆրանսուա Օլանդը ելույթ էր ունեցել Ֆրանսիայի հայկական կազմակերպությունների համակարգող խորհրդի ամենամյա ճաշկերույթին՝ ասելով, որ պատրաստվում է Հայաստանի նախագահի հետ քննարկել ղարաբաղյան հակամարտության կարգավորման հարցը:

Կովկասի ինստիտուտի փոխտնօրեն, քաղաքագետ Սերգեյ Մինասյանի մեկնաբանությամբ՝ Սարգսյան-Օլանդ հանդիպման օրակարգի հիմնական հարցերը պարզ են՝ հայ-ֆրանսիական երկկողմ հարաբերություններ, Հայաստան-Եվրամիություն հարաբերություններ, ղարաբաղյան հիմնախնդիր: Բայց ՀՀ նախագահի այցը կարևոր է նաև նաև Ֆրանսիայում ապրիլին կայանալիք նախագահական ընտրությունների համատեքստում։

«Գիտեք, որ վերջերս տեղի էր ունեցել Ֆրանսիայի գործող նախագահի հանդիպումը հայկական համայնքի հետ, և կարծում եմ, որ այդ հանգամանքը նույնպես խաղում է իր դերը»,- «Առաջին լրատվական»-ի հետ զրույցում մեկնաբանեց քաղաքագետը:

Այսպիսով, կարելի է ասել՝ Օլանդն ակնկալում է, որ Հայաստանի ղեկավարը կօգնի իր կուսակիցներին՝ սոցիալիստներին նախագահի ընտրություններում հայ համայնքի աջակցությունը ստանալու հարցում: Ինքը Ֆրանսուա Օլանդը, չի առաջադրվելու նախագահական երկրորդ ժամկետի համար:

Հայտնի է, որ Հայաստանի նախագահից հետո՝ մարտի 14-ին, Ֆրանսիայում կլինի նաև Ադրբեջանի նախագահ Իլհամ Ալիևը: Վերջինիս Ֆրանսիա հրավիրելու պատճառը, ըստ էության, Հայաստանի ու Ադրբեջանի հետ հարաբերություններում ձևական հավասարություն պահպանելն է, որովհետև Ֆրանսիան միջնորդ պետություն է Լեռնային Ղարաբաղի հակամարտության հարցում, իսկ Հայաստանի հետ Ֆրանսիայի հարաբերությունները ակնհայտորեն ավելի խորն են ու բարեկամական, քան հարաբերությունները Ադրբեջանի հետ:

«Ընդհանրապես հնարավոր չէ ինչ-որ կերպ թաքցնել, որ Ֆրանսիա-Հայաստան հարաբերությունները չափից ավելի բարեկամական են: Իսկ Ֆրանսիայի հայկական համայնքը ամենաազդեցիկ հայկական գաղթօջախներից է, հետևաբար Ֆրանսիան փորձում է գոնե ձևականորեն բալանսը պահպանել»,- նշեց Սերգեյ Մինասյանը: