«Չեմ պատրաստվում նմանների պատիվը բարձրացնել»․ Սամվել Բաբայանը պատասխանել է Ռիչարդ Կիրակոսյանին ու Նիկոլ Փաշինյանին

Տարածաշրջանային հետազոտությունների կենտրոնի տնօրեն, քաղաքագետ Ռիչարդ Կիրակոսյանը «Առաջին լրատվական»-ի հետ զրույցում անդրադառնալով ներքաղաքական զարգացումներին նշել է, որ տեսնում է նաև Ռուսաստանի գործոնը ներքաղաքական այս գործընթացներում, իրենց ընդդիմություն հռչակած մի շարք ուժեր փորձում են ստանալ Ռուսաստանի աջակցությունը ընտրություններում. «Ռուսաստանի գործոնը ներքին քաղաքականության մեջ ինչ-որ առումով նոր դրսևորումներ է ստացել: Պաշտպանության նախկին նախարար Սեյրան Օհանյանը, արտաքին գործերի նախկին նախարար Վարդան Օսկանյանը, «Բարգավաճ Հայաստան» կուսակցության առաջնորդ Գագիկ Ծառուկյանը, Լևոն Տեր-Պետրոսյանը, Սամվել Բաբայանը, Թևանյանը՝ բոլոր այս գործիչներն այսօր զարմանալիորեն փորձում են Ռուսաստանի աջակցությունը: Այլ խոսքերով՝ Հայաստանի քաղաքական լանդշաֆտում են հայտնվել, այսպես ասած՝ ռուսամետ «չար թռչունները» (angry birds): Սա վիրավորանք է հայ ընտրողին, որը մերժել է իրական ընտրությունը, և որի ձայնը չի ազդում իր երկրի ապագայի վրա: Բայց մյուս կողմից՝ ռուսական այս գործոնը շատ մակերեսային է, լուսանցքային և իրականում չի աշխատելու»:

Ռիչարդ Կիրակոսյանը նաև իր կարծիքն է հայտնել Արցախի պաշտպանության բանակի նախկին հրամանատար Սամվել Բաբայանի՝ «Օհանյան-Րաֆֆի-Օսկանյան» դաշինքի հետ ունեցած կապի մասին: «Կարծում եմ՝ Սամվել Բաբայանը թե՛ անձնապես և թե՛ քաղաքականապես վտանգ է ներկայացնում Հայաստանի համար: Իր վերադարձը Մոսկվայի կամավոր արտաքսումից և իր կապը վիճահարույց քաղաքական դաշինքների հետ բարդացնում և միաժամանակ սպառնում է Հայաստանի ժողովրդավարությանն ու ապագային: Թեև կարծում եմ՝ դա ակնհայտ է ինչպես շարքային ընտրողի, այնպես էլ մեր ընթերցողների համար: Մարդիկ շատ լավ գիտեն և հասկանում են այս ամենը»,- նշել է քաղաքագետը։

Սամվել Բաբայանը «Առաջին լրատվական»-ի հետ զրույցում ասաց, որ ինքը Ռիչարդ Կիրակոսյանին չի ճանաչում, և լավ կլիներ, որ եթե դիմացինն էլ իրեն չի ճանաչում՝ կարծիք չհայտներ։ «Եթե մարդը մարդուն կյանքում չի տեսել, մի բառ չի փոխանակել նրա հետ և նման արտահայտություն է անում, ես նրան ասելիք չունեմ։ Նա քաղաքագետ է, թե այլ բան, ես չգիտեմ։ Ես եթե կյանքում հինգ րոպե չեմ խոսել դիմացինի հետ, ինձ թույլ չեմ տա նրա մասին կարծիք հայտնել, իսկ թե դիմացինը նման բան է անում, ուրեն բուժման կարիք ունի»,- ասաց Բաբայանը՝ հավելելով. «Պարոն Բաբայանը միակ մարդն է, որ ոչ ռուս է, ոչ ջհուդ, ոչ էլ այլ բան։ Ես հայ եմ և կարող եմ պաշտպանել միայն Հայաստանի շահը, ուրիշ ոչ մի երկրի։ Եթե ռիչարդները պետք է Ամերիկայից գան, որ անգամ հայերեն խոսել չգիտեն ու Բաբայանի մասին կարծիք հայտնեն, ուրեմն Աստված իրենց հետ»։

Սամվել Բաբայանից հետաքրքրվեցիքն նաև՝ պատրաստվո՞ւմ է ներողություն խնդրել Նրկոլ Փաշինյանից, թե՞ ոչ։ Հիեցնենք, որ նախօրեին Սամվել Բաբայանը «Առաջին լրատվական»-ի հետ զրույցում ասել էր, որ քաղաքական ուժերն արդեն տոկոս են պայմանավորվել իշխանությունների հետ: «Եթե պարոնայք Սամվել Բաբայանը և Սեյրան Օհանյանը նկատի են ունեցել «Ելք» դաշինքը, կարծում եմ՝ միակ բանը, որ կարող եմ նրանց առաջարկել՝ ներողություն խնդրելն է»,-արձագանքել էր Փաշինյանը՝ հավելելով. «Ես ցանկացած նման հայտարարության հեղինակին պատրաստ եմ հրավիրել ուղիղ եթերում դեմ առ դեմ նստել և այդպիսի հայտարարություն անել: Ես համոզված եմ, որ Սեյրան Օհանյանը չի կարող իմ դիմաց նստել և նման հայտարարություն անել»:

Սամվել Բաբայանից հարցրեցինք՝ պատրաստվում է ներողութուն խնդրել և ուղիղ եթերում բանավիճել Փաշինյանի հետ։ «Չեմ պատրաստվում իրենց պատիվը բարձրացնել։ Այսքանը կարող եմ ասել»,- եզրափակեց Սամվել Բաբայանը։