Տաքսիստը Նար-Դոսի փողոցում դաժանաբար սպանել է իր նախկին «շեֆին», ով իր սիրուհու ամուսինն էր

Կենտրոն և Նորք-Մարաշ վարչական շրջանների ընդհանուր իրավասության դատարանում Արշակ Վարդանյանի նախագահությամբ ընթանում է Վահրամ Վ.-ի գործի դատական քննությունը:

Վահրամ Վ.-ն մեղադրվում է դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով:

Ըստ մեղադրանքի՝ 2016 թվականի հունիսի 1-ին, ժամը 14-ի սահմաններում Երևանի Նար-Դոսի ու Վարդանանց փողոցների հատման մասում Վահրամ Վ.-ն անձնական լարված հարաբերությունների պատճառով իջել է իր վարած մեքենայից, մոտեցել է մեկ այլ մեքենայի ղեկին նստած Արսեն Խ.-ին: Բաց պատուհանից նա փայտե մահակով՝ «բիտայով» հարվածներ է հասցրել Արսենին, ապա դանակով երկու անգամ հարվածել է նրա կրծքավանդակի ձախ կեսին՝ սրտի շրջանին՝ պատճառելով սրտի, սրտապարկի վնասում:

Այնուհետև Վահրամը հեռացել է դեպքի վայրից:

Արսեն Խ.-ին տեղափոխել են հիվանդանոց, որտեղ նա ստացած վնասվածքներից մահացել է:

Վահրամը Արսենին ճանաչել է 2012 թվականից: Արսենը տաքսի-ծառայություն էր բացել, և Վահրամը այդ ծառայությունում աշխատել է որպես վարորդ: Տաքսի-ծառայությունում որպես հեռախոսավարուհի աշխատել է Արսենի կինը՝ Ալլան (անունը փոխված է):

Ալլան ու Արսենը ամուսնացել էին 2008 թվականին: Համատեղ ամուսնական կյանքի ընթացքում երեք անչափահաս երեխաներ ունեին՝ 7, 6 և 5 տարեկան:

Ամուսին ու երեք անչափահաս երեխաներ ունենալը Ալլային չի խանգարել ինտիմ հարաբերությունների մեջ մտնել որպես վարորդ իրենց տաքսի-ծառայությունում աշխատանքի ընդունված Վահրամ Վ.-ի հետ:

Վահրամը երկար չի աշխատել տաքսի-ծառայությունում: Նա ազատվել է աշխատանքից, բայց կապը Արաքսյայի հետ շարունակվել է:

Վահրամը քաղաքացիական ամուսնության մեջ է մեկ այլ կնոջ՝ Լյուսյայի հետ (անունը փոխված է), նրանց խնամքին մեկ անչափահաս երեխա կա…

Արսեն Խ.-ն իմացել է կնոջ ու Վահրամի կապի մասին: Նա սկսել է հետապնդել Վահրամին՝ միաժամանակ կնոջը պահելով իր կողքին:

Արսենի կինը՝ Ալլան, Վահրամի հետ նույնիսկ մեկնել է Մեղրի՝ ժամանակ անցկացնելու: Հետագայում ամուսինն իմացել է այդ մասին: Դրանից հետո Ալլան հաղորդում է տվել Մեղրիի ոստիկանությունում, իբր՝ Վահրամ Վ.-ն առևանգել էր իրեն, հասցրել Մեղրի ու այնտեղ բռնաբարել էր:

Այդ հաղորդումը ստուգվել ու չի հաստատվել:

Այնուհետև Ալլան մի անգամ էլ՝ արդեն Երևանում է հաղորդում ներկայացրել, թե Վահրամ Վ.-ն դանակահարել է իրեն: Քննությամբ պարզվել է, որ Վահրամը մատնանշված օրն ընկերոջ հետ գտնվել է բոլորովին այլ բնակավայրում՝ Ալավերդիում, Ալլան ինքն էր իրեն դանակահարել, իսկ Վահրամի դեմ սուտ մեղադրական հաղորդում էր տվել, չի բացառվում՝ ամուսնու պահանջով: Սուտ մատնություն կատարելու համար Ալլան դատվել ու պայմանական դատապարտության է ենթարկվել:

2015 թվականի օգոստոսի 31-ին Արսեն Խ.-ն իր տաքսի-ծառայության գրասենյակում հանդիպել և դաժան ծեծի է ենթարկել Վահրամին: Երբ վերջինս եղել է անգիտակից վիճակում, Արսենը միզել է նրա վրա, ծեծն ու մնացած գործողությունները տեսանկարահանել է, ապա ունեցած նյութերով սկսել է վարկաբեկել Վահրամ Վ.-ին, հայտարարել է, թե «փչացրել է» նրան:

Ծեծված Վահրամին տեղափոխել են հիվանդանոց, որտեղ նա երկու օր բուժվել է, բայց Արսենի դեմ բողոք չի ներկայացրել, Արսենը քրեական պատասխանատվության չի ենթարկվել:

Այս ամենի հետևանքով ծայրահեղ լարված հարաբերությունների մեջ գտնվելով Արսեն Խ.-ի հետ, Վահրամը մտածել է, որ Արսենը շարունակում է հետապնդել իրեն:

Դեպքի օրը Վահրամն իր վարած մեքենան՝ սև գույնի «Նիվան», որը օրավարձով վերցրել ու որպես տաքսի էր վարում, տարել է ընկերոջ մոտ՝ նորոգելու: Փողոցում նկատել է իրեն հետևող Արսեն Խ.-ին: Նար-Դոսի ու Վարդանանց փողոցների հատման մասում կանգնեցրել է նրան, իր մեքենայի մեջ գտնվող «բիտան» վերցրել, իջել ու մոտեցել է Արսենի մեքենային: Վերջինս չի հասցրել դուրս գալ մեքենայից, նստած է եղել վարորդի տեղում, պատուհանը բաց է եղել:

Վահրամը նախ «բիտայով» է հարվածներ հասցրել Արսենին, ապա դանակի երկու հարված է հասցրել նրա սրտի շրջանում…

Դեպքի վայրում գտնվող ընկերը չի կարողացել միջամտել կամ խանգարել Վահրամին…

Դեպքից հետո Վահրամը տուն է գնացել, ապա ինքնակամ ներկայացել է ոստիկանություն և խոստովանել է կատարածը…

Դատարանը վկաների հարցաքննության փուլում է:

Հարցաքննվեց Վահրամի քաղաքացիական կինը՝ Լյուսյան: Վերջինս ասաց, թե 2012 թվականից է ճանաչել Արսենին, այն ժամանակից, երբ Վահրամը աշխատել է նրա տաքսի-ծառայությունում:

2013 թվականից Լյուսյան «տարբեր տեղերից լսել է», որ Արսենը Վահրամին է փնտրում, որ Վահրամը ինտիմ կապի մեջ է Արսենի կնոջ՝ Ալլայի հետ…

Վկան ասաց, թե հանդիպել է ինչպես Ալլային, այնպես էլ Արսենին: Ալլան ասել է, թե ամուսնուց բաժանվել է: Արսենին, ում «Քաչալ» էին ասում, Լյուսյան խնդրել է չխայտառակել ամուսնուն, իրենց հանգիստ թողնել: Արսենն ասել է, թե Լյուսյայի դեմ ոչինչ չունի, բայց Արսենին ներել չի կարող. «Եթե ես ապրեմ, նա չի ապրելու…»:

2016 թվականի մայիսի 13-ին Վահրամը Լյուսյայի հետ հեռախոսազրույցի ժամանակ ասել է, թե նկատել է, որ Արսենը մեքենայով հետևում է իրեն:

Դեպքի օրը Վահրամը կնոջն ու երեխային տարել է կնոջ ծնողների տուն: Որոշ ժամանակ անց կնոջ հետ հեռախոսազրույցի ժամանակ ասել է, թե «վնասել է Արսենին»: Լյուսյան տաքսի է նստել ու շտապել է Վահրամի մոտ, վերջինս ասել է. «Չեմ հիշում՝ ինչ եմ արել, ոնց ա էղել, ավելի լավ ա գնամ ոստիկանություն ու պարզեմ…»: Եվ գնացել է ոստիկանություն:

Վկան նշեց, որ Վահրամն իրեն չի ասել Արսենին դանակով հարվածելու մասին, միայն ասել է, թե խփել է «բիտայով»՝ «վնասել է»:

Հրապարակվեց Լյուսյայի նախաքննական ցուցմունքի հատվածը, որտեղ նա հայտնել էր, թե Վահրամն իրեն ասել է՝ Արսենին խփել է դանակով: Լյուսյան, լսելով իր նախաքննական ցուցմունքը, ասաց, որ այն ճիշտ է, դատարանում դանակի մասին չասաց՝ միգուցե լարվածության պատճառով…

Դատարանում հարցաքննվելուց հրաժարվեց տուժողի իրավահաջորդը՝ սպանված Արսենի եղբայր Արմենակը: Հրապարակվեց նրա նախաքննական ցուցմունքը:

Արմենակը հայտնել էր, թե ինքը կասկածել է «Ալլայի՝ որպես հավատարիմ կնոջ կերպարին»՝ նկատելով նրա շփումը իրենց տաքսի-ծառայության վարորդներից ՝ Վահրամի հետ:

Վկան բազմիցս զգուշացրել է եղբորը, բայց Արսենը սկզբում չի հավատացել, հետո Վահրամը ազատվել է աշխատանքից:

Երբ Արսենը տաքսի-ծառայության գրասենյակում դաժան ծեծի է ենթարկել Վահրամին, Արմենակն ասել է. «Ալլայի նման կինը տեղ չունի մեր տանը»: Բայց Արսենը Ալլային չի հեռացրել:

Դեպքի օրը Արմենակին զանգել ու ասել են, թե եղբայրը վթարի է ենթարկվել Չարենցի փողոցում: Արմենակը շտապել է դեպքի վայր, Արսենին արդեն հիվանդանոց էին տարել: Նրա մեքենայի մոտ ընկած էր փայտե «բիտա»: Մեքենայում ու նրանից դուրս արյան հետքեր կային…

Արմենակը գնացել է հիվանդանոց: Նրան տեսնելով՝ Ալլան փախել է հիվանդանոցից: Արմենակը հասկացել է, որ կատարվածը կապ ունի Ալլայի ու Վահրամի ինտիմ կապի հետ, որ եղբորը հարվածներ հասցնողը Վահրամն է եղել, քանի որ Արսենը այլ անձանց հետ թշնամական հարաբերությունների մեջ չի եղել:

Հունիսի 4-ին եղել է Արսենի հուղարկավորությունը, Ալլան էլ հեռացել է իրենց տանից, գնացել է ծնողների տուն:

Արմենակ Խ.-ն հայտնեց, թե չի ուզում հետագա դատական նիստերին ներկա գտնվել, բայց քաղհայցի պահանջ հավանաբար կներկայացնի, երբ խորհրդակցի իրավաբանի հետ:

Տուժողի իրավահաջորդն ասաց, թե իր կարծիքով այս ամենի մեղավորը մեկն է՝ Ալլան…

Հարցաքննվեց վկա Սաժինյանը, ում մոտ դեպքի օրը մեքենան նորոգելու էր տարել Վահրամը, և ով ներկա է եղել Արսենին հարվածներ հասցնելու պահին:

Վկան ասաց, թե նախկինում Վահրամից իմացել է, որ նա ինտիմ կապի մեջ է տաքսի-ծառայության տիրոջ կնոջ հետ: Վերջինիս ամուսինը մի անգամ ծեծել էր Վահրամին, նա հիվանդանոց էր ընկել: Վկան ասաց, թե հիվանդանոցում Վահրամին ճանաչել է ձեռքի «նակոլկից», նրա դեմքը ծեծից դարձել էր անճանաչելի…

Դեպքի օրը Վահրամը մեքենան տարել է վկայի մոտ՝ նորոգելու, բայց ասել է, թե Արսենը մեքենայով հետևում է իրեն: Վկան տեսել է Արսենին՝ մեքենայի ղեկին: Որոշել են Վահրամի վարած մեքենան տանել շենքի բակ՝ հեռացնել Արսենի աչքից, խուսափել հանդիպումից: Արսենը մեքենան վարել է իրենց հետևից, բայց հետո անցել է իրենց ու շարժվել է առաջ: Այդ ժամանակ Վահրամը մեքենայով գնացել է նրա հետևից, կանգնեցրել է նրան Նար-Դոսի ու Վարդանանց փողոցների հատման մասում, վերցրել է փայտե «բիտան», իջել է: Վկան էլ է իջել՝ մտածելով խանգարել, չթողնել, որ կռվեն:

Վահրամը մոտեցել է վարորդի տեղում նստած Արսենին՝ գոռալով. «Ի՞նչ ես ուզում»: Նա սկսել է հարվածել «բիտայով», հետո «բիտան» ընկել է, Վահրամը հարվածել է դանակով, որը մինչև այդ պահը վկան նրա մոտ չէր տեսել…

Վկան ասաց, թե փորձել է դանակը խլել Վահրամի ձեռքից, իր մատն էլ վնասվել է, բայց դանակը խլել չի կարողացել:

Հարվածներ հասցնելուց հետո Վահրամը դանակը ձեռքին հեռացել է Նար-Դոսի փողոցով:

Վկան ասաց, թե մինչև դեպքը ինքը Վահրամին նույնիսկ խնդրել է որոշ ժամանակով Երևանից հեռանալ, հեռու մնալ Արսենից՝ մինչև ամեն բան «նորմալանա»:

Վկան նշեց՝ Վահրամը երբեք չի ասել, թե պատրաստվում է խփել Արսենին, բայց միշտ ասել է, որ խնդիրը իր ինքնասիրությանն է վերաբերում:

Վահրամ Վ.-ի շահերի պաշտպան, փաստաբան Հովիկ Արսենյանից տեղեկացա, որ պաշտպանական կողմի դիրքորոշմամբ՝ Վահրամ Վ.-ին պետք է մեղադրանք առաջադրվեր ոչ թե դիտավորյալ սպանության համար՝ ՀՀ քրեական օրենսգրքի 104 հոդվածի 1-ին մասով, որով Վահրամն իրեն մեղավոր չի ճանաչում, այլ՝ ՀՀ քրեական օրենսգրքի 112 հոդվածի 2-րդ մասով՝ դիտավորությամբ տուժողի առողջությանը ծանր վնաս հասցնելու համար, որը հանգեցրել է տուժողի մահվանը: