Արցախը ոչ մի հումանիտար օգնություն չի ընդունելու Ադրբեջանի կողմից. Ռուբեն Վարդանյան

Արցախը ոչ մի հումանիտար օգնություն չի ընդունելու Ադրբեջանի կողմից, ասել է «Արցախի անվտանգության և զարգացման ճակատի» համակարգող, նախկին պետնախարար Ռուբեն Վարդանյանը և հավելել. «Մենք պահանջում ենք գործարկել հումանիտար օդային կամուրջ, և շատ կարևոր է, որ ողջ աշխարհը գիտակցի, որ ներկա պայմաններում միակ լուծումը օդային կամուրջ ապահովելն է՝ արցախցիներին սնունդ և անհրաժեշտ այլ ապրանքներ մատակարարելու համար: Օդային կամուրջը կարող է կազմակերպվել միջազգային տարբեր կազմակերպությունների կողմից, ովքեր նման բեռներ տեղափոխելու իրավունք ունեն՝ անկախ նրանից, թե շրջափակում իրականացնող երկիրը համաձայնում է դրան, թե ոչ»:

Ըստ Վարդանյանի, օդային կամրջի մասին պետք է հնարավորինս շատ բարձրաձայնել, որովհետև մենք շատ լավ հասկանում ենք, որ Ադրբեջանը մտադիր չէ թույլ տալ սնունդ ստանալ Հայաստանից, իսկ Ադրբեջանից որևէ բեռների տեղափոխում մենք թույլ չենք տալու: «Դա չափազանց վտանգավոր է: Ինչ վերաբերում է ավելի կտրուկ քայլերին, մենք պետք է գիտակցենք, որ առկա ռազմական իրավիճակում մենք պետք է պատրաստ լինենք դիմագրավելու տարբեր սադրանքների, որոնք կարող են իրականացվել Ադրբեջանի կողմից: Մեր պատրաստվածությունը պետք է շատ բարձր լինի: Ոչ միայն զինծառայողները, այլ նաև հասարակ քաղաքացիները պետք է պատրաստ լինեն դիմադրության»,- նշել է նա:

Ըստ նախկին պետնախարարի, նման իրավիճակում, երբ գիտենք Հայաստանի իշխանությունների դիրքորոշումը, «երբ տեղյակ ենք ռուս խաղաղապահների սահմանապահ հնարավորություններից, մենք պետք է պատրաստ լինենք ինքներս բացել ճանապարհը, եթե դա հնարավոր չի լինելու անել այլ քաղաքական քայլերով: Դա պահանջում է համախմբում հայաստանցիների հետ, որ միասին բացենք ճանապարհը, որովհետև անընդունելի է, որ 120 հազար մարդ, այդ թվում 30 հազար երեխա, 20 հազար տարեցներ զրկված են տարրական կենսապայմաններից: Եթե օդային կամուրջը չի ապահովվելու, մենք պետք է ճանապարհը բացենք մեր ուժերով»:

Արփինե Ղազարյան