«Եթե ես ուզեի խանգարել Միհրանին, նա Օլիմպիական խաղերին չէր մասնակցի»․ Մամիաշվիլի

Ռուսաստանի ըմբշամարտի միության նախագահ, ըմբշամարտի միջազգային ֆեդերացիայի մրցավարական կոմիտեի նախագահ Միխայիլ Մամիաշվիլին հերքել է տեսակետն այն մասին, թե իր միջամտության հետեւանքով է 66 կգ քաշային հունահռոմեական ոճի ըմբիշ Միհրան Հարությունյանը զրկվել օլիմպիական ոսկուց: Հայաստանի հավաքականի մարզիկն ըմբշամարտի մրցաշարի եզրափակչում պարտվեց սերբ Դավոր Շտեֆանեկին՝ Ըմբշամարտի համաշխարհային միության նախագահ Նենադ Լալովիչի հայրենակցին, մրցավարական ակնհայտ կողմնակալության արդյունքում: Rusarminfo.ru-ին տված հարցազրույցում Մամիաշվիլին նշել է, որ ճիշտ է՝ մրցավարների համակրանքը սերբի կողմն է եղել, սակայն ըմբշամարտի կանոնները չեն խախտվել:

«Պետք չէ տեղի տալ այն ընդհանուր տրամադրություններին, թե եզրափակչում մրցավարները Միհրանի ձեռքից վերցրել են հաղթանակը: Այս հարցում ես ավելի ծանրակշիռ տեսակետ ունեմ: Ըմբշամարտի կանոնները չեն խախտվել: Այո՛, համակրանքը սերբի կողմն էր, սակայն ի՞նչ էիք ուզում. ըմբիշները նման բաների հետ առնչվում են: Ամբողջ սրտով շնորհավորում եմ Միհրանին: Ինչ վերաբերում է այն ասեկոսեներին, թե ես խանգարում եմ Միհրանի առաջընթացին, ապա եթե ես խանգարեի, նա Օլիմպիական խաղերին չէր մասնակցի եւ եզրափակիչ էլ դուրս չէր գա: Դրանք հիմարություններ են: Ուրախ եմ իմ եղբայրների համար: Մենք Լեւոն Ջուլֆալակյանի հետ միասին 1988թ․ հաղթել ենք Օլիմպիական խաղերում, ինչպե՞ս կարող ենք նման հարաբերություններ ունենալ»,-ասել է Մամիաշվիլին:

Հայաստանի ըմբշամարտի ֆեդերացիան, ամեն դեպքում, անդրադառնալու է այս հարցին: Ֆեդերացիայի նախագահի 1-ին տեղակալ եւ գործադիր տնօրեն, ԱԺ պատգամավոր Հովհաննես Սոֆոյանն armtimes.com-ի հետ զրույցում հայտարարել է, որ այն բանից հետո, երբ Օլիմպիական խաղերն ավարտվեն եւ ըմբիշներն ու մարզիչները Հայաստան գան, այդ հարցը կքննարկվի նրանց, ինչպես նաեւ Հայաստանի ազգային օլիմպիական կոմիտեի հետ, եւ որոշում կկայացվի հետագա քայլերի վերաբերյալ: