Ապարանում թափառող շները հարձակվել են 12-ամյա երեխայի վրա, նրան մարմնական վնասվածքներով տեղափոխել են հիվանդանոց

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Ապարան քաղաքում ուշագրավ դեպք է տեղի ունեցել։ Մի քանի օր առաջ տեղի թափառող շները կատաղած հարձակվել են քաղաքի բնակիչ, 12-ամյա տղա երեխայի վրա ու մեծաթիվ վնասվածքներ հասցրել մարմնի տարբեր հատվածներում։ Շների հարձակումը կրկնվել է նաև երեկ՝ նույն վայրում։ Երեխայի հոր՝ Վահագն Հակոբյանի, խոսքով՝ այս անգամ երեխայի վրա կատաղած 7 շուն է հարձակվել։ Երկու անգամ էլ երեխային շներից մեծ դժվարությամբ կարողացել են ազատել մոտակայքում գտնվող բնակիչներն ու տեղափոխել Ապարանի բուժհաստատություն։

Վահագն Հակոբյանը, «Փաստինֆո»-ին հայտնեց, որ երեխային բուժհաստատություն տեղափոխել են բավականին ծանր վիճակում։ Շները վնասել են երեխայի գրեթե ամբողջ մարմինը։ Կան ինչպես քերծվածքներ, այնպես էլ խորը վերքեր։

Դեպքի մասին տեղեկանալուց հետո մեր խմբագրությունը կապվեց Ապարանի ԲԿ տնօրենի հետ։ Հայկ Շմավոնյանը հաստատեց, որ նման վնասվածքներով երեխա տեղափոխվել է իրենց մոտ։ Ավելին՝ նշեց, որ երեկ նույն խնդրով, երեխայից բացի, իրենց դիմել է ևս մեկ չափահաս քաղաքացի։ Երկուսին էլ ցուցաբերել են անհրաժեշտ բուժօգնություն ու ճանապարհել տուն։

Այդուհանդերձ, տղայի հոր խոսքով՝ Ապարանի Գայի փողոցի հատվածում, այս պահին էլ 3 տասնյակ շուն է թափառում։ Նրանցից, որևէ մեկն, ըստ նրա, պատվաստված չէ կատաղության դեմ։

«Երեխան ամբողջությամբ ճղրտված է։ Ահավոր վախեցած է, խոսելիս կակազում է։ Ես չգիտեմ, թե էլ ինչ կարող է լինել։ Այդ պահին այդտեղ մարդ է եղել, որ բահով փորձել է հեռացնել շներին երեխայիցս։ Պատմում են, երեխաս գետնին ընկած, շները ատամներով քաշելիս են եղել։ Անցած օրերի ընթացքում նա շների կատաղության դեմ 3-րդ պատվաստումն էր ստացել, երբ երկրորդ դեպքը տեղի ունեցավ։ Մենք արդեն վախենում ենք դուրս գալ փողոց»,- ասաց նա։

Մեր զրուցակցի խոսքով՝ անցած օրերի ընթացքում ինքն այս խնդրով դիմել է տեղի ոստիկանական ծառայություն։ Կառույցից հայտնել են, որ իրավասություն չունեն որևէ քայլ ձեռնարկելու այդ ուղղությամբ։ Քաղաքացու խոսքով՝ շների հարձակման դեպքերը քաղաքում բազմաթիվ են։ Հարձակումները լինում են ինչպես երեխաների, այնպես էլ մեծահասակների վրա՝ խմբերով։

«Ասում են, որ եթե այդ շներին կերակրենք գուցե այլևս չհարձակվեն մարդկանց վրա։ Ես բոլոր շներին նկարել եt։ Եթե այդ շներին տեսնեք, ինքներդ էլ չեք համարձակվի մոտենալ նրանց»,- ասաց նա։

Վահագն Հակոբյանի խոսքով՝ շների հարձակումների խնդիրը քաղաքում առկա է արդեն շուրջ 2 տարի։ Կենդանիների թիվն այս ամբողջ ընթացքում գնալով ավելանում է։ Իսկ վերջին շրջանում շները մեծաթիվ ձագեր են ունեցել, ինչը, որոշ ժամանակ տեղի բնակիչներին կարող է բացարձակ անկառավարելի իրավիճակի առաջ կանգնեցնել։ Հակոբյանի խոսքով՝ իր կինը ևս այս հարցով դիմել է մի քանի կառույցների, սակայն, խնդրին որևէ լուծում չի տրվել։ Ինքն էլ իրենց շենքում ստորագրահավաք է իրականացրել։ Ստորագրություններով դիմումն առաջիկայում պատրաստվում են հանձնել պատկան մարմիններին՝ խնդրին հնարավորինս շուտ լուծում տալու պահանջով։

Աղբյուր` Փաստինֆո