«52 տոկոսը կմնա ՀՀԿ-ին»

«Փաստ» օրաթերթը գրում է.

ՀՀԿ ցուցակում ըստ էության ոչինչ էլ չի փոխվել, պարզապես առաջին տասը համարի տակ հանդես եկողներին օգտագործելով որպես ցուցանմուշ, փորձել են իմիտացիա ստեղծել, թե ամեն ինչ փոխվել է: Ընտրություններից հետո, սակայն, պարզ կդառնա, որ ամեն ինչ նույնն է մնացել. համոզված է «Մոդուս վիվենդի» վերլուծական կենտրոնի ղեկավար Արա Պապյանը:
«Ինչպես շուկայում են երևացող մասում դնում ամենալավ տանձերն ու խնձորները, բայց գնելու ժամանակ տակից փտածներն ու փչացածներն են լցնում տոպրակի մեջ, այնպես էլ ՀՀԿ ցուցակն է: Հիմնականում առևտուր կատարելուց հետո, տանն է միայն պարզ դառնում, թե ինչ որակի տանձ կամ խնձոր են «նաղդել»: Այ հիմա, այդ ցուցակը «նաղդելու» ցուցակ է, այսինքն՝ ամեն ինչ արվում է, որ իբր թե մեջներից լավագույնները ներկայացված լինեն, բայց եթե նրանք են լավագույնները, պատկերացրեք, թե մնացածներն ինչ որակ ունեն»,– «Փաստի» հետ զրույցում ասաց Արա Պապյանը:
Քաղաքագետի կարծիքով ընտրությունների միջոցով իրականում ոչինչ էլ չի կարող փոխվել, քանի դեռ Հայաստանում դրանք արդար ու ազատ չեն, բացի այդ՝ կազմակերպվում են թաղային հեղինակությունների, փողի ու բռնի ուժի կիրառմամբ: Ներկայացված ցուցակով իշխանություններն ընդամենը փորձել են մականունավորներին շղարշով պատել, որպեսզի նրանք առաջին հայացքից չերևան, իսկ որպես շղարշ ցուցակում ներառել են իրենց ազգականներին, բարեկամներին ու որդիներին՝ որպես նոր դեմքեր:
Խոսելով մյուս կուսակցությունների և դաշինքների կողմից ներկայացված նախընտրական ցուցակների մասին, Ա. Պապյանն ասաց, որ այնտեղ նույնպես առանձնապես նոր դեմքեր կամ ֆավորիտներ չկան:
«Իմ կանխատեսումներով, հանրապետականը բոլոր միջոցներն օգտագործելով, 50%–ից ավելի ձայն կհավաքի, քանի որ ընդունված նոր ընտրակարգը համատարած մեծամասնական քվեարկություն է ենթադրում, որտեղ ընտրատեղամասերը բաժանված են ենթատեղամասերի և մարդիկ իրենց քվեն տալու են ոչ թե գաղափարախոսությանը, այլ՝ իրևենց թաղի հեղինակությանը, կամ ով իրենց լավություն է անում»,– աաց Ա.Պապյանը:
Ապագա խորհրդարանում, ըստ նրա ներկայացված կլինեն նաև ՀՅԴ–ն, ՀԱԿ–ը, իսկ Կոմունիստները, հավանաբար, չեն կարողանա հաղթահարել արգելքը: «Ելք» դաշինքից և «Ազատ դեմոկրատներ» կուսակցությունից մեկը ներկայացված կլինի, որպես արևմտյան ուժի ներկայացուցիչ, իսկ Օհանյան–Րաֆֆի–Օսկանյան դաշինքին, ըստ Ա. Պապյանի, չեն թողնի անցնել խորհրդարան:
«Ֆորսմաժորային իրավիճակներից խուսափելու համար իշխանությունները թույլ չեն տա, որ Օհանյան–Րաֆֆի–Օսկանյան դաշինքը հաղթահարի 7 տոկոսանոց արգելքը, դրանով իսկ վերջնականապես կոչնչացվի նաև «Ժառանգությունը»: Ինչ վերաբերում է ՀԱԿ–ին, ապա այսօր հողատվության քարոզ է արվում և դրա ամենաուժեղ քարոզիչը ՀԱԿ–ն է: Հանրապետականները Ղարաբաղը հանձնելու քարոզչության շրջանակներում նրանց առաջ կմղեն, որպեսզի այդ ֆոնին իրենք ավելի պակաս հողատու երևան»,– ասաց Ա. Պապյանը:
Քաղաքագետը չի կիսում այն կարծիքը, թե Օհանյանի քաղաքականություն մուտք գործելը սովորական խաղարկային սցենար է, իսկ նրա գլխավորած դաշինքը չի հայտնվի խորհրդարանում ոչ թե այն պատճառով, որ ընտրազանգվածի խնդիր կարող է ունենալ, այլ՝ Սերժ Սարգսյանի տրամաբանությամբ պետք է նրանց պատժել, ցույց տալու համար, որ իշխանության դեմ դուրս գալ պետք չէր:
«Ի վերջո, Օհանյանի դեմ քրեկան գործ հարուցելու, Օսկանյանի որդու դեմ ակնհայտ կազմակերպված սադրանքը ցույց են տալիս, որ իշխանությունները պատրաստ են գնալ դրան: Ինչ վերաբերում է ԲՀԿ–ին, ապա այդ կուսակցությունը նման է երկրորդ պարաշյուտի՝ երբ հիմնական պարաշյուտը չի բացվում, մարդու կյանքը փրկելու համար երկրորդն է բացվում: Բայց հետաքրքիր է, որ ամեն ինչ այնպես է հաշվարկված, որ անգամ եթե բոլոր կուսակցությունները և դաշինքները անցողիկ շեմը հաղթահարեն, միևնույնն է 52%–ը կմնա ՀՀԿ–ին»,– ասաց Ա. Պապյանը:
«Մոդուս վիվենդի» կենտրոնի նախագահի կարծիքով հիմա իշխանություններին ավելի շատ հետաքրքրում են հետընտրական պրոցեսները, քան նախընտրականը կամ բուն ընտրությունները, քանի որ ամեն ինչ արդեն այնպես է դասավորած, որ հանրապետականները հաղթող դուրս գան:
«Սա ընտրություն չի: Սա անգամ շախմատ չի, այլ սովորական թղթախաղ է, որի ժամանակ ամեն ինչ կարելի է հաշվարկել: Ինչ վերաբերում է երկրորդ փուլ լինել–չլինելուն, ապա իմ կարծիքով ընտրությունները չեն անցնի երկու փուլով, քանի որ դա կարող է նպաստել երկրի ապակայունացմանը»,– ասաց Ա. Պապյանը:

Շարունակությունը` օրաթերթի այսօրվա համարում: