Լևոն Երանոսյանն արձակուրդից շտապ ետ է վերադարձել (թարմացված)

Ըստ Armlur-ի՝ փոխոստիկանապետ, ներքին զորքերի հրամանատար Լևոն Երանոսյանը, ով հուլիսի 31-ի դեպքերից հետո ուղարկել էին մեկամսյա արձակուրդի, շտապ հետ է կանչվել։ Փորձեցինք ոստիկանության մամուլի խոսնակ Աշոտ Ահարոնյանից ճշտել, թե ինչով է պայամանվորված նրա ետ կանչումը, որին ի պատասխան Ահարոնյանը նշեց, որ Երանոսյանը ինքնակամ է ըդհատել արձակուրդը. «Լևոն Երանոսյանը, ինքնակամ ընդհատել է արձակուրդն ու ծառայողական անհրաժեշտությունից ելնելով վերադառնում է աշխատանքի»: Նշենք, որ հուլիսի 29-ի լույս 30-ի գիշերը Սարի թաղում կազմակերպված բախումների ժամանակ, երբ ծեծուջարդի ենթարկեցին լրագրողներին, ոստիկանության գործող անձանցից մեկը եղել է ՀՀ փոխոստիկանապետ, ՈԶ հրամանատար Լյովա Երանոսյանի եղբայր, ՀՀ ՈԶ 1001 զորամասի շտաբի օպերատիվ բաժնի պետի տեղակալ Լեռնիկ Երանոսյանը, ում օրեր անց աշխատանքից հեռացրին: Թե որքանով է այս հետականչումը, կամ ոստիկանության պնդմամբ ինքնակամ վերադարձը ևս կապված այդ դեպքերի պարզ կլինի առաջիկայում

---
Tert.am-ի հարցին, թե ինչո՞ւ է արձակուրդից հետ կանչվել փոխոստիկանապետ Լևոն Երանոսյանը, ոստիկանության լրատվության հետ կապերի վարչության ղեկավար Աշոտ Ահարոնյանն ասաց. «Պարոն Երանոսյանն իր արձակուրդը կիսատ թողել, վերադարձել է ծառայողական անհրաժեշտությունից ելնելով»:

Կոնկրետ ի՞նչ անհրաժեշտություն է, որի պատճառով փոխոստիկանապետին ստիպել են կիսատ թողնել հանգիստը, ոստիկանությունից հրաժարվեցին բացահայտել:

Հարցին, թե հնարավո՞ր է՝ Սարի թաղի և ՊՊԾ գնդի գործով ցուցմունք տալու հետ կապված է վերադարձել Լևոն Երանոսյանը, Աշոտ Ահարոյանը պատասխանեց. «Ոչ»:

Նշենք, որ Խորենացի փողոցում և Սարի թաղում ցուցարարների ու լրագրողների նկատմամբ կատարված բռնությունները տեղի էին ունենում Լևոն Երանոսյանի ներկայությամբ, ով նաև հայհոյախառն արտահայտություններ էր անում։

Լևոն Երանոսյանի եղբայր Լեռնիկ Երանոսյանին, որն անձամբ էր նռնակ նետում ցուցարարների ուղղությամբ, ոստիկանապետը օգոստոսի 5-ին հեռացրեց աշխատանքից։