Իրավիճակը Կութ, Վերին Շորժա և Սոթք գյուղերում

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մենք մեր զինվորների վրա վստահ ենք, դրա համար էլ գյուղի բնակիչները գյուղից դուրս չեն եկել, ավելին՝ արդեն այս վիճակին սովորել ենք։ «Հրապարակի» հետ զրույցում այս մասին ասաց Գեղարքունիքի մարզի Վերին Շորժա բնակավայրի վարչական ղեկավար Արտյոմ Երանոսյանը։

«Թշնամին ամբողջ գիշեր հրետակոծել է մեր գյուղի գյուղատնտեսական նշանակության հողատարածքները, դեռ չենք հասցրել գնահատել պատճառված վնասը։ Կրակել են գյուղի ուղղությամբ, սակայն կոնկրետ գյուղում վնասներ չենք արձանագրել»,-ասաց Երանոսյանը։

Մեր հարցին, արդյոք այս անդադար պատերազմական պայմաններում ապրելուց գյուղի բնակիչների մոտ գյուղը լքելու ցանկություն չի առաջացել, Երանոսյանն ասաց, որ ոչ ոք գյուղից դուրս չի եկել․ «Մենք հիմա վարուցանքով ենք զբաղված՝ ցանք ենք անում»։

Անդրադառնալով հայկական կողմի տված պատասխանին, Երանոսյանը նկատեց, մեր տղաները շատ լավ կռիվ են տվել և որ մերոնք միշտ են լավ կռվում։

Կապ հաստատեցինք նաև Կութ գյուղի բնակիչ Լենա Մելքոնյանի հետ, նա նշեց, որ գիշերը ստիպված է եղել գյուղից դուրս գալ։ Նա նշեց, որ ինտենսիվ հրետակոծության պատճառով գյուղի բնակիչների մի մասը դուրս է եկել գյուղից, սակայն այս առավոտ նորից վերադարձել են Կութ։ Առավոտյան հանգիստ է եղել՝ հնչել են հատուկենտ կրակոցներ։

«Շատ ուժեղ ձայներ էին գալիս՝ գմփոցներ, դժվար կրակահերթեր լինեին՝ զգացվում էր, որ ծանր զենքով են կրակում։ Գյուղի մոտակայքում են պայթել հրթիռները, բայց գյուղի շենքերին վնաս չեն տվել։ Փառք ենք տալիս Աստծուն, որ գյուղում մարդ չի վնասվել»,-ասաց Մելքոնյանը։

Կապ հաստատեցինք նաև Սոթքի բնակիչներից Արմեն Մարտիրոսյանի հետ։ Նա ասաց, որ գիշերը շատ ինտենսիվ ու ծանր մարտեր են մղվել։