Իշխանությունը որոշել է հրաժարվել քրեական տարրերի ու խուժանի միջամտությունից

Ոստիկանապետ Վլադիմիր Գասպարյանը ընտրություններից առաջ սկսել է մարզային այցեր կատարել, հանդիպել մարզային ոստիկանների հետ, նրանց փոխանցելու համար Սերժ Սարգսյանի հստակ հրահանգը՝ առավելագույնս պահել օրենքի տառը։ Վլադիմիր Գասպարյանը ոստիկաններին նաև հորդորում է ընտրությունների ժամանակ լինել արդարամիտ, չառաջնորդվել «ճշտով», քանի որ դա «թայֆի» հասկացություն է։ Մարզային այցելությունները դեռ կշարունակվեն։ Ի դեպ, այսպիսի այցեր Վլադիմիր Գասպարյանը կազմակերպել է և 2012թ. խորհրդարանական և 2013թ. նախագահական ընտրություններից առաջ։

Իրավապաշտպան Վարդան Հարությունյանի խոսքերով՝ այս այցերը և նմանատիպ միջոցառումները գալիս են փաստելու, թե ով է իրականում կազմակերպում և ինչ մթնոլորտում են իրականում անցկացվելու ընտրությունները։ «Որևէ հատուկ նորության, կամ պետական որևէ պաշտոնյայի վարքագծի նոր դրսևորման կարիքը չկա հասկանալու համար, որ Հայաստանում այնպիսի միջոցառումներ, որոնց հետո տալիս են «ընտրություն» որակում՝ կազմակերպվում ու իրականացնվում են միայն ու միայն գործող իշխանության նախանշած ու մանրակրկիտ ծրագրած սցենարով։ Եթե հանկարծ նրանց նախանշած ծրագիրը խափանվում է՝ նրանք իշխանական լծակները իրենց ձեռքում պահելու համար քաղաքացու դեմ ուստիկանական ուժեր ու բանակ են հանում»,- «Առաջին լրատվական»-ի հետ զրույցում ասաց իրավապաշտպանը։ Նրա դիտարկմամբ՝ այս ընտրություններն էլ բացառություն չեն լինի։ Միայն հնարավոր է՝ իշխանությունը ընտրի ավելի աչք չծակող ընտրակեղծարարություններ։ «Այս իշխանության պարագայում սպասվող ընտրությունները ոչնչով չեն տարբերվելու նախկին՝ կեղծիքներով ու իշխանական միջամտություններով ընթացող ընտրություններից։ Այլ խնդիր է, ու չի բացառվում, որ իշխանությունները որոշել են հրաժարվել ընտրական գործընթացին քրեական տարրերի ու խուժանի ցուցադրական ու կոպիտ միջամտությունից ու անցում են կատարում դեպի ավելի «քաղաքակիրթ» ու աչք չծակող կեղծարարության»,- ասաց Հարությունյանը։

Ինչ վերաբերում է նման պայմաններում անցկացված ընտրություններից հետո միջազգային կառույցների տված գնահատականներին, ապա Հարությունյանի խոսքերով՝ ցավալի է, որ շատ հաճախ միջազգային կառույցներն ու ինստիտուտները իրենց բարձրության վրա չեն գտնվում։ «Դա հատկապես ճչացող երևաց 2008 թ․ նախագահական ընտրությունների ժամանակ։ Այստեղ պետք է տարանջատել իրավապաշտպան կառույցներին։ Որպես կանոն, միջազգային իրավապաշտպան կառույցները տալիս են իրենց հստակ ու անաչառ գնահատականները, բայց եվրոպական տարաբնույթ ինստիտուտներն ու այդ կառույցները ներկայացնող անհատ եվրաչինովնիկներ աչքի են ընկնում իրենց անսկզբունքայնությամբ ու հարմարվողականությամբ»,-եզրափակեց իրավապաշտպանը։