Քննիչին ասում եմ՝ եկեք փաստեր ցույց տամ, ասում է՝ զբաղված եմ

«Հրապարակ»-ը գրում է․

Հրազդանի քաղաքապետանի իրավաբանական բաժնի նախկին պետ Ռադիկ Հարությունյանը դիմել է ՀՀ նախագահին եւ դատախազություն, որպեսզի ստուգումներ անցկացնեն Հրազդանի քաղաքապետարանում: Դատախազությունը գործն ուղարկել է Քննչական կոմիտե, որտեղ էլ այն կարճել են: Տեղեկությունը ճշտելու համար զրուցեցինք Ռադիկ Հարությունյանի հետ. «Հուլիսի առաջին շաբաթը ես նամակ ուղարկեցի նախագահ Սերժ Սարգսյանին, ՀՀ դատախազություն եւ վարչապետին: 10 օր առաջ գալիս է մի քննիչ՝ Իվանյան անունով, զանգում է ինձ, կանչում քաղաքապետարան, ասում՝ հիմա համակարգիչը թող բացեն՝ ասեք, թե որ մարդկանց չեն գրանցել, եւ ովքեր հարկ չեն վճարել։ Ես էլ ասացի, որ էդպես չէ կարգը, թող բազայից հանեն 2005թ.-ից մինչ այս տարի բոլոր հարկատուների ցանկը, եւ կտեսնեք, որ միլիոնների հասնող գումարներ չեն հավաքագրվել: Վարձակալության պայմանագրեր են կապել, որ պետք է կոնկրետ գումար մուծվի, սակայն որոշ մարդանցից առանց գումար գանձելու պայմանագրերը լուծարել են: Ինչո՞ւ հասարակ քաղաքացին կարող է իր գույքի ու հողի հարկը մուծել, իսկ քաղաքապետի ծանոթ-բարեկամները, մտերիմները չեն կարող: Եթե շահ չեն ունեցել, ինչո՞ւ են դրել՝ ավագանիով լուծարել: Օրինակ՝ Կոճոռի թաղապետ Օհանյան Լյովան հեկտարներով խոտհունձ է անում, հազարավոր տուկ է վաճառում ու հարկ չի մուծում: Հենց նույն Լյովայի տղան, որը քաղաքապետի վարորդն է, նաեւ ավագանու անդամ, անգամ այստեղ էլ քաղաքապետը խախտել է օրենքը, ավագանու անդամին աշխատանքի ընդունել որպես վարորդ, ամռան ամիսներին խոտհունձ է անում հոր հետ, իսկ մեքենան վարում է բաբակշեցի Լենդրուշը, որն էլ մեքենան ծառայեցնում է քաղաքապետի ընտանիքի համար: Ավագանին քաղաքապետի ջեբի լոբին է, ավագանու անդամներից մեկը որ իր խորհրդականը լինի, մյուսը՝ վարորդը, ոմանք էլ՝ համայնքային աշխատողներ, էլ ի՞նչ ավագանու մասին է խոսքը, ինչ ասում է, այն էլ անում են»:

Հարությունյանից հետաքրքրվեցինք, թե ինչ պատճառով են գործը կարճել, մի՞թե փաստեր չեն եղել։ «Փաստեր շատ կան, քաղաքապետը, բացի հարկերը չհավաքելուց, նաեւ անհիմն հաստիքներ է բացել, որ դրա անհրաժեշտությունը չկա: Մարդիկ, գործ չանելով ու գործի չգալով, բյուջեից տարիներ շարունակ գումարներ են ստանում, այնինչ քաղաքապետը դա կարող էր ծախսել քաղաքի բարեկարգման վրա: Օրինակ՝ Ջրառատի գրադարանում երկրորդ հաստիքն է բացել: Օրենքով՝ գրադարանը պետք է 400 ընթերցող ունենա, նոր երկրորդ հաստիքը բացվի, բայց այդ հաստիքը բացել է քաղաքապետի մտերիմ Տիգրանյան Սամվելի քրոջ համար, որը գործի էլ չի գալիս, իսկ եկած ժամանակ ուղղակի ժամ է մեռցնում: Կամ՝ ո՞նց է ստացվում, որ Հրազդանի թատրոնում, որ ողջ տարի մեկ բեմականացում էլ չի լինում, երկար տարիներ հետո հանդերձապահի հաստիք է բացվում:

Շատ օրինակներ կարող եմ բերել, որտեղ քաղաքապետն օրենքի կոպիտ խախտում է արել եւ շարունակում է էդպես աշխատել: Բացի այն, որ քաղաքապետի մտերիմները հարկ չեն մուծում, տարիներ շարունակ քաղաքապետը գործի է ընդունել մարդկանց, որոնք աշխատանքի չեն գնացել ու բյուջեից աշխատավարձ են ստացել: Կարող եմ ասել հենց մեկը՝ քաղաքապետի փեսան՝ Լեւոն Մելքումյանը: Թող գան, իմ ներկայությամբ մի ստորագրություն կամ մի գործառույթ ցույց տան, որ նա կատարել է: Քաղաքապետը գործի է ընդունել Սամվել Ստեփանյանին, որպես ինչ է աշխատում՝ չգիտես: Իսկ քննչականի քննիչն ինձ պատասխանում է, որ գործը կարճել են: Հարցնում եմ՝ ինչո՞ւ են կարճել, թող քաղաքապետի պաշտոնավարման տարիների ամբողջ բազան հանեն եւ քննություն տանեն, թե ովքեր եւ ինչու հարկերը չեն վճարել: Քննիչին ասում եմ՝ եկեք գնանք, ես ձեզ փաստեր ցույց տամ, ասում է՝ ես զբաղված եմ: Վերջերս վարչապետը հայտարարեց, որ պայքարում է կոռուպցիայի դեմ, ես հատուկ վարչապետին էլ եմ գրել, սակայն հենց նույն վարչապետը ոչ թե պայքարում է, այլ կոծկում է»:

Հարությունյանը մեզ հետ զրույցում նշեց, որ պատրաստվում է կրկին դիմել, այս անգամ՝ հստակ փաստերով, եւ խնդրել, որ դադարեցնեն քաղաքապետի լիազորությունները եւ ստուգումներ իրականացնեն: Հավելենք, որ վերջերս գրավոր հարցում էինք ուղարկել Հրազդանի քաղաքապետարան՝ հողի ու գույքահարկի հարկային պարտավորությունները չկատարած անձանց ցուցակը տրամադրելու խնդրանքով, ինչպես նաեւ այն անձանց ցուցակը, որոնց նկատմամբ վարչական վարույթ է հարուցվել: Ի պատասխան մեր գրության, Հրազդանի քաղաքապետարանն անբարեխիղճ հարկատուների ցանկը, որպես պետական գաղտնիք, մեզ չտրամադրեց, միայն գրությամբ տեղեկացրեց. «Ձեր կողմից պահանջվող տեղեկատվությունը չենք կարող տրամադրել՝ ելնելով «Տեղեկատվության ազատության մասին» ՀՀ օրենքի 8-րդ հոդվածից»:

Նյութի աղբյուրը ` http://hraparak.am/?p=120922&l=am/