«Ապրելու երկիրը» վարչախմբին իշխանազրկելու հաջող օրինակներ ունի

«Ապրելու երկիր» կուսակցությունը իշխող «Քաղաքացիական պայմանագիր» կուսակցությանն իշխանազրկելու բազմաթիվ հաջող օրինակներ ունի ՏԻՄ ընտրություններում, ինչը թույլ է տալիս պնդել, որ դա հնարավոր է անել նաև մայրաքաղաք Երևանում։

«Ապրելու երկիր» կուսակցության նախագահ Մանե Թանդիլյանն այդ մասին ասել է իր վերջին հարցազրույցում, խոսել Արցախի շուրջ ստեղծված իրավիճակից ու ներքաղաքական զարգացումներից։

Ըստ Մանե Թանդիլյանի՝ Արցախի պետնախարարի պաշտոնում Ռուբեն Վարդանյանի նշանակումը լրջագույն ռեզոնանս առաջացրեց Արցախում և պարզ էր, որ Ադրբեջանը չի ցանկանալու նրա հետագա պաշտոնավարումը և ամեն ինչ անելու է` Ռուբեն Վարդանյանին պաշտոնից զրկելու։

Ցավոք, այդ կոպիտ սխալը Արցախում կատարեցին և դա ոչ միայն Ադրբեջանի պահանջն էր, այլ նաև որոշ տեղական շրջանակների, որոնք ամեն ինչ արեցին Ռուբեն Վարդանյանից ազատվելու համար։

Խոսելով ՏԻՄ ընտրությունների և Երևանի քաղաքապետի առաջիկա ընտրությունների մասին՝ Մանե Թանդիլյանը հիշեցնում է Նոյեմբերյան և Ալավերդի համայնքները, որտեղ «Ապրելու երկիր» կուսակցությունը ջախջախիչ հաղթանակ տարավ գործող իշխանությունների նկատմամբ, իսկ Տաթևում «Շանթ» կուսակցության հետ միասին կարողացան իշխանություն ձևավորել և այժմ էլ գործը դատարանում է։

Փաշինյանական վարչախումբն այդպես էլ չի համակերպվում իր խայտառակ պարտության հետ։ Մանե Թանդիլյանը նաև նշել է, թե այսուհետ մեր երկիրը պիտի կառավարեն նվիրյալներն ու արհեստավարժները,-«ահա այսպիսի ուժ է մեր ուժը և չկա առաջինը կամ երկրորդը, որ մենք լինեինք երրորդը, չկա որևէ նման ուժ»,- նշում է «Ապրելու երկիր» կուսակցության նախագահը։

Թերևս Հրաչյա Սարգսյանի շուտափույթ պաշտոնազրկումը և հնարավոր արտահերթ ընտրությունների գնալը ևս կախված է այս հանգամանքի հետ, փաշինյանական իշխանությունը լուրջ վախ ունի, որ կարող է պարտվել և հիմնական ուժը, որ կարող է նրանց պարտության մատնել՝ «Ապրելու երկիր» կուսակցությունն է։

Սոնա Գալստյան