Ինչպես է իրեն զգում արդեն 4 տարի բանտարկված էպոսագետը

Քաղաքականություն 13 Փետրվար, 2017 17:38

ԱԻՄ առաջնորդ Պարույր Հայրիկյանի դեմ մահափորձ կազմակերպելու մեղադրանքով 14 տարվա ազատազրկման դատապարտված էպոսագետ, նախագահի նախկին թեկնածու Վարդան Սեդրակյանն առողջական խնդիրներ չունի, ավելին` ինչպես MAMUL.am-ին հայտնեցին ՀՀ ԱՆ ՔԿՀ հանրային կապերի բաժնից, նրա առողջական վիճակը «շատ լավ» է:
Նախքան պետական հիմնարկից տեղեկություն ստանալը, մեր թղթակիցը փորձեց վերջինի փաստաբան Ալեքսանդր Սիրունյանից որևէ տեղեկություն իմանալ` խնդրեց հարազատներից որևէ մեկի հեռախոսահամարը, վերջինը, սակայն, պատասխանեց, որ իր պաշտպանյալի մասին վաղուց ոչինչ ո´չ լսել, ո´չ հետաքրքրվել է, իսկ եղած հեռախոսահամարներն էլ վերացրել է. «Не знаю никого, контакты давно стер»,- այսպիսին էր Սիրունյանի պատասխանը:
Վարդան Սեդրակյանի ներկայացուցիչ Հայկ Ալումյանը նույնպես ոչինչ չգիտեր և չկարողացավ օգնել մեզ:
Նշենք, որ էպոսագետ Վարդան Սեդրակյանը գտնվում է «Արթիկ» ՔԿՀ-ում: Նրա մասին վերջին, ոչ պաշտոնական տեղեկատվությունը շրջանառվել է դեռևս 2015-ին. նշվում էր, որ դատապարտյալն առողջական խնդիրներ ունի, նույնիսկ վատացել է, նրան բուժօգնություն են ցուցաբերել բանտախցում և որոշել են, որ հիվանդանոց տեղափոխելու անհրաժեշտություն չկա:
Հիշեցնենք, որ ԱԱԾ քննչական վարչությունը Վ. Սեդրակյանին մեղադրանք է առաջադրել ՀՀ քրեական օրենսգրքի 38-34-305-րդ հոդվածով՝ ՀՀ նախագահի թեկնածու Պարույր Հայրիկյանի քաղաքական գործունեությունը դադարեցնելու նպատակով` նրան ապօրինաբար կյանքից զրկելու փորձը պատվիրելու համար։
Հիշեցնենք նաև, որ 2013 թվականի հունվարի 31-ին` ժամը 23:20-ի սահմաններում, Երևան քաղաքի Տպագրիչների փողոցի 9-րդ շենքի 7-րդ մուտքի դիմաց անհայտ անձը հրազենից կրակոցներ է արձակել տուն վերադարձող ՀՀ նախագահի թեկնածու, Ազգային Ինքնորոշում Միավորում կուսակցության նախագահ Պարույր Հայրիկյանի վրա ու դիմել փախուստի: Կրակոցների հետևանքով Պարույր Հայրիկյանը ստացել է մարմնական վնասվածքներ և տեղափոխվել հիվանդանոց։ Պարույր Հայրիկյանի քաղաքական գործունեությունը դադարեցնելու նպատակով նրան ապօրինաբար կյանքից զրկելու փորձ կատարելու կասկածանքով 2013թ. փետրվարի 7-ին ձերբակալվել են նաև նախկինում 2 անգամ դատապարտված Խաչատուր Պողոսյանը և Սամվել Հարությունյանը: