Ալիևի նոր խամաճիկը. Արայիկ Հարությունյանը պաշտոնանկ արեց պետնախարարին

Ադրբեջանի նախագահ Իլհամ Ալիևի՝ Մյունխենում ներկայացրած պահանջից ընդամենը 5 օր անց Արցախի նախագահ Արայիկ Հարությունյանը պաշտոնից ազատել է պետնախարար Ռուբեն Վարդանյանին։

Արցախի նախագահն իր ուղերձը հրապարակել է կառավարության նիստում, որևէ կոնկրետ պատճառաբանություն չի ներկայացրել պետնախարարի պաշտոնանկության վերաբերյալ, միայն նշել է. «Մեզ բոլորիս և պետության բոլոր առումներով դիմադրողականությունը չսպառելու համար որոշում եմ կայացրել Ռուբեն Վարդանյանին ազատելու պետնախարարի պաշտոնից»։

Թե ինչպես է Ռուբեն Վարդանյանը սպառնում Արցախի դիմադրողականությանը, Արայիկ Հարությունյանն ընդհանրապես չի մանրամասնել, բառերի կույտ է երկնել, իբր չափազանց սիրում և գնահատում է Ռուբեն Վարդանյանին։

Ինքը՝ Ռուբեն Վարդանյանը, նույն նիստում չափազանց կոռեկտ է արտահայտվել, թե՛ Արցախի նախագահի, թե՛ ընդհանրապես իր քաղաքական հակառակորդների վերաբերյալ, փաստել, որ դրսից բավականին մեծ ճնշում է եղել և այդ դրսի ճնշումը չէր օգնում ներսում ունենալ իրավիճակ՝ ավելի արդյունավետ գործելու։

Միևնույն ժամանակ Ռուբեն Վարդանյանի խորհրդական Մեսրոպ Առաքելյանը փաստում է, որ Ռուբեն Վարդանյանը մտադիր չէ հեռանալ Արցախից, շարունակելու է իր հայրենանվեր գործունեությունը և որևէ պաշտոն նրան պետք չէր այն իրականացնելու համար։

Ըստ էության, արցախյան որոշակի շրջանակներ, որոնք տևական ժամանակ աշխատում էին պետնախարարի դեմ, կարողացան իրենց մարդուն առաջադրել պետնախարարի պաշտոնում և ազատվել Ռուբեն Վարդանյանի կաշկանդանքից։ Գլխավոր դատախազ Գուրգեն Ներսիսյանը, ամենայն հավանականությամբ, առաջիկայում կնշանակվի պետնախարարի պաշտոնում։

Թերևս Վարդանյանի՝ բավականին կոռեկտ արձանագրումից հետո, Արցախում բողոքի գործողություներ չեն սպասվում, սակայն փաստն այն է, որ Հայաստանի և Արցախի իշխանությունները հերթական անգամ դարձան Ադրբեջանի խամաճիկը և կատարեցին Ադրբեջանի պահանջները։ Առավել ևս Հաագայի վճռից հետո, երբ Ադրբեջանը պարտադիր պետք է բացի Լաչինի միջանցքը, այժմ կտեսնենք, թե ինչ նոր պահանջներ է առաջ քաշել Իլհամ Ալիևը և ինչ նոր սպառնալիքներ է տալու, որից հետո ստիպված կլինենք փաստել, որ Լաչինի միջանցքի փակումը Ռուբեն Վարդանյանի անձով պայմանավորողները տարրական քաղաքական անգրագետներ են։

Աննա Կարապետյան