Արցախի նախագահը չի թաքցնում պետնախարարից ազատվելու ցանկությունը

Արցախից ստացվող նորությունները հուսադրող չեն, Ստեփանակերտում որոշել են բավարարել Ադրբեջանի նախագահ Իլհամ Ալիևի ապօրինի պահանջը և ազատվել Ռուբեն Վարդանյանի ներկայությունից։

Միևնույն ժամանակ, իբր հակադարձում են Ալիևին՝ հայտարարելով, թե Ղարաբաղում Ռուբեն Վարդանյանի գտնվելը և ծավալած գործունեությունը Արցախի ներքին գործն է։ Հիշեցնենք՝ Մյունխենում հարավկովկասյան երկրների ղեկավարների հանդիպմանը Ադրբեջանի նախագահը հայտարարել էր, թե պատրաստ են քննարկել Ղարաբաղի բնակչության հետ նրանց անվտանգության և իրավունքների հարցերը, բայց կանեն միայն այն ժամանակ, երբ Ռուբեն Վարդանյանը հեռանա Արցախից։

Ըստ երևույթին, Ռուբեն Վարդանյանի հեռացումը բխում է ոչ միայն Ադրբեջանի, այլ նաև Հայաստանի և Արցախի իշխանության ղեկին գտնվող անձանց շահերից, որոնք ամեն կերպ փորձում են ազատվել։ Ու թեև Արցախի նախագահի մամուլի խոսնակ Լուսինե Ավանեսյանը պնդում է, թե Ռուբեն Վարդանյանի պաշտոնավարումը և Արցախում գտնվելը բացառապես Արցախի ներքին գործն է, վստահաբար կարելի է ասել, որ առաջիկա օրերին պետնախարարին կազատեն, ինչն էլ վկայում է, որ առնվազն այդ մասով որոշակի կոնսենսուս կա Հայաստանի, Ադրբեջանի, Լեռնային Ղարաբաղի, անգամ Ռուսաստանի իշխանությունների միջև։

Արցախի նախագահ Արայիկ Հարությունյանի կուսակցությունում այևս չեն էլ թաքցնում Ռուբեն Վարդանյանի պաշտոնանկության հավանականությունը։ Խորհրդարանի իշխող «Ազատ հայրենիք-ՔՄԴ» խմբակցության ղեկավար Արթուր Հարությունյանը հավաստել է, թե պետնախարարի հրաժարականի մասով որոշակի քննարկումներ կան, որոնց արդյունքները պարզ կդառնան առաջիկա օրերին, իսկ ինքը՝ Արայիկ Հարությունյանը, մտադիր է փետրվարի 23-ին հանդես գալ ուղերձով։

Ֆեյսբուքյան իր էջում Արցախի նախագահը նշել է, թե Արցախում հանրության շրջանում ձևավորված դժգոհությունն ու միմյանց նկատմամբ անվստահության մթնոլորտը դեռևս շարունակվում է պահպանվել, ինչը պարտադրում է իշխանություններին հավելյալ քայլեր ձեռնարկել արցախյան ներքին կյանքի կայունությունն ու տևական խաղաղությունն ապահովելու ուղղությամբ։

Նա նշել է, թե փետրվարի 23-ին հանդես կգա ուղերձով՝ առավել մանրամասն կանդրադառնա Արցախի շուրջ ստեղծված ներքին ու արտաքին վտանգներին, խնդիրներին, անելիքներին ու հետագա քայլերին։ Այս ամենը որքան էլ քողարկված լինի վերամբարձ խոսքերի շղարշով, միևնույն է վկայում է, որ Արցախի իշխանություններն ամեն ինչ անում են պետնախարարից ազատվելու և ավելի վստահելի ու ենթարկվող անձի պետնախարար նշանակելու միջոցով, խոսվում է, որ պետնախարարի պաշտոնին նշանակելու են գլխավոր դատախազ Գուրգեն Ներսիսյանին։

Նինա Ավագյան