Արցախում վերջնականապես որոշել են ազատվել Ռուբեն Վարդանյանից

Արցախում վերջնականապես որոշել են հրաժեշտ տալ Ռուբեն Վարդանյանին, և սահմանադրական փոփոխություններ նախաձեռնելուն զուգահեռ Արայիկ Հարությունյանի թիմը լայնածավալ գրոհ է սկսել պետնախարարի դեմ, ընդ որում, այդ գրոհը արտահայտվում է ոչ թե հենց պետնախարարի հասցեին, իշխանության կամ Հարությունյանի սպասարկուների հայտարարություններով, այլ ավելի շուտ սահմանադրական փոփոխությունների անհրաժեշտությունը գովերգելու դրվագներով։

Սամվել Բաբայանի հայտարարությունից հետո, թե սահմանադրական փոփոխություններն Արցախում անհրաժեշտություն են, երեկ էլ նման մի հայտարարություն արել է Արցախի նախագահի խորհրդական դարձած, նախկին արտգործնախարար Դավիթ Բաբայանը։ Թե ի՞նչ անհրաժեշտություն է սահմանադրական փոփոխությունները, ողջամիտ որևէ բացատրություն այդպես էլ Արցախից չի ստացվել, սակայն ինչպես ավելի վաղ նշել ենք, Արայիկ Հարությունյանը այդ փոփոխությունները նախաձեռնում է բացառապես մեկ առումով։

Չկարողանալով միանգամից հեռացնել Ռուբեն Վարդանյանին՝ նա մտադիր է նախ ընդունել տալ այդ սահմանադրական փոփոխությունները, ապա և ինքը հրաժարվել իշխանությունից, հընթացս էլ պաշտոնանկ անելով նաև պետնախարարին։ Դրանից հետո արդեն տեխնիկայի հարց է, թե ո՞ւմ նախագահ կընտրի Արցախի խորհրդարանը։

Ըստ էության, Արցախում որևէ կերպ չեն համակերպվում պետնախարար Ռուբեն Վարդանյանի բավական արդյունավետ աշխատանքի հետ և փորձում են ազատվել։ Այս առումով Արայիկ Հարությունյանը նաև ճնշումների տակ է, թե՛ Ադրբեջանի իշխանությունների և թե՛ փաշինյանական վարչախմբի կողմից։

Եթե Ադրբեջանը՝ ի դեմս Ռուբեն Վարդանյանի, տեսնում է լուրջ հակառակորդ, որի հետ չափազանց բարդ է պայմանավորվել, քան արցախյան կոռումպացված որոշ շրջանակների, ապա Փաշինյանը սպառնալիք է տեսնում անձամբ իր իշխանության համար։ Ուստի և մեկ հարցում Հայաստանի, Արցախի և Ադրբեջանի իշխանությունների տեսակետները համընկել են, նրանց խանգարում է բացառապես Արցախի պետնախարարը և տևական ժամանակ է, որ նրա դեմ լայնածավալ արշավ են սկսել:

Աննա Նադոյան