Վերջին օրերին թիրախում է հայտնվել արտահանում իրականացնող «Սպայկա» ընկերությունը

Վերջին օրերին թիրախում է հայտնվել արտահանում իրականացնող «Սպայկա» ընկերությունը: Բանն այն է, որ Հայաստանից Թուրքիա հումանիտար օգնության բեռները հարևան երկիր են տեղափոխվել այդ ընկերության բեռնատարներով: Տվյալ ընկերությունը, որը ոչ միայն ապահովում է մեր երկրից արտահանման ծավալի մեծ մասը, այլև զբաղվում է երկրում արտադրության կազմակերպմամբ ու բազմաթիվ աշխատատեղերի ստեղծմամբ: Ավելին, «Սպայկան» 1000 խոշոր հարկատուների ցանկում 2022 թվականին 58-րդն է եղել՝ վճարելով 4,6 մլրդ դրամ հարկ: Այսինքն՝ երկրում առկա է մի կազմակերպություն, որը ստեղծում է, ինչպես նաև արտահանում է մեծ քանակությամբ արտադրանք՝ նպաստելով տնտեսության զարգացմանը, սակայն հայտնվում է թիրախում, այն դեպքում, երբ խոսքը գնում է քաղաքականության մասին:

Պետք է դիտարկել, որ արտահանումը երկրի տնտեսության զարգացման կարևորագույն ճյուղերից է: Այն շրջանակները, ովքեր թիրախավորել են տվյալ կազմակերպությանը, ի՞նչ են կարծում, եթե «Սպայկան» հրաժարվեր բեռները տեղափոխել Թուրքիա, ապա օգնությունը տեղ չէր հասնի՞, իշխանությունը տեղափոխման խնդիրը չէր կարողանա՞ լուծել: Եթե քաղաքական առումով որոշ շրջանակներ համաձայն չեն վարչապետի Թուրքիա օգնություն ուղարկելու հետ, ապա կարելի է դրա մասին խոսել այլ հարթություններից և քաղաքական խնդիրների մեջ չընդգրկել բիզնեսին: Այստեղ կարելի է թիրախավորել օրինակ պետական կառույցներին՝ ԱԳՆ կամ հենց որոշում կայացնող անձին, ում որևէ մեկը չէր կարող ասել, որ դա նպատակահարմար չէ: Ստացվում է, որ բիզնես շահը ստորդասում են, քաղաքականությանը, մինչդեռ դրանց միջև պետք է էական տարբերություն լինի: Անկախ նրանից թե որ ընկերության մասին է խոսքը: Առնվազն ազնիվ չէ նեղ անձնական շահերից ելնելով թիրախավորել այն աղբյուրը, որից ջուր ես խմում: Ստացվում է, որ տվյալ կազմակերպությունը կերակրում է մեր տնտեսությունը, իսկ մենք վնասում ենք դրան՝ չգիտակցելով դրա հետևանքները: Այս պարագայում խնդիրն այլ է:

Նեղ քաղաքական պայքարի համատեքստում փաստացի փորձ է արվում վնասել սեփական երկրի տնտեսության հիմնական «սնուցող երակներից» մեկը: Արդյո՞ք քաղաքական կամ նեղ անձնական շահերն արժեն, որ թիրախավորվի բիզնեսը, որի համար առանց այն էլ լավ ժամանակներ չեն: Այդ կերպ վնասում ենք ինքներս մեզ, վնասը կրում է երկրի հարկ վճարող քաղաքացին, ում բեռն օր օրի ավելացնում են: Բիզնեսը, որն ապահովում է եկամուտ և աշխատատեղեր, պատշաճ վճարում է հարկերը, ապա պետք է աջակցություն ստանա քաղաքական բոլոր շրջանակներից: Դա է  ենթադրում հայկական շահը:

Աննա Ավետիսյան