Ամերիկան Հայաստանի ցույց տվեց իր վերջին հնարավորությունը

«ԼՐԱԳԻՐ»

Վարչապետ Կարեն Կարապետյանը փետրվարի 10-ին հանդիպել է Հայաստանում ԱՄՆ դեսպան Ռիչարդ Միլսին, որը փետրվարի 1-ին անկեղծ եւ ինչ որ իմաստով կոշտ ելույթ էր ունեցել Հայաստանում կոռուպիայի դեմ պայքարի անարդյունավետության, ազգային անվտանգությանը դրա հասցրած սպառնալիքի մասին: Միլզի ելույթն իհարկե առավելապես առնչվել էր նախորդ կառավարությանը: Նոր կառավարությանն ԱՄՆ դեսպանը աջակցություն է հայտնել, որի վերաբերյալ հավաստիացումը նա արել է վարչապետի հետ հանդիպմանը:
Կարեն Կարապետյանն օրերս լրագրողներին հայտնել էր, թե կոռուպցիայի դեմ պայքարի անարդյունավետության վերաբերյալ դեսպանի ելույթի մասին կխոսի, երբ կհանդիպի նրա հետ:
Ռիչարդ Միլզը հանդիպմանը գոհունակություն է հայտնել կոռուպցիայի դեմ պայքարի վերաբերյալ վարչապետի հրապարակային հայտարարությունների կապակցությամբ, հայտարարելով նաեւ, որ իրական քայլերի դեպքում ԱՄՆ հանձնառությունը չի կարող լինել կասկածի տակ:
Ակնհայտ է, որ տվյալ պարագայում կոռուպցիայի դեմ պայքարի արդյունավետություն արտահայտության ներքո քաղաքական իրականության մի շարք շերտեր են, որոնք ամենեւին չեն ենթադրում առկա կռուպցիոն սխեմաների ապամոնտաժում վարչահրամայական ճանապարհով:
Ինքնին հասկանալի է, որ դա վեր է թե Կարեն Կարապետյանի, թե որեւէ այլ վարչապետի ուժերից, քանի դեռ կա նախագահի ուժեղ ինստիտուտը, եւ իշխանությունը գործնականում պատկանում է Սերժ Սարգսյանին:
Մեծ հաշվով, կոռուպցիայի դեմ պայքարում աջակցության մասին հայտարարությունը նշանակում է հայտարարություն իշխանության ապակենտրոնացման, իշխանության իրական հակակշիռների ձեւավորման գործընթացին ու կամքին, կամ այլ կերպ ասած՝ իշխանության Սերժ Սարգսյանի մենաշնորհը հաղթահարելուն:
ԱՄՆ 2008 թվականից փորձել է այդ աջակցությունը ցուցաբերել Հայաստանում իրական քաղաքական հակակշիռների ստեղծման խնդրին, գործընկեր դիտարկելով տարբեր սուբյեկտների ընդդիմադիր կամ համակարգային տիրույթում, նաեւ իշխանության թեեւրում՝ այդ թվում եւ նախորդ երկու կառավարությունների ղեկավարները:
Ի վերջո, ամեն ինչ ավարտվել է նրանով, որ ԱՄՆ ցուցաբերած այդ աջակցությունը մեծ հաշվով համալրել է Սերժ Սարգսյանի քաղաքական կապիտալը: Կասկած չկա, որ Սերժ Սարգսյանը նույնը սպասում է, ակնկալում եւ գուցե նույնիսկ մանրամասն հաշվարկել է այս դեպքում, թե երբ, ինչպես եւ ինչքանով պետք է իր քաղաքական քսակը համալրի Կարեն Կարապետյանն ու հայտարարվի «քաղաքականապես սնանկ»:
Միեւնույն ժամանակ, ներկայում Հայաստանի իշխանության պարագայում առանձնահատուկ իրավիճակ է, եւ Կարեն Կարապետյանն այս դեպքում մի հնարավորություն է, որը կարող է թերեւս վերջինը լինել բավական երկար ժամանակահատվածի համար, որովհետեւ եթե մինչեւ 2018 թվականի ապրիլ չձեւավորվեց հակակշիռների գործուն մեխանիզմ, իսկ այսպես կոչված քաղաքական դաշում դրա հնարավորությունը գործնականում չկա, ապա դրանից հետո արդեն Սերժ Սարգսյանն իր հետնախագահական սցենարով իր դիրքերը կամրապնդի շատ երկար ժամանակով:
Այդ է խնդիրը, որի մասին գործնականում խոսում է ԱՄՆ դեսպանը՝ Հայաստանում հակակշիռների մեխանիզմ, ուժերի իրական հակակշիռ ձեւավորելու եւ Սերժ Սարգսյանի «մենախաղը» կոտրելու վերջին հնարավորության օգտագործումը, եթե անգամ այդ հնարավորությունը հենց իշխանության մեջ է, որովհետեւ դրսում ճանապարհների արգելափակումը կարծես թե տեղի է ունեցել բավական խորը եւ մի քանի շերտով: