ՏԵՍԱՆՅՈՒԹ․ Երուսաղեմում հայերի և Հայոց պատրիարքարանի վրա հարձակումներ են եղել

Երուսաղեմում փորձել են բարձրանալ Հայոց պատրիարքարանի տանիք և հանել խաչակիր ու ՀՀ դրոշները, ինչպես նաև երկու հարձակում են կատարել հայերի վրա։ Այս մասին «Ֆեյսբուք»-ի իր էջում տեղեկացրել է Երուսաղեմի Հայոց պատրիարքարանի դիվանապետ Հայր Աղան Գոգչեանը։

Նա գրում է, որ հունվարի 28-ի ուշ երեկոյան հրեա 2 ծայրահեղականներ Հայոց Պատրիարքարանի փողոցով «Լացի պատ» գնալիս Հայոց Վանքի դիմաց նախ փորձել են խոչընդոտել երթևեկությունը, ապա դուրս գալով ճանապարհից՝ հարվածել են աշխատանքից տուն վերադարձող հայ երիտասարդների ավտոմեքենային՝ բղավելով. «Սա մե՛ր երկիրն է, գնացե՛ք մեր երկրից»:
Նրանցից մեկը արցունքաբեր գազ է փչել, ապա երկուսով փախուստի են դիմել։

Ոստիկանները հայտնաբերել են հրեա ծայրահեղականներին ու ձերբակալել նրանց:
Այդ դեպքից մեկ ժամ անց հրեա ծայրահեղականների մի ուրիշ խումբ փորձել է մագլցելով բարձրանալ Հայոց պատրիարքարանի տանիք և հանել պատրիարքարանի խաչակիր ու Հայաստանի դրոշները: Այդ պահին վանքի դիմաց կանգնած հայ երիտասարդները, նկատելով դա, մոտեցել և արգելել են։ Ծայրահեղականները փախել են, բայց շուտով վերադարձել այլ խմբով, այս անգամ՝ դիմակավորված:

Սադրանքների դիմելուց հետո նրանք փախել են՝ բղավելով, թե ահաբեկչական հարձակում է տեղի ունենում։ Ոստիկանները դա ճշմարտության տեղ դնելով՝ փակել են ծայրահեղականներին հետապնդող հայերի ճանապարհը, ծեծել մի քանիսին, իսկ Գևորգ Քահկէճեանին ձերբակալել են։

Նրան մի գիշեր պահելուց հետո պատրիարք Տ. Նուրհան արքեպիսկոպոսի անմիջական միջամտությամբ ու դատարանի որոշմամբ ազատ են արձակել՝ 20-օրյա տնային կալանք նշանակելով, բայց քանի որ երիտասարդը մարմնական վնասվածքներ ունի՝ թույլատրել են, որ բժշկական հետազոտություն անցնի, գրել է Երուսաղեմի Հայոց պատրիարքարանի դիվանապետը: