Բաց նամակ Մեսիից
ՍպորտԱրգենտինայի ֆուտբոլի հավաքականի ավագ Լիոնել Մեսին, որն այս օրերին շարունակում է մասնակցել աշխարհի 2022 թվականի առաջնության չեմպիոնական տիտղոսի տոնակատարությանը, բաց նամակ է հրապարակել սոցցանցերում:
Ահա թե ինչ է գրել Արգենտինայի և համաշխարհային ֆուտբոլի աստղը.
«Գրանդոլիից մինչև Քաթար անցել է գրեթե 30 տարի։ Երեք տասնամյակ ֆուտբոլն ինձ երջանկություն և տխրություն էր բերում։ Միշտ երազել եմ աշխարհի չեմպիոն դառնալու մասին և երբեք չեմ մտածել պայքարը դադարեցնելու մասին, թեև հասկանում էի, որ դա կարող է չլինել։
Այս աշխարհի առաջնությունը նույնպես նրանց համար է, ովքեր չկարողացան հաղթել 2014 թվականին, Բրազիլիայում: Բոլորն արժանի էին դրան, քանի որ նրանք պայքարեցին մինչև վերջ, շատ աշխատեցին և ցանկանում էին դա անել նույնքան շուտ, որքան ես… Բոլորն արժանի էին դրան նույնիսկ այս անիծյալ եզրափակիչում:
Այս գավաթը նաև Դիեգոյի համար է, ով մեզ ոգեշնչեց դրախտից, և նաև նրանց համար, ովքեր միշտ հավատացել են ազգային թիմին և նայել ոչ այնքան արդյունքներին, որքան այն եռանդին, որը խաղացողները դրսևորեցին նույնիսկ այն պահերին, երբ ամեն ինչ չէր ստացվում: Եվ, իհարկե, այս հրաշալի թիմի, մարզչական շտաբի և ազգային հավաքականի շուրջ բոլոր մարդկանց համար, ովքեր օր ու գիշեր աշխատում էին մեզ օգնելու գավաթի նվաճման ճանապարհին:
Անհաջողությունը հաճախ կյանքի ճանապարհի մի մասն է, և առանց հիասթափության անհնար է հասնել հաջողության:
Շատ շնորհակալություն! Առաջ Արգենտինա», — գրել է Լիոնել Մեսին:
Նշենք, որ նամակի սկզբում Մեսին հիշատակում է Գրանդոլին անվանումը: Դա լեգենդար ֆուտբոլիստի առաջին ակումբն է, որտեղ նա սկսել է ֆուտբոլ խաղալ մինչ «Նյուելս Օլդ Բոյզ» հայտնի ակումբ տեղափոխվելը:
1982 թվականին, Ռոսարիո քաղաքի հարավ-արևելքում, Լա Բաջադա շրջանում, տեղացի տղաները ստեղծել են «Գրանդոլի» անվանումով ակումբ, որպեսզի կարողանան մարզվել և միասին ֆուտբոլ խաղալ: Ակումբը մինչ օրս գործում է որպես մանկական ֆուտբոլի ակադեմիա: Լիոնել Մեսին, որը ծնվել է Ռոսարիոյի այդ շրջանում, ակումբում հայտնվել է հինգ տարեկանում, երբ նրա առաջին մարզիչ Սալվադոր Ապարիսիոն տեսել է, թե ինչպես է նա գնդակով հարվածում պատին:
«Նա հիանալի էր խաղում: Նա այժմ էլ անում է նույն բանը, ինչ հինգ տարեկանում էր անում։ Լեոն շատ սիրված էր տեղի բնակիցչների կողմից: Մարդիկ հատուկ գալիս էին միայն նրան նայելու և հիանալու։ Եվ նրանք ասում էին՝ ահա նոր Մարադոնան», — հիշել է «Գրանդոլի» ակումբի նախագահ Դեյվիդ Թրևեսը։
1
2
3
4
5
1
2
3
4
5
1
3
4
5
