Ո՞ւմ կոշտուկներն է տրորում Արման Հակոբջանյանը

Արցախում պետնախարար Ռուբեն Վարդանյանի նախաձեռնություններն ու կադրային քաղաքականությունն այնքան են մտահոգել որոշ շրջանակների, որ ոչ միայն պետնախարարն է դարձել նրանց թիրախը, այլև բոլոր այն մարդիկ, ովքեր աշխատում են նրա թիմում, լրջագույն փոփոխություններ իրականացնում Արցախի Հանրապետությունում։

Տակավին այսօր օրերին էլ այդ շրջանակների թիրախն է դարձել պետնախարարի խորհրդական, գործարար Արման Հակոբջանյանը։ Նրան ոչ ավելի, ոչ պակաս մեղադրում են Արցախի ներդրումային հիմնադրամից փոխառություններ ստանալու մեջ։ Արցախի պետնախարարի մյուս խորհրդական Մեսրոպ Առաքելյանն առաջարկել է վերանայել ու դադարեցնել ֆիզիկական ու իրավաբանական անձանց 10 միլիարդ դրամ տրամադրելու գործընթացը:

«Արցախի ներդրումային հիմնադրամը պատերազմից հետո պետական բյուջեի միջոցներից ավելի քան 10 մլրդ դրամի փոխառություն է տրամադրել ֆիզիկական և իրավաբանական անձանց։ Հիմնադրամի նշված գործունեության արդյունավետությունը գնահատելու նպատակով Արցախի Հանրապետության պետական նախարարին առաջարկել եմ ուսումնասիրություններ իրականացնելու հանձնարարական տալ ՝ միևնույն ժամանակ ժամանակավորապես դադարեցնելով փոխառությունների տրամադրումը»։

Այս ողջամիտ առաջարկից ընկնավորած այդ շրջանակները սկսել են կեղծ տեղեկություններ տարածել, իբր Հակոբջանյանը ևս դրա շահառուներից է։ Մի կողմ թողնենք այն հանգամանքը, որ ոչ Արման Հակոբջանյանը, ոչ էլ նրա հետ երբևէ փոխկապակցված անձինք կապ չունեն այդ 10 միլիարդ փոխառությունների հետ։

Ընդհակառակը, Արման Հակոբջանյանը միայն 44-օրյա պատերազմից հետո 12 միլիարդ դրամի ներդրում է արել Արցախում, 1300-ից ավելի աշխատատեղ ստեղծել, այսօր էլ բուռն լծվել է Արցախը վերականգնելու գործին՝ Ռուբեն Վարդանյանի թիմում։

Համակարգված այս արշավը թե՛ Ռուբեն Վարդանյանի, թե՛ նրա թիմակիցների դեմ հստակ մեկ բացատրություն ունի։ Շատերի ախորժակն է փակվել, շատերին են արգելում յուրացնել և վատնել պետության գումարները, քաոտիկ իրականությունը փոխելու միտված համակարգային քայլեր են իրականացվում, ուստի և աշխատող մարդիկ պետք է դառնան ցեխարձակումների թիրախ։ Եվ ոչ միայն Արման Հակոբջանյանը, այլև նրա մյուս թիմակիցները։

Մանե Մսրյան