Գեներալը մտահոգիչ է համարում Վրաստանում ադրբեջանական կապիտալի ավելացումը

Անի Գևորգյան, «ԹԵՐԹ»

Քանի որ Հայաստանը և Արցախը Ադրբեջանի հետ գտնվում են պատերազմական վիճակում, ապա հատկապես Արցախում, որտեղ ընթանում են դիրքային մարտական բախումներ, վառոդը յուրաքանչյուր վայրկյան պետք է չոր պահել: Այս մասին գրավոր պատասխանելով Tert.am-ի հարցերին՝ ասել է ՀՀ պաշտպանության նախարարության նախկին գլխավոր շտաբի պետ, 1993 թ. պաշտպանության նախարարի պաշտոնակատար, Արցախյան պատերազմի հերոս, գեներալ-լեյտենանտ Նորատ Տեր-Գրիգորյանցը:

«Մեր նորաստեղծ բանակը ջախջախեց թշնամուն, հետևաբար, այսօրվա բանակը պետք է պատրաստ լինի կրկնել այս օրինակը, եթե թշնամին փորձի ներխուժել մեր ու Արցախի տարածք: Ադրբեջանը կարող է կրկին ապրիլյանի մակարդակի ռազմական ագրեսիա սադրել, հնարավոր է` ավելի մեծամասշտաբ»,-մանրամասնեց նա։

Գեներալ-լեյտենանտի դիտարկմամբ՝ Պաշտանության նախարարությունը պետք է ռազմա-քաղաքական իրավիճակի խորը վերլուծություն անի և առաջանցիկ գործողություններով համոզի հակառակորդին իր` ագրեսիվ ծրագրի իրականացման ոչ ցանկալի լինելու մեջ:

«ՀՀ ԱԳՆ-ն պարտավոր է միջազգային հանրությանը հասցնել Արցախի՝ հայկական լինելու պատմական ճշմարտացիությունը: Ինչպեսև՝ Ղրիմի Ռուսաստանին պատկանելու դեպքում: Եվ նաև դադարեցնել բոլոր բանակցությունները ագրեսոր կողմի հետ, որն ամեն օր գոռում է պատերազմի վերսկսման ու ՄԱԿ-ի միջազգային տրիբունալից իրենց՝ որևէ ահ չունենալու մասին։ Արցախը հայկական տարածք է: Այն 1921թ. հուլիսի 5-ին նվիրվել է Ադրբեջանի Հանրապետությանը` ԽՍՀՄ անդրկովկասյան բոլշևիկյան բյուրոյի կողմից: Հետևաբար, ժամանակն է բանակցություններ վարել նրանց իրավահաջորդը հանդիսացող Ռուսաստանի հետ: Չէ՞ որ Սովետական միության կարգերի փլուզումից հետո Արցախը, համաձայն միջազգային իրավունքի նորմերին, դուրս եկավ Ադրբեջանից ու ԽՍՀՄ-ից»,-ընդգծեց նա:

Գեներալի դիտարկմամբ՝ այն ժամանակ, երբ Արցախը եղել է ագրեսիվ նացիոնալիստական պետության կազմում, մասնակիորեն կորցրել է իր տարածքային ամբողջականությունը, քանի որ Արցախի որոշ տարածքներ տրվել են Ադրբեջանին:

«Մինչ Քուռ, ինչպես նաև Արցախի ռազմական ուժերի կողմից ազատագրված տարածքները, այդ թվում նաև` Շահումյանի շրջանը, պատկանում են Արցախին: Մարտակերտի ու Մարտունու շրջանների հարթավայրային շրջանները, ինչպես նաև Շահումյանի շրջանը ներկայումս գտնվում են Ադրբեջանի զինուժի վերահսկողության տակ: Իսկ սա նշանակում է, որ այս հողերի վրա ադրբեջանական զինուժի աննշան «մարմնաշարժությունն» իսկ ռազմական հարձակում է կամ այլ ռազմական գործողություն: Իրավիճակ, որը պետք է Հայաստանի և Արցախի ԶՈւ ամբողջ համակարգին զգոնացնի և գործի գցի այդ մեքենան»,-մանրամասնեց նա։

Նորատ Տեր- Գրիգորյանցը շեշտեց, որ մենք գործ ունենք մի հակառակորդի հետ, որն ունի և կուտակել է հսկա ռեսուրսներ` նախատեսված միայն ու միայն հարձակման համար:

«Այս իսկ պատճառով, նրանց անհրաժեշտ է հյուծել պաշտպանական մարտերում և կոնտրհարձակմամբ` ավարտին հասցնելով այս զինված խմբավորման ջախջախումը: Թուրքիային և Ադրբեջանին հետայսու չպետք է տրվի ոչ մի թիզ հող: Ավելի քան 100 տարի առաջ Թուրքիան օկուպացրեց ողջ Արևմտյան Հայաստանը, իսկ Ադրբեջանը, որպես երկրորդ թուրքական պետություն, փորձեց զավթել Արցախը: Հետ մղվեց, բայց ստորագրվեց անտաղանդ հրադադարի պայմանագիր այն դեպքում, երբ հաղթել էինք։ Իսկ սա նշանակում է` կապիտուլյացիա և Արցախի անկախություն։ Եթե ոչ, ապա մինչև Քուռ հինավուրց հայկական հողերի հետվերադարձ: Մեզ ուրիշների հողերը պետք չեն»:

Նորատ Տեր- Գրիգորյանցը հիշեցրել է, որ Հայաստանն ու Արցախը շրջապատված են հարակից երկրների՝ Թուրքիայի ու Ադրբեջանի զինուժների կողմից, ինչը համապատասխան արձագանք չի ստացել միջազգային հարթակներում։

Գեներալ-լեյտենանտը մտահոգիչ է համարել նաև Վրաստանում ադրբեջանական կապիտալի ավելացման հարցը։